Oekusipost.com Ambeno – Organizasaun Non-Governamental (ONG) Lokal PRADET FHO fó fatin hakmatek ba Vitima moras mental Marta Benu Manu ne’ebé durante ne’e sofre hela moras iha nia oan fatin (Utero) ho termino médiku mioma uterine.
Vitima Marta Benu Manu idade ona, durante ne’e moris mesak de’it. Desde tinan 2016 nia refujia ba merkadu Numbei. Ema barak tantu Estadu tenta ajuda nia hodi hadia nia moras ne’e, maibé infelizmente familia laiha. Oras ne’e nia imajen sai viral iha plata forma media sosial hatudu vitima ne’e kanek hela iha nia rentos, bainhira ba husu sanan atu tein, no husu mós etu atu han, maibé tanba ferik ida mós ho kondisaun moras mental, sira nain rua lahasoru malu ikus mai mosu konfrontasaun fiziku entre sira nain rua hodi rezulta Marta Benu Manu kanek iha nia rentos.
Konfrontasaun fiziku ne’e, akontese iha loron Segunda, 19 Abril 2020 oras tuku 6 kalan iha merkadu Numbei, Oe-Kusi Ambeno. Hafoin akontesimentu ne’e, polisia mós atua kedas no konsege lori vitima moras mental ne’e ba konsulta iha Hospital Referal Oe-kusi Ambeno. Ho situasaun ne’ebé Marta Benu Manu hasoru, PRADET parseria ho Ministériu Saúde fasilita ona fatin hakmatek ba nia.
“Nia hela ho ami iha Pradet hodi hein atendimentu ba nia kona-bá nia moras ne’e, tanba nia sofre hela moras mental no tumor iha nia kabun, ne’ebé parese sei iha ne’e durante semana ida ka rua mak foin bele husik nia ba nia hela fatin,” hateten diretora Pradet Oe-kusi Ambeno, Sancia Florência Paixão Bano (Meta Bano) ba Oe-Kusi Post iha Oe-Kusi Ambeno, Kuarta 21 Abril 2020.
Vitima nia saúde durante tinan barak ona, nia moris de’it ho moras mental ho utero. Iha tinan 2016, dotora Catarina Anuno hamutuk ho dotora espesialista ida husi Cuba tenta atu halo operasaun ba nia moras ne’e, maibé laiha konkordansia husi familia
“Tia ne'e pernah ha'u ho espesialista (Obstetricia e Ginecologia), Cubano ida atende nia iha 2016, nia moras iha nia oan fatin (Utero) ho termino médiku mioma uterina, maibé atu halo operasaun kriteira ida mak reprezentante familia tenke asina karta akordu operasaun no tempu ne’eba laiha familia ida atu hare nia iha hospital,” esplika dotora Anuno.
Entretantu, tuir informasaun balun ne’ebé Oe-Kusi Post asesu katak to’o oras ne’e parte médiku sira iha hospital referal Oe-Kusi Ambeno esforsu buka hela nia rai moris fatin ho nia familia, maibé seidauk hetan.
