Oekusipost.com Ambeno – Prezidente Autoridade ba Rejiaun Administrativu Espesial Oe-Kusi Ambeno (RAEOA) no Zona Ekonómia Espesial Sosial Merkadu (ZEESM), José Luis Guterres nomeia ona eis Ministru Saúde, dotor Nelson Martins hodi asume kargu Prezidente Forsa-Tarefa ba Ekipa Konjunta Prevensaun Covid-19 (EKPC-19) iha Oe-Kusi Ambeno.
Antes ne’e, eis diretór interinu saúde, Marcos Seo mak lidera ekipa forsa tarefa ba prevensaun COVID-19, maibé bazeia ba avaliasaun durante ne’e mosu liña koordenasaun serbisu la dun di’ak, nune’e iha loron Kuarta 22 Abril 2020, Prezidente Autoridade ba RAEOA ezonera tiha Marcos Seo husi kargu ne’e hodi nomeia hikas Nelson Martin mak troka ba xefe ekipa COVID-19 nian, no enfermeiru Lui de Jesus Neno ba diretór saúde Oe-Kusi Ambeno. Ida ne’e hatudu katak, Marcos Seo oras ne’e laiha ona kargu xefia, maibé nafatin nu’udar funsionáriu baibain ida.
Xefe Gabinete Prezidente Autoridade RAEOA Agustinho Caet esplika, ezonerasaun ne’e katak laiha kolaborasaun no koordenasaun entre autoridade ho serbisu saúde rejional liliu iha Estadu emerjénsia liga ba moras virus corona (COVID-19).
“Sei nia kontinua hanesan ne’e serbisu sei la la’o, tanba ne’e ita nia Prezidente Autoridade tetu ba-mai tenke hasai nia husi diretó interinu saúde hodi nomeia fali ema seluk,” hatete Caet ba Oe-Kusi Post iha Numbei, Oe-Kusi Ambeno Tersa 21 Abril 2020.
Nia nia hatutan, despaisu ne’e iha rua, primeiru ezonera nia bazeia ba kompetênsia prezidente autoridade nian. Tuir loloos Marcos Seo nia extensaun mandatu ne’e remata ona iha fulan Jullu 2019.
“Husi Agustu mai to’o agora ita sedauk iha baze legal ba nia, agora iha despaisu ne’e depois ita iha nomeasaun hanesan Luis de Jesus Neno atu bele asume diretór interinu ne’e tanba ita hare no observa no mós hetan rekomendasaun husi nia funsionáriu sira iha saúde, husi hospital no fatin seluk,” nia esplika.
Eis Xefe Gabinete Ministériu Negósiu Estranjeiru no Kooperasaun (MNEK) ne’e konsidera despaixu ezonerasaun ne’e la’ós derepente de’it, maibé Prezidente Autoridade bolu atensaun xamada ba nia dala 5 ona no ikus liu mak iha rezidensia Madre Fransiscana sira nian.
Notisia relevante: Lugu Ezonera Diretór Interinu Saúde RAEOA
Entretantu, komunikadu ne'ebé fó sai husi gabinete Prezidente Autoridade RAEOA katak, kompozisaun hodi reforsa ekipa forsa-tarefa ba serbisu prevensaun Covid19 iha RAEOA nu’udar kompromisu Prezidente Autoridade RAEOA ba esforsu tomak kona-ba responsabilidade autoridade RAEOA ba luta hasoru propagasaun vírus corona iha Oe-Kusi Ambeno.
Nomeasaun ba antigu Ministru Saúde iha IV Governu Konstitusionál, dotór Nelson Martins sai Prezidente Forsa-Tarefa EKPC-19 RAEOA hodi bele viabiliza serbisu hirak ne’e ho medida rápida, integrada no sinérjika entre governu sentrál no autoridade Oé-Cusse. Prezidente Autoridade RAEOA deside bazeia ba konsultasaun ho entidade relevantes sira, inklui hato'o mos pedidu autorizasaun ba Primeiru-Ministru, Taur Matan Ruak kabe ba kapasidade no kunhesementu antigu Ministru Saúde iha area serbisu saúde nian.
“Tanba interese nasionál, prezensa Doutór Nelson Martins importante tebes hodi kuntinua asegura serbisu hirak ne'ebé la'o tiha ona, no sei kontribui mós hodi hadi'ak buat ne'ebé la'o lá dun di'ak durante ne'e ho konsisténsia” konfirma Prezidente Autoridade RAEOA liu husi komunidade ba imprensa ne’ebé Oe-Kusi Post asesu ohin.
Dotór Nelson Martins sei hetan mós asisténsia husi ko-koordenadór ekipa COVID-19 sira ne'ebé oras ne’e eziste husi varius instituisaun husi ekipa konjunta RAEOA nian. Alein de ne’e, Doutór Nelson Martins mos sei oferese ideas konstrutivu ba Prezidente Autoridade RAEOA hodi hamosu hanoin sira kona-ba kondisaun infraestrutura Saúde nian, inklui ekipamentu hirak ne'ebé presiza ba futuru hodi dezenvolve setór saúde iha RAEOA.
“Prezensa Doutór Nelson Martins la'ós atu haree de'it ba situasaun atuál. Maibé, prepara mós kondisaun kona-ba dezenvolvimentu setór saúde ne’ebe mak ita presiza atu halo iha futuru. Nune'e bainhira akontese moras da'et ruma, ita preparadu ona”, hateten Lugu.
Bazeia ba análiza husi serbisu hotu ne’ebe mak durante ne’e halao hodi la hamosu konkordansia hodi asegura serbisu nee ho diak iha terenu inklui aktus dezobedensia ba rekomendasoens husi Organizasaun Mundial Saúde (OMS) no desizaun Governu konaba tempu akollimentu loron 14, iha loron 21 Abril 2020 Prezidenti Autoridade RAEOA. José Luis Guterres hasai despasu hodi termina pozisaun diretor interinu Serbisu Saúde Rejional RAEOA, Marcos Seo.
“Iha tempu ida hanesan ne’e ita presiza aten barani hodi halo desizaun hadia buat ne’ebe lalos ba interese nasional,” nia hatutan.
Prezidente Autoridade RAEOA hato’o mos agradese ba Diretór interinu sesante Serbisu Saúde Rejionál, Marcos Seo ne'ebé kontribui ona ba funsionamentu serbisu saúde iha RAEOA durante ne’e.
