NUMBEI (TOP) – Komisariu Politika Nasionál Partidu Libertasaun Popular (PLP), António Freitas garante sei hetan votu hamutuk 3000 resin iha rai-ketan Oe-Kusi Ambeno iha eleisaun parlamentar tinan ida ne’e, tanba partidu ne’e dezenvolve aan maka’as durante ne’e liu husi estabelese estrutura partidu nian husi nasionál to’o metin ona iha baze.
"PLP hahu halo konferensia iha loron hirak liuba, no ohin remata iha RAEOA, tanba ne’e orsida imi sei diskuti no hili imi nia lideransa ka koordenador PLP RAEOA nian ba periodu 2023 to'o 2027, tanba ha’u to'o importante ida mak ba eleisaun parlamentar 2023, PLP tenke hetan votu 3000 iha Oe-Kusi Ambeno,” Komisariu Politika Nasionál PLP, António Freitas hato’o kestaun ne’e liu husi nia diskursu iha konferensia daruak PLP nian iha salaun parokia Numbei, iha suku Costa, sub-rejiaun Pante Makassar, Oe-Kusi Ambeno iha loron Domingu, 05 Fevereiru 2023.
Eis dosente parte-tempu Universidade Nasionál Timor-Lorosa’e (UNTL) ne’e hatutan, PLP moris iha tinan 2015, no bainhira PLP hahu tama iha rai-ketan Ambeno ne’e iha militante itoan de’it, maibé ohin loron militante komesa barak ona mai PLP, nune’e fiar no garante katak, PLP sei hetan votu 3000 resin iha Ambeno.
"Ha’u agradese ba povu Oe-Kusi Ambeno, tanba uluk ami ema ladun barak ami Itoan de’it, maibé ohin ha’u mai fali ha’u hakfodak, tanba ema barak salaun boot ne'e ema nakonu tiha, ne'e hatudu ba partidu sira seluk katak, militante PLP iha RAEOA mós bele,” António Freitas esplika ba konferensista sira.
Durante ne’e mosu komentariu barak husi partidu politiku sira seluk dehan, PLP sei lulun biti iha eleisaun parlamentar 2023, maibé membru KPN PLP António Freitas fó esperansa ba konferensista sira katak, PLP sei la lulun biti ida, tanba PLP ne’e ninia militansia no estrutura hahu metin ona iha baze iha teritóriu nasionál, no partidu boot sira hanesan CNRT no FRETILIN sira mós sei la manan maioria absoluta iha eleisaun parlamentar ne’e.
“Ha’u hakarak hateten ba imi katak, maski partido CNRT no FRETILIN deklara ona katak, eleisaun parlamentar ne’e ida-idak sei la’o mesak, maibé sira sei la manan absoluta. Entaun, bainhira la manan maioria absoluta, ha’u fiar katak, partidu se de’it sei halo adulteiru (selingkuh) ho PLP hodi avansa ba ka’er ukun,” António esplika.
PLP mós prontu ona hodi la’o mesak de’it iha eleisaun parlamentar maske iha ona plataforma intendimentu ho FRETILIN no KHUNTO, maibé depois eleisaun remata PLP sempre fiar no prontu atu halo koaligasaun ho partidu se de’it.
“Tanba PLP fiar katak, sei la iha partidu ida manan maioria absoluta iha eleisaun parlamentar tinan ida ne’e,” Komisariu António garante.
"Ha’u hakarak husu ba militante no simpatizante sira iha RAEOA, iha vila no foho ha’u lakohi ko’alia kona-ba programa iha ne'e tanba, seidauk halo kampaña maibé, hateten de’it ba imi hahu husi rai Lospalos to'o rai-ketan Oe-Kusi Ambeno, PLP uluk la hanesan ho agora tanba, partido boot balun ko’alia no akuza katak PLP atu lulun biti ona, maibé PLP kuandu lulun biti ne'e Timor-Leste ulun moras hotu."
Komisariu António Freitas mós lamenta ho lala’ok ukun Arsenio Paixão Bano nian iha RAEOA ne’ebé tuir loloos involve mós ema PLP barak iha administrasaun RAEOA nian, maibé FRETILIN mak domina iha RAEOA, no PLP sai tiha fali hanesan anak tiri.
"Tempu to'o ona ba PLP atu ka’er ukun, ha’u lakohi akontese tan foin lalais ne'e ita hamutuk ho PLP, KHUNTO, no FRETILIN ka’er tiha ukun, maibé ema ida de’it mak sai Sekretariu Rejiaun, tanba kuandu eleisaun Parlamentar 2023, kuando atu halo koligasaun tenki iha komprimisiu ida, nune'e militante PLP iha Oe-Kusi Ambeno nia ema sira tenki tama serbisu barak," nia esplika.
Hafoin konferensia ne’e, The Oe-Kusi Post (TOP) asiste kedas mosu dezintendimentu entre militante sira kona-ba fahe osan ne’ebé laiha balansu, no militante balun mós lakonsege hetan hahan.
