Karta Redasaun Neon Metin, Jornalista Oki Bosok Publik

Dala uluk hakarak hatete katak saida mak Raimundus Oki hosi The Oecusse Post fahe iha media sosial kona ba Neon Metin ne’e LA LOS no BOSOK.

Neon Metin nia video "Lian Sasin Hosi Topu Honis" ne’e los no bazeia ba faktu. Neon Metin halo tuir prosedur sira jurnalistik nian no hetan konsentementu hosi vitima hodi grava no publika video ne’ebe Neon Metin fo sai. Neon Metin iha komitmentu katak justisa tenke justu duni ba vitima sira iha Topu Honis, no Oki Post la gosta ida ne’e.

Oki Post uza InVID plugin/addons ba browser internet nian no InVID nia serbisu laos atu deteta konteiudu publikasaun video nian. InVID nia metodu operasaun neé kompara video neébe atu verifika neé ho video seluk nebe disponivel iha InVID nia database browser internet, verifika fatin no data akontesimentu, depois maka hatete se video neé pertense duni ka kona-duni ba notisia neé ka lae.

La iha dalan ba InVID hodi hatete video Neon Metin nia original ka lae, no la iha petunjuk ruma iha InVID laran mak bele lori utilizador sira to’o iha konkluzaun katak video ida original ka la original.

Video Neon Metin nian upload iha Youtube, laos iha InVID. Neon Metin la hetan notifikasaun ruma hosi Youtube kona ba video ne’ebe Neon Metin upload.

Neon Metin iha pesoal IT mak familiar ho software InVID nian no hatene ho didiak katak InVID la iha kapasidade atu to’o ba konkluzaun hanesan Raimundus Oki Post fo sai.

Pesoal IT Neon Metin nian haree iha metadata, iha segmen ida naran IOD (Initial Object Descriptor ne’e hatete FALSE. Ida ne’e esplika katak wainhira InVID check video ne'e, InVID hare'e uluk informasaun inisial ne'ebe bele uza atu deskreve video ne'e. InVID la hetan, nia hatete 'false'. Nune'e mos, wainhira InVID lao ba too parte kona-ba Licence, nia check se materia ne'e atu uza hikas ka kopi fali ne'e presiza lisensa ka lae. Iha ne'eba hatete la presiza, maka nia hatete Licenced Content = False. Rua ne’e hotu laos fo konkluzaun katak video Neon Metin nian ne’e falsu.

IOD ho Licenced Content, so deskreve deit informasaun metadata ne'ebe InVID hetan iha file video ne'e. Sira ne'e laos kona-ba los ka falsu. Primeiru, IOD: pessoal IT Neon Metin nian la inklui duni IOD, tamba iha nesesidade atu manten konfidensialidade identidade vitima ne'ebe halo entrevista. Kona-ba Lisencing, ne'e mos, Neon Metin la rekere Licencing atu repost video ne'e. Tamba ne'e maka rua ne'e hotu ninia informasaun ne'e hatete 'false'.

Saida maka InVID bele halo, nia check se video ne'e publika uluk ona iha relasaun ho notisia seluk, maka nia konklui katak publikasaun ida ikus ne'e, ho titulu seluk no kona-ba buat seluk, ne'e maka falsu. Exemplu, ahi han uma iha rai ida iha tinan 2018, depois ema uza video husi 2018 ne'e atu halo notisia falsu katak autor ida sunu uma, iha tinan 2021, InVID sei hatete katak video ne'e pertense ba akontesimentu ahi han uma iha 2018, no laos iha 2021. Maka ema konklui katak video no notisia 2021 ho titulu ema sunu uma ne'e falso ka hoax. Atu check ida nee ne'e maka InVID fera video ne'e ba frame lubuk ida, depois nia check iha internet se frame ida ne'e mosu ona iha publikasaun ruma uluk ka lae? Ne’e tanba InVID serbisu ho database mak nia iha database hosi browser sira. Tamba ne'e, se video ne'e falsu, se oki check liu husi InVID, nia tenki hatudu video ne'e mai husi ne'ebe.

Neon Metin konsidera saida mak Raimundus Oki halo ne’e black campaign maibe ho kualidade infantil nian. IT Neon Metin prontu atu ajuda Raimundus Oki atu komprende diak liu tan buat tekniku relasiona ho IT, atu iha loron seluk lalika hakerek arbiru no fahe informasaun arbiru, informasaun falsu, no informasaun bosok.

Redasaun The Oe-Kusi Post (TOP) públika tan karta ne'e hodi públiku tomak bele asesu, tanba karta ne'e refere ba video ne'ebé TOP públika iha kanal YouTube.

Karta husi redasaun NEON METIN bele mós asesu iha ne'e: Karta Redasaun Neon Metin, Jornalista Oki Bosok Publik

  

The Oekusi Post
Author: The Oekusi PostWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
www.OeKusiPost.com nu’udar plataforma media online iha Oe-Kusi Ambeno, Timor-Leste ne’ebé aprezenta notísia iha área oioin iha teritóriu nasionál. Rua. Numbei, Oe-Kusi Ambeno Mobile: +670 7723 4114 Email: info (at) OeKusiPost.com

PUBLISIDADE

Online Counter