DILI (TOP) – Governu liu husi Ministra Saúde (MS) Odete Maria Freitas Belo hamutuk ho nia Vise-Ministru Saúde (VMS) Sr. Bonifácio Mau Coli dos Reis deklara ona susesu prevene atu hamate povu povu ka lori povu ba moras todan Covid-19 iha Timor-Leste.
Tuir Komunikadu Imprensa ne’ebé The Oe-Kusi Post (TOP) asesu iha Pájina Ofisial Ministériu Saúde “Palácio das Cinzas” katak Timor-Leste simu ona vasina Covid-19 ne’ebé apoiu husi UNICEF iha loron hirak liuba.
Ministra Odete esplika, prosesu simu vasina ne’e lahetan partisipasaun husi Primeiru-Ministru, Taur Matan Ruak, tanba okupadu ho serbisu importante seluk ligadu ba inundasaun ne’ebé akontese iha loron hirak liu-ba.
Governante mai husi partidu FRETILIN ne’e esplika, la'ós fasil atu lori vasina ne’e mai Timor-Leste, maibé ho ema barak nia suporta, no liuhusi atividade lubuk ida maka ikus mai vasina ne’e to’o ona iha rai-laran.
"Iha parte ida ita luta hasoru Covid-19, ha'u hatene katak ita susesu ita susesu tebtebes ho ita-boot sira-nia serbisu, ita-boot sira hatudu katak Timor-Leste ita susesu iha prevensaun atu hamate ita-nia Povu ou lori ita-nia povu ba moras todan Covid-19 nian", hatete Ministra Odete liu husi Komunikadu ba Imprensa ne’ebé fó sai iha Pájina Ofisial Palácio das Cinzas Segunda 05 Abril 2021.
"Iha parte seluk ha'u-mós hakarak atu dehan bainhira ita luta kontra Covid-19 iha tempu hanesan ita-mós aranja no hakarak atu lori vasina mai iha ita-nia rai no ida-ne'e akontese duni, ohin ita simu hamutuk no ita halo termu de entrega ida ba vasina Covid-19 nian husi ita-nia ajénsia OMS nomós Unicef ne'ebé entrega ba Ministériu Saúde (MdS) la signifika katak sira nain rua mesak mak halo esforsu ida-ne'e maibé tu'ur hamutuk ho ita-nia parseiru duadór sira hotu hodi halo vasina ne'e bele to'o iha ita-nia rai."
Ita mós sei infrenta nafatin problema ida seluk mak halo nu'usa ita bele konvense ita-nia komunidade muda ita-nia komunidade nia atetude sira atu bele simu vasina no ha'u hakarak atu hatete iha ne'e katak PM ohin la marka prezensa iha ne'e maibé ohin iha konsellu interministérial ba dezastre natureza nian informa katak PM Mak sai hanesan primeiru homen ou ema dahuluk ne'ebé mak atu simu vasina iha Timor-Leste.
"Atu hatudu katak vasina ida-ne'e seguru, vasina ida-ne'e kualidade nomós vasina ida-ne'e nia efikasia ne'e di’ak, i ita hili vasina ida-ne'e mak di’ak ba iha ita-nia rai no ita la hili buat ne'ebé mak aat ba ita-nia rai.”
Partisípa iha serimonia mak Ministra Negósiu Estranjeiru no Kooperasaun Sra. Adaljiza Magno, Ekipa OMS/WHO-TL, Ekipa Unicef, ekipa Gabi, korpu diplomátiku sira, NITAG, Ekipa husi Ministériu Transporte no Komunikasaun Sosiál, Diretór Jerál no Ezekutivu sira Husi MdS, no seluk-seluk tan.
