DILI (TOP) – Matebian Armindo Borges durante ne’e sofre moras stroke hemoragic, no kareta ambulansia foin transporta nia husi nia hela fatin iha Kampung Merdeka, Komoro, Dili atu ba konsulta moras ne’e iha Hospital Nasionál Guido Valadares (HNGV) iha Bidau, Toko Baru, Dili.
Tuir informasaun ne’ebé The Oe-Kusi Post (TOP) asesu husi parte HNGV katak, pasiente ne’ebé sofre moras stroke hemoragic ne’e to’o ba HNGV iha loron Domingu 11 Abril 2021, no tama ba sala emerjensia nian iha oras tuku 7 kalan. No, nia husi munisipiu Ermera, maibé durante ne'e hela iha Kampung Merdeka, Komoro, Dili.
“Ema ne’e mai ho moras stroke todan, entaun tuir loloos tenke atende uluk lai nia moras stroke ne’e di’ak itoan maka bele lori ba halo swab, maibé saida maka akontese ne’e oin seluk fali. Ita nia médiku sira imediata foti pasiente ne’e ba halo swab kedas no rezultadu dehan “positivu Covid-19”, nune’e, sira lori kedas ema ne’e atu ba Vera Cruz maka kala mate iha dalan klaran de’it,” hateten fonte ida husi HNGV ba TOP Domingu kalan 11 Abril 2021.
“Se atende uluk maka nia moras stroke ne’e karik bele salva ema ne’e, maibé koitadu agora buat hotu liu ona,” esplika fonte ne’e.
Ekipa ambulansia sira atu evakua hela matebian Armindo Borges ne'ebé sei dada iis hela husi HNGV ba Vera Cruz, maibé nia iis kotu iha dalan klara de'it, molok to'o Vera Cruz. Foto Supplied.
Entretantu, informasaun seluk husi parte ambulansia nian katak, konsege lori duni pasiente ne’e tama to’o Vera Cruz, maibé la to’o oras ida pasiente ne’e iis kotu ona.
“Pasiente ne’e positivu duni maka tama Vera Cruz la to’o oras ida mate,” esplika fonte ida ba TOP, Domingu 11 Abril 2021.
Maibé informasaun husi fonte ida husi HNGV katak ema ne'e moras stroke todan maka lori mai HNGV hodi halo tratamentu, la'os moras Covid-19, no la'os mate tanba moras Covid-19.
KLARIFIKASAUN:
Mosu modifikasaun ba fatin iha konteudu notisia ne'e. Konteudu dahuluk temi munisipiu Ermera. Ne'e laloos. Ida loos maka matebian ne'e hela iha Kampung Merdeka, Komoro, Dili. Ba sala ne'e redasaun hadia tiha ona, no husu deskulpa ba le'e nain sira hotu.
Redasaun TOP.
Author: The Oekusi PostWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
www.OeKusiPost.com nu’udar plataforma media online iha Oe-Kusi Ambeno, Timor-Leste ne’ebé aprezenta notísia iha área oioin iha teritóriu nasionál.
Rua. Numbei, Oe-Kusi Ambeno
Mobile: +670 7723 4114
Email: info (at) OeKusiPost.com
