Rezultadu swab dekreta ema nain 50 resin positivu Covid-19, maibé komunidade Kaikoli laiha ida maka moras todan

DILI (TOP) – Politika implementasaun teste swab masal obrigatóriu ne’ebé desidi husi governu hahu implementa ona iha suku Kaikoli, munisipiu Dili semana kotuk.

Xefe Suku Kaikoli, Hipolito M. Sarmento hateten, iha loron 6 Maiu liuba, nia hamutuk ho nia komunidade sira ho ekipa saúde husi SIJK halo enkontru kona-ba atu impelementa swab masal obrigatóriu ba nia komunidade sira iha suku laran. Husi enkontru ne’e, Xefe Suku konsege mobiliza nia komunidade sira hamutuk ema nain 367 maka kumpri swab masal iha loron 7 Maiu 2021.

Nia konta, hafoin teste swab masal obrigatóriu ne’e, iha loron Domingu liuba, sira rona rezultadu teste swab masal ne’e katak, nia komunidade sira hamutuk ema nain 14 maka positivu sofre positivu Covid-19. Depois liu tiha oras balun nia laran, iha lorokraik fali aumenta tan 3. Entaun, 17 pessoas iha tempu ne’eba.

Segunda 10 Maiu 2021, nia rona fali aumenta tan ema nain 33 maka positivu. Xefe Suku ho nia komunidade sira koopera maka lori ona sira balun ba tau iha kuarentena Tasi-Tolu, balun iha Fatuhada, no balun izola aan iha uma rasik.

“Ohin dadersan, ha’u rona tan telefone mai husi saúde katak aumenta tan 21 pessoas. Ne’e ha’u nia komunidade lakohi simu ona. Tebes ka la’e? Keta Kaikoli ba barak ne’e hodi fali Kaikoli taka-kuak. Ami simu di’ak, maibé tenke fó buat ne’ebé di’ak. Ami simu di’ak, tanba ami hakarak koopera. Ha’u nia komunidade koopera. Se ida ne’e maka laloos, ami iha 367 iha suku Kaikoli ba swab, di’ak liu ha’u lori sira maka ba hotu de’it para atu labele da’et ema seluk tan,” hatete Xefe Sulu Hipolito ba The Oe-Kusi Post (TOP) iha sede suku Kaikoli, Dili Tersa 11 Maiu 2021.

Nia hatutan, nia komunidade sira la simu rezultadu teste swab ne’e, tanba rezultadu swab ne’ebé fó sai iha loron Tersa 11 Maiu 2021 iha ema nain 21 maka positivu tan.

“La simu tanba ohin hetan tan 21 ne’e. Liu tiha ona loron 5 mós sira seidauk mai foti sira hodi lori ba kuarentena. Ne’e laloos ona,” Xefe Sulu lamenta.

Nia dehan, tuir loloos kuandu rezultadu teste swab ne’e maka hatudu ema ida positivu ona, tenke foti kedas ba fatin izolamentu ka kuarentena hodi Evita labele da’et ba ema seluk iha suku Kaikoli nia laran.

The Oekusi Post
Author: The Oekusi PostWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
www.OeKusiPost.com nu’udar plataforma media online iha Oe-Kusi Ambeno, Timor-Leste ne’ebé aprezenta notísia iha área oioin iha teritóriu nasionál. Rua. Numbei, Oe-Kusi Ambeno Mobile: +670 7723 4114 Email: info (at) OeKusiPost.com

PUBLISIDADE