Vasina Covid-19 hamutuk doses 24.000 to’o ona TL

COVAX to'o ona Timor-Leste. Credit: Media Uniaun Europria em Timor-Leste.

DILI (TOP) – Ai-moruk ba moras virus corona (Covid-19) hamutuk doses 24.000 to’o ona iha Timor-Leste iha loron Segunda 05 Abril 2021.

Vasina ba moras Covid-19 ne’e simu direitamente husi governu liu husi Ministra Saúde, Odete Maria Freitas Belo ho korpu diplomátiku sira hanesan embaixador Estadus Unidus Amérika (EUA) ba Timor-Leste, Blackstone ho nia diretor misaun USAID, Jim Wright no Embaixador Uniaun Europeia.

"Ha’u orgullu katak Estadus Unidus mak kontribuente prinsipal hodi responde ba pandemia global Covid-19 no komunidade internasional hamutuk hodi kombate Covid-19," Embaixador Blackstone hateten liu husi pájina ofisial Embaixada Estadus Unidus Amerika nian ne’ebé The Oe-Kusi Post (TOP) asesu.

Vasina ida ne'e bele to'o mai, tanba liu husi COVAX Advance Market Commitment, inisiativa global ida atu apoia assesu justu ba vasina Covid-19. Estadus Unidus anunsia ona apoiu inisial billaun $2 husi total komitmentu billaun $4 ba COVAX Advance Market Commitment ne'ebe sei apoia distribuisaun vasina ba nasaun liu 90 inklui Timor-Leste.

Ida ne'e parte ida husi apoiu tinan naruk Estadus Unidus nian ba Timor-Leste nia sistema kuidadu saúde. Estadus Unidus serbisu hamutuk nanis kedas wanhira pandemia ne'e hahu no kontribui ona millaun $1.6 resin hodi responde Covid-19 iha Timor-Leste, montante ketak ida husi EUA nia apoiu ba COVAX.

Entretantu, Embaixadór Uniaun Europeia, Andrew Jacobs, dehan “ha'u sente haksolok tebes tanba ohin loron ita iha ona fornesimentu dahuluk ba vasina COVAX nian mai Dili, Timor-Leste. COVAX Facility ne'e hanesan ilustrasaun di'ak ida kona-ba solidariedade globál. Ne'e mak hahalok multilaterál loloos. Uniaun Europeia orgullu hamutuk ho Governu Timor-Leste, OMS, UNICEF, no mós kontribuinte sira seluk hodi halo ida ne'e akontese. Ha'u fó omenajen ba pesoál saúde liña frente no ba sira hotu ne'ebé serbisu maka'as iha Timor-Leste ne'ebé serbisu maka'as iha luta hasoru COVID-19. Ekipa Europeia sei hamriik nafatin husi povu Timor-Leste”.

Kordenadór Forsa-Tarefa ba Prevensaun no Mitigasaun Surtu Covid-19 iha Timor-Leste (CIGC-SS), Rui Maria de Araújo fó númeru moras Covid-19 iha Timor-Leste iha loron Segunda 05 Abril 2021 katak, iha munisipiu Dili, iha loron 4-5 Abril deteta kazu foun hamutuk 52. Nune’e, kazu detetadu ka pozitivu iha munisipiu Dili husi dia 7 Marsu 2021, to’o loron 5 Abril 2021, hamutuk hotu 615.

Nia dehan, ho baze ba informasaun ne’ebé ekipa konjunta saúde nian rekolle, sei halo revizaun ba lista foku/cluster kazu pozitivu iha Dili, no sei publika iha loron hirak tuir mai.
Aproveita mós informa ba públiku katak, husi kazu foun 52 ne’e, iha mós kazu 1 husi Ataúro. Kazu ida ne’e kontaktu-besik ho sira husi Ataúro ne’ebé anunsía ona loron hirak liu bá.

The Oekusi Post
Author: The Oekusi PostWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
www.OeKusiPost.com nu’udar plataforma media online iha Oe-Kusi Ambeno, Timor-Leste ne’ebé aprezenta notísia iha área oioin iha teritóriu nasionál. Rua. Numbei, Oe-Kusi Ambeno Mobile: +670 7723 4114 Email: info (at) OeKusiPost.com

PUBLISIDADE