DILI (TOP) – Komunikadu ba Imprensa husi embaixada Repúblika Indonézia iha Timor-Leste rejeita no klarifika notisia ajensia notisia Timor-Leste (TATOLI) iha edisaun 20 Janeiru 2021 ho titulu Diplomata ida hosi Indonézia pozitivu COVID-19 ne’e hamosu konfujaun, tanba sidadaun Indonézia ne’e nu’udar funsionariu administrasaun (la’os diplomata), maibé tuir informasaun balun ne’ebé The Oe-Kusi Post (TOP) asesu, sidadaun Indonézia ne’e tama mai Timor-Leste ho pasaporte diplomata, la’os ho pasaporte baibain no hetan mós karta autorizasaun husi embaixador Repúblika Indonézia ba Timor-Leste Sahat Sitorus.
https://web.facebook.com/IndonesianEmbassyDili/posts/3628417720583752
Maske nune’e, Komunikadu Imprensa embaixada RI ne’ebé TOP asesu iha pájina ofisial Indonesian Embassy Dili / KBRI Dili katak, funsionariu administrasaun ne’e hala’o auto-kuarentena iha Hotel Beach Garden husi loron 6 to’o 20 Janeiru 2021 tuir protokolu Ministériu Saúde Timor-Leste nian.
“Ho respeitu hato’o konfirmasaun katak ida sofre moras Covid-19 ne’e la’os diplomata Indonézia. Ema ne’e funsionariu admnistrasaun non-diplomata iha embaixada Repúblika Indonézia ne’ebé foin fila husi lisensa annual husi Indonézia,” esplika Komunikadu Imprensa embaixada Indonézia ho númeru 01/SP/PEN/i/2021 ne’ebé fó sai iha loron Kinta 21 Janeiru 2020.
Maibé tuir informasaun balun ne’ebé TOP asesu, sidadaun Indonézia ne’e tama mai Timor-Leste ho pasaporte diplomata, la’os ho pasaporte nu’udar sidadaun baibain no hetan mós karta autorizasaun husi embaixador Repúblika Indonézia ba Timor-Leste Sahat Sitorus.
“Ema ne’e tama mai ho pasaporte diplomata, la’os ho pasaporte baibain,” esplika fontes TOP nian husi parte pilar hitu Covid-19 Ministériu Saúde Timor-Leste nian.
“Ho pasaporte diplomata ne’e maka ami tau ba diplomata,” fontes ne’e afirma.
Notisia hanesan mós mosu iha media on line Grupo Media Nacional (www.gmntv.tl) ho titulu Sidadaun Indonezia ida pozitivu Covid-19, maibé iha parte sitasaun direita katak sidadaun Indonézia ne’e nu’udar diplomata ida.
Se maka diplomata? Tuir definisaun simples katak ema ida ne’ebé hili husi nia Estadu ka husi instituisaun intergovernmental hanesan ONU ka Uniaun Europeia hodi hala’o serbisu diplomasia ba nasaun seluk. Ho lia-fuan seluk, reprezentasaun nasaun ida ba nasaun seluk. No ema sira ne’ebé serbisu iha área administrasaun ne’e funsionáriu baibain, la’os diplomata, maibé sira mós bele iha no uja pasaporte diplomata. Kargu ka pozisaun maka halo sira diferente entre diplomata ho funsionáriu embaixada sira.
