DILI (TOP) – Bispo Diocese Baukau, Dom Basilio do Nascimento hakotu ona iis ikus nian iha Hospital Nasionál Guido Valadares (HNGV) hafoin hetan atakasaun iha Zumalai, Kovalima.
Tuir informasaun ne’ebé The Oe-Kusi Post (TOP) asesu, Dom Basilio ba tuir seremonia ordenasaun saserdotal ba Nai-Lulik balun iha Postu Administrativu Zumalai, munisipiu Kovalima iha loron hirak liuba, no hetan atakasaun iha loron Sábadu 30 Outubru 2021 dadersan hodi lori ba halo tratamentu iha HNGV, maibé pessoal saúde sira lakonsege salva nia, tanba forsa mate nian forsa liu forsa salvasaun nian.
Bispo Dom Basilio nia iis ikus nian kotu iha HNGV iha oras tuku 12 resin, Sábadu 30 Outubru 2021.
Mate nu’udar realidade moris ne’ebé ema hotu-hotu sei hasoru iha mundu rai-klaran, se de’it sei hasoru mistériu mate ne’e. Laiha ema ida maka sei la mate, ita hotu sei mate hotu tuir planu Maromak nian.
Mistériu mate lori tristeza boot ida ba familia, maun-alin, liliu ba familia uma laran rasik basa sei la hetan malu ona, maibé Jesus Cristo rasik hateten ona, Nia maka moris nia-hun, no se maka fiar ba Nia, nia sei moris nafatin maske mate tiha ona, no ema moris sira ne’ebé maka fiar ba Nia, sei la mate (João 11:25-26).
“A morte do crente cristão significa compartilhar a morte de Cristo. Morremos em Cristo. A morte como o salário do pecado se tornou uma bênção, porque morremos em Cristo. O apóstolo Paulo fez esta observação aos filipenses: "Para mim, o viver é Cristo, e o morrer é lucro" (Fp 1:21)”.
Sarani tomak iha Timor-Leste liliu sarani sira iha área Diocese Baukau ohin loron lutu metan, tanba lakon Dom Basilio nu’udar sira nia bibi-atan ida ne’ebé servi sira durante tinan barak nia laran.
