Hilaria de Jesus mate ona hafoin simu AstraZeneca

DILI (TOP) – Feto-faluk ida ho naran Hilaria de Jesus ho tinan 73 mate tiha ona hafoin simu vasina AstraZeneca iha aldeia Olo-Olo, suku Lour, postu-administrativu Bobonaro, munisipiu Bobonaro.

Xefe Suku Lour Paulino Lopes Gomes hatete, ohin akontese atividade vasina iha nia suku iha aldeia Olo-Olo. Atividade vasina ne’e iha ema hamutuk nain 48 maka simu vasina AstraZeneca inklui matebian Hilaria de Jesus.

Nia hatutan, matebian Hilaria de Jesus hafoin simu vasina Covid-19 AstraZeneca ne’e, médiku sira husu Hilaria tuur deskansa durante minutu 30 nia laran.

“Depois nia fila ba uma la kleur mosu reasaun ran sai husi nia inus-ibun, no iis kotu iha oras tuku 2:42 ohin,” Xefe suku Lour Paulino Lopes Gomes hateten via kontaktu telemovel ba The Oe-Kusi Post (TOP), Kuarta 30 Juñu 2021.

Nia hatutan, atividade vasina ne’ebé akontese iha nia suku ne’e akompaña husi parte polisia no pessoal sira husi Sentru Jestaun Krize munisipal.

“Ofisial Polisia Suku kontaktu ona polisia ho sira husi sentru jestaun krize hodi mai hare mate-isin ne’e,” afirma xefe suku Lour ne’e.

Nia hatutan, matebian Hilaria mate husik hela nia oan sira hamutuk nain 6.

Familia sira taka ona tais ba Hilaria nia isin mate iha aldeia Olo-Olo, suku Lour, postu-administrativu Bobonaro, munisipiu Bobonaro iha loron Kuarta 30 Juñu 2021.

Antes ne’e, deputada Virginia Ana Belo husi bankada (Congresso Nacional de Reconstrução de Timor (CNRT) konsidera governu liu husi Ministériu Saúde ho nia parseiru sira atraza tebes hodi halo sosializasaun ba povu kona-ba vasina Covid-19 AstraZeneca, tanba tuir deputada ne’e katak vasina ne’e iha nia impaktu negativu mós ba sidadaun sira ne’ebé foin simu.

Deputada Virginia ko’alia kona-ba impaktu husi maluk sira ne’ebé maka foin simu vasina, CNRT lakohi taka matan ba ida ne’e.

“Iha duni impaktu balun sasan sira ne’e podia ser Ministeriu relevante esplika ba públiku antes sira halo atividade sira hanesan ne’e, antes obriga populasaun sira simu vasina,” deputada Virginia hato’o kestaun ne’e iha plenaria Parlamentu Nasionál, Segunda 28 Juñu 2021.

Depois iha impaktu sira hanesan ne’e, iha duni impaktu ba sira ne’ebé maka simu vasina iha terenu. Ministra Saúde defaktu rasik foin maka ko’alia más kuandu hahu mai iha Parlamentu Nasionál katak hotu-hotu tenke simu vasina ida ne’e,” deputada Virginia lamenta.

Nia hatutan, agora sai problema, problema ne’e sai pior liu kuandu Ministru Prezidensia Konsellu Ministru nia hatete konfuzaun ne’e,  tanba nia dehan simu vasina maka mate bele hetan osan dolar amerikanu rihun 10.

“Que pena membru governu ida rekoñese fali vida povu ninian ho montante $10 mill saida maka governu hanoin sé o ba fo $10 mill depois nia mate sé maka goza osan ho montante $ 10 mill ida ne’e,” nia husu.

Nia dehan, nusa maka osan sira ne’e la buka took meius seluk ida , fó took alternativu seluk ida ba povu sira ho oferese ba vasina oi-oin para depois povu bele iha diretu eskolla la’os dehan fali situasaun ida ne’e maka foin hasai fali deklarasaun ida katak kuandu ema mate governu sei fó rihun $10.

“Ha’u hanoin povu la husu osan 10 mill ida, povu husu ba ita boot sira, sei ita boot sira hakarak atu proteze populasaun sira husi moras Covid-19 ne’e sira presiza vasina ho direitu hodi eskolla tau vasina oi-oin iha ne’e para sira bele eskolla hodi povu bele hakarak hili ida ne’ebé?".

“Tanba ida ne’e, maka ami kestiona ne’e ha’u hanoin bankada CNRT hahu kedas ami hatete buka vasina ida ne’ebé ke bele fo vasina ida ne’ebé ba ema hotu-hotu sé ida ne’e ita simu deit. Ita laiha osan ka hodi simu deit. Ita iha osan, osan aprova iha Parlmantu Nasional ne’e aprova fundu Covid-19 ne’e iha tanba saida maka ita boot sira la halo hanesan ne’e hodi fó direitu ba sira hodi eskolla saida maka hili tuir sira hakarak”.

Hatan ba preokupasaun ne’e, Ministru ba Assuntu Parlamentar no komunikasaun Sosial (MAPKOMS) Francisco Martins da Costa Pereira Jerónimo hateten kona-ba vasina desde primeiru mai iha Parlamentu Nasional koalia kona-ba 20% no 80 %. vasina Covax maka atinji 20% ba alvu 60 anos ba leten sira ne’ebé maka iha liña Frente.

“Ha’u hanoin saida maka Minstra Saúde esplika ne’e tuir situasaun ne’e, 80% tuir fali mai ita atu distina ba populasaun sira ne’ebé maka seidauk hetan primeiru sira ne’ebé maka hetan moras no sira ne’ebé maka iha liña Frente. Vasina primeiru ita la’o tanba ida ne’e mai husi Covax 20% ninia politika la’o nafatin hanesan ne’e,” nia dehan.

Governante ne’e dehan, la taka dalan ba populsaun sira ne’ebé maka menus husi idade 60 la taka dalan husi parte primeiru. Parte Minsiteriu saude no Organizasaun Mudial Saúde sira esplika ba iha deputadu sira. No ikus mai sinovax ba estudante sira iha Timor-Leste maibé la taka dalan ba populasaun sira seluk katak sé maka atu simu la taka dalan ba sira ne’e maka politika governu nian governu komunga nafatin saida maka la’o ona ne’e.

Iha loron 22 Juñu liuba, Ministra Saúde konvoka reuniaun emerjénsia ho Reprezentante sira husi Embaixada Austrália, Organizasaun Mundial Saúde (OMS), UNICEF no Prezidente National Immunization Technical Advisory Group (NITAG), ho objetivu prinsipál atu diskute impaktu husi notísia ida-ne'e ba kampaña vasinasaun iha Timor-Leste no buka meiu atu fó esklaresimentu konjuntu ba populasaun tomak.

Haree ba Vasina AstraZeneca (AZ) ne'ebé fornese ona doze millaun 500 ba nasaun hamutuk 165 iha mundu, inklui nasaun hamutuk 100 liuhusi Mekanizmu COVAX, no haree ba evidénsia sientífika ne’ebé revela katak Vasina AstraZeneca (AZ) doze da-1 iha efikásia média 71% (51-83) no Doze da-2 92% (75-97) efetivu, Timor-Leste kontinua sente konfiante no seguru kona-ba desizaun atu administra AstraZeneca ba populasaun ho idade tinan 18 ba leten, tuir rekomendasaun husi peritu sira husi OMS. Aleinde ne'e, data husi Reinu Unidu (UK) hatudu katak AstraZeneca (AZ) iha efetividade hanesan ho Vasina Pfizer hasoru Variante foun Delta husi Índia.

OMS rekomenda katak "ba nasaun sira ne'ebé iha tranzmisaun COVID-19, benefísiu husi vasina sei proteje hasoru COVID-19 no importante atu labele hetan risku. Maibé konxiente katak nasaun idak-idak tenke konsidera situasaun nivel risku epidemiolojia ba ema indivíduu no populasaun, disponibilidade vasina nian ho alternativa vasina ne'ebé sai opsaun ba risku mitigasaun".

Ipóteze ba ema ne'ebé lakon vida husi "Blood Clotting" <1 (menus husi 1) ou la iha ne'e bazeia ba índise Fatalidade iha Austrália 1 husi iha kazu "Blood Clotting" 60. Bazeia ba análize husi NITAG no OMS, iha Timor-Leste, estimativa risku ema ho reasaun adversa grave ka kazu thromboembolic tanba hetan vasina AstraZeneca limitadu tebetebes (karik 21.3 husi populasaun millaun 1.3) no risku ba mate <1 (menus husi 1).

Populasaun Timor-Leste hamutuk 143.502 mak simu ona vasina AstraZeneca, no to'o agora ita rejista kazu 21 iha ne’ebé Ema hetan Reasaun Adverse depoizde simu vasina AstraZeneca maibé maioria kaman, la grave. Ikus mai, Timor-Leste iha ai-moruk no espesialista ne'ebé treinadu atu jere kazu thromboembolic, no hahú iha loron 27 fulan-maiu 2021, kazu COVID-19 hatudu redusaun signifikativu loron ba loron tanba 45% resin husi populasaun Munisípiu Dili nian maka simu ona Doze dahuluk Vasina nian.

Tanba ne'e, Ministériu Saúde, hamutuk ho parseiru sira hanesan OMS, UNICEF, Embaixada Austrália no NITAG, rekoñese katak sistema nasionál farmakovijilánsia tenke haforsa akompañamentu ba kampaña vasinasaun, ekipa vasinadór no profisionál saúde nian sira iha fasilidade saúde nian hotu-hotu tenke hasai nivel alerta hodi deteta no notifika lalais bainhira suspeita reasaun adversa tanba vasina ka eventu tromboembóliku ruma.

Se karik situasaun iha rai laran sofre mudansa ruma relasiona ho vasina AstraZeneca, Ministériu Saúde bele revee fila-fali rekomendasaun téknika hamutuk ho peritu sira hodi halo rekomendasaun foun ne'ebé bele proteje di’ak liután Timoroan sira no Saúde Publika iha Timor-Leste.

Faktu hatudu, vasina AstraZeneva ne’e hamate ona ferik ida ho tinan 73 hafoin simu vasina ne’e iha aldeia Olo-Olo, suku Lour, postu-administrativu Bobonaro, munisipiu Bobonaro iha loron Kuarta 30 Juñu 2021 oras tuku 2:42.

Governu mós antes ne’e aprova ona kompensasaun ba sidadaun sira ne’ebé hetan efeitu negativu hafoin simu vasina AstraZeneca. Kompensasaun ne’e katak, se maka hetan efeitu mate hafoin vasina sei hetan osan hamutuk rihun 10 dolar amerikanu.

Maske atu kompensa ho osan boot mós sei la hamoris ema ida husi mate, no osan ne’e familia matebian sira maka sei goja. Ida mate ne’e mate saugati de’it.

 

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE

Online Counter