DILI (TOP) – Governu hato’o tiha ona pedidu ba Prezidente Repúblika (PR), Francisco Guterres Lú Olo atu hanaruk Estadu Emerjensia (EE) ba loron 30 tan ne’ebé sei hahu husi oras tuku 00.00 iha loron 3 Abril 2021 no sei remata iha oras tuku 23.59, loron 2 Maiu 2021.
Tuir Komunikadu ba Imprensa ne’ebé The Oe-Kusi Post (TOP) asesu iha loron Segunda 29 Marsu 2021 husi pájina ofisial Palásiu Prezidensial katak, PR Lú Olo hafoin rona hanoin husi membru Konsellu Estadu no Konsellu Superior Defeza no Seguransa, hato’o ninia mensajen husu autorizasaun Parlamentu Nasionál atu deklara estensaun estadu emerjénsia tuir governu nia pedidu.
Membru Konsellu Estadu no Konsellu Superior Defeza no Seguransa rekomenda ba Prezidente Repúblika husu autorizasaun ba estensaun estadu emerjénsia tanba haree ba kazu konfirmadu iha rai-laran ne’ebé nia númeru sa’e husi loron ba loron.
“Kazu COVID-19 aumenta husi loron ba loron, membru Konsellu rua halo renovasaun estadu emerjénsia,” Asesór Prezidente Repúblika informa hafoin reuniaun orgaun konsultivu rua ne’e.
Governu husu Prezidente Repúblika atu estende estadu emerjénsia ba períodu loron tolu-nulu (30), hahú husi tuku 00.00 iha 3 abril 2021 no remata iha tuku 23.59 iha loron 2 maiu 2021. Estadu emerjénsia ba dasanuluk-resin-ida remata iha 2 abril 2021.
Tuir pedidu Governu ba estensaun estadu emerjénsia hateten katak haree ba númeru kazu iha nivel nasionál ne’ebé aumenta husi loron ba loron ejize atu reforsa kompromisu nasionál iha sentidu atu asegura país hodi mantein livre husi transmisaun komunitária husi SARS-CoV-2.
Governu iha obrigasaun atu fó protesaun ba saúde públika hodi asegura prevensaun no hamenus importasaun variante foun husi virus no nia propagasaun iha territóriu nasionál Estadu mantein vijilante no proativu hodi adopta medidas nesesárias atu evita transmisaun deskontroladu tanba haree ba kondisaun Sistema Saúde Nasionál la prontu atu hatán.
Medidas implementasaun estadu emerjénsia atu proteje saúde públika so bele hala’o bainhira suspende no limite direitu no liberdades ne’ebé garante iha Konstituisaun. Entre medidas sira ne’e mak implementa serka sanitaria no konfinamentu obrigatóriu ba area ne’ebé hetan infesaun, hanesan impoen iha munisípiu Díli, Baucau no Viqueque.
Bazeia ba dadus husi Organizasaun Mundiál Saúde (OMS), iha 23 marsu 2021, infesaun SARs-Cov-2 mundialmente rejista kazu konfirmadu hamutuk 123 216 178 (sentu i vinte i trés millions duzentus i dezasseis mil sentu i setenta e oito) no hamate ema hamutuk 2 714 517 (dois millions setesentas i catorze mil i kiñentas i dizassete) tanba COVID-19. Iha Indonézia, rejista kazu infesaun SARs-CoV-2 hamutuk 1 465 928 (um millaun kuatrusentus i sessenta i sinku mil setesentas e onze) no hamate ona 39 711 (trinta i nove mil setesentas i onze). Iha provinsia Nusa Tenggara Timur kazu konfirmadu hamutuk 12 012 no hamate ema na’in-327.
Timor-Leste rejista kazu pozitivu na’in-322 iha loron 28 marsu 2021. Desde marsu 2020 to’o horseik, iha ema na’in-491 hetan infesaun husi SARs-CoV-2, sira seluk rekuperadu no seidauk rejista ema mate.
Situasaun moras Covid-19 oras ne’e hamosu perspetiva pro-kontra entre sosiedade sira iha rai-laran, tanba faktu balun hatudu komunidade sira uja maskára la’os tanba tauk virus Covid-19, maibé kuaje maioria tauk ba autoridade seguransa sira.
