DILI (TOP) – Arão Noe de Jesus da Costa Amaral konsidera eleisaun ba xefe da turma iha eskola ida ne’e formal liu kompara ho eleisaun ba Prezidente Parlamentu Nasionál, Aniceto Guterres ne’e la formal, no hanesan loos iha merkadu, maibé nafatin hakruk ba rezultadu votu ne’ebé hala’o iha loron 19 Maiu liuba.
“Ha’u lamentavél itoan kona-bá prosesu eleisaun hanesan… mezmu ema hili ketua kelas (chefe da turma) ida iha eskola mós sei formal, sei ho dignu, mas eleisaun ba Prezidente Parlamentu Nasionál ida hanesan loos be iha merkadu, ida ne’e lamentavél, maibé prontu ita submete ba desizaun depois ita hein orgaun seluk nia kompeténsia,” hateten Arão ba jornalista sira iha bankada CNRT iha Parlamentu Nasionál, Dili Kinta 21 Maiu 2020.
Prosesu destituisaun ba Arão Noe de Jesus da Costa Amaral husi kargu Prezidente Parlamentu Nasionál hodi hili fali Aniceto Guterres ho votu afavór hamutuk 40 iha loron 19 Maiu 2020.
Iha fatin hanesan, Aniceto Guterres hateten, oras ne’e nia hahu ona hodi normaliza hikas Parlamentu Nasionál.
“Agora buat liu hotu ona, ita atu halo oinsa. Preziente iha poder tomak atu normaliza funsionamentu Parlamentu nian,” hateten Aniceto ba jornalista sira iha Parlamentu Nasionál ohin.
“Ohin ami atu halo oan konferénsia lider bankada sira, maibé antes atu halo ha’u tenke hasoru malu uluk ho vise prezidente nain-rua”.
Entretantu, hafoin eleisaun, Aniceto Guterres hateten, oras ne’e nia mak iha ona poder no lejitimidade hodi lider a Parlamentu Nasionál, tanba hetan konfiansa total ho votu afavór husi deputadu nain 40. Deputadu nain 40 ne’e mai husi bankada PLP, Khunto, FRETILIN no aumenta tan deputadu nain 4 husi Partidu Demokrátiku. Deputadu António da Conceição “Kalohan”, partidu CNRT, UDT/FM mak la tuir eleisaun.
