DILI (TOP) – Bankada CNRT, UDT/FM no deputadu António da Conceição durante ne’e kontra maka’as destituisaun ba Prezidente Parlamentu Nasionál (PPN), maibé hafoin halo destituisaun ho votu afavór 40 direitamente mós públika ona rezultadu ne'e iha Jornal Repúblika.
Jornal Repúblika ne’ebé The Oe-Kusi Post asesu, iha sumáriu ne’e kona-bá dekretu PR ho número 34/2020, Deliberasaun Parlamentu Nasionál Númeru 01/2020 kona-bá aprezentasaun kandidatura ba Prezidente Parlamentu foun hafoin destituisaun efetiva ba Prezidente Parlamentu Nasionál atual, aktu aprovasaun ajenda Númeru 01/V/2020 , akta destituisaun Númeru 02/V/2020 kona-bá destituisaun Prezidente Parlamentu Nasionál, no ikus liu mak akta eleisaun ho Númeru 03/V/2020 kona-ba eleisaun ba Prezidente Parlamentu Nasionál.
Bankada CNRT iha Parlamentu Nasionál konsidera aktu destituisaun no hili deputadu Aniceto Guterres hodi troka fali Arão Noe de Jesus da Costa Amaral nia kargu nu’udar Prezidente Parlamentu Nasionál ne’e “ilegal”.
"Ami ohin enkontru urjente hodi afirma ami nia pozisaun, tanba prosesu sira ne'ebé la'o iha PN, ne'e prosesu ilegál, prosesu ne'ebé asaltu poder nian, kontra konstituisaun, kontra rejimentu, kontra lei LOFAP ninian, ne'ebé ami hatama ona keixa ba iha Tribunal Rekursu (TR) no Ministériu Públiku (MP) depois hein desizaun husi sira ne'e," hateten vise xefe bankada CNRT, deputadu Patrocino dos Reis Fernandes ba jornalista sira iha sede partidu CNRT iha bairo Grillos, Dili Tersa 19 Maiu 2020.
Notisia relevante: CNRT: eleisaun ba Aniceto Guterres ne’e “ilegal”
Arão Noe mós akuza deputada Angelina Sarmento durante ne’e sempre halo asaun atu asaltu poder, maibé deputadu Angelina rejeita akuzasaun ne’e hodi dehan pedidu destituisaun hodi troka meja PN, no troka Arão Noe ne’e legal, la’os ilegal.
Hafoin votasaun, Aniceto Guterres hateten, oras ne’e nia mak Prezidente Parlamentu Nasionál ona, tanba eleitu husi deputadu nain 40.
“Atu prezidente rua ka tolu, ha’u mak iha lejitimidade atu … ho votu 40 ne’e, se nia hela ho votu 23 ka 24 nia sei iha lejitimidade atu sai prezidente?,” hateten Aniceto ba jornalista sira iha Parlamentu Nasionál, Dili Tersa 19 Maiu 2020.
Klarifikasaun:
The Oe-Kusi Post troka fali titulu notisia ne'e ho rajaun mosu fallansu ida. Ho fallansu ne'e redasaun hadia fali ona no husu deskulpa ba le'e nain sira.
