DILI (TOP) – Bankada CNRT iha Parlamentu Nasionál konsidera aktu destituisaun no hili deputadu Aniceto Guterres hodi troka fali Arão Noe de Jesus da Costa Amaral nia kargu nu’udar Prezidente Parlamentu Nasionál ne’e “ilegal”.
Nune'e V ise Xefe Bankada CNRT, deputadu Patroncio dos Reis Fernandes katak sira hatama ona keixa atu kontra asaun ne'ebé bankada PLP, Khunto no FRETILIN halo iha plenária Parlamentu Nasionál (PN), tanba kontra konstituisaun RDTL no rejimentu Parlamentu Nasionál.
"Ami ohin enkontru urjente hodi afirma ami nia pozisaun, tanba prosesu sira ne'ebé la'o iha PN, ne'e prosesu ilegál, prosesu ne'ebé asaltu poder nian, kontra konstituisaun, kontra rejimentu, kontra lei LOFAP ninian, ne'ebé ami hatama ona keixa ba iha Tribunal Rekursu (TR) no Ministériu Públiku (MP) depois hein desizaun husi sira ne'e," hateten deputadu Patrocino ba jornalista sira iha sede partidu CNRT iha bairo Grillos, DIli Tersa 19 Maiu 2020.
"Ohin lokraik ami hatama ona keixa ne'e liuhusi advogadu ida, advogadu ida mak ba hatama, ne'ebé hein desizaun tribunal ninian," Patrocino afirma.
Nia hatutan, Prezidente Partidu CNRT mós rona de’it enkontru sira ne’ebé hala’o iha sede partidu nian molok sira lori keixa ne’e ba iha TR no MP.
Iha keixa ne'ebé The Oe-Kusi Post (TOP) asesu, deputadu hamutuk nain 23 mak hatama ona keixa kontra deputada Angelina Sarmento ba Ministériu Públiku. 
Entretantu, deputadu sira husi bankada tolu, PLP, Khunto no FRETILIN konsege halo ona destituisaun ba meja PN ho total votu 36, maibé to'o iha votu ba troka Prezidente Parlamentu Nasionál (PPN), Arão Noe de Jesus da Costa Amaral , deputadu nain 4 husi PD mós vota afavór hodi halo votus ne'e sa'e ba 40. Deputadu Antóni o da Conceição "Kalohan", Partidu CNRT ho UDT/FM mak la vota.
Arão mós akuza deputada Angelina Sarmento durante ne’e sempre halo asaun atu asaltu poder, maibé deputadu Angelina rejeita akuzasaun ne’e hodi dehan pedidu destituisaun hodi troka meja PN, no troka Arão Noe ne’e legal, la’os ilegal.
Hafoin votasaun, Aniceto Guterres hateten, oras ne’e nia mak Prezidente Parlamentu Nasionál ona, tanba eleitu husi deputadu nain 40.
“Atu prezidente rua ka tolu, ha’u mak iha lejitimidade atu … ho votu 40 ne’e, se nia hela ho votu 23 ka 24 nia sei iha lejitimidade atu sai prezidente?,” hateten Aniceto ba jornalista sira iha Parlamentu Nasionál, Dili Tersa 19 Maiu 2020.
Deputadu nain 4 husi Partidu Demokrátiku (PD) mós tuir hotu votasaun ne’e, no deputadu António da Conceição “Kalohan” de’it mak la vota inklui deputadu sira husi CNRT, UDT/FM.
Notisia relevante. Bankada 3 “ilegalmente” hili ona Aniceto Guterres ba Prezidente Parlamentu
