DILI (TOP) — Deputadu Frente Revolusionariu Timor-Leste Independente (FRETILIN) deputadu Marito Mota husu ba governu liuhosi Ministru ba asuntu Parlamentar no Komunikasaun Sosiál (MAPKomS) Francisco Martins da Costa Pereira Jerónimo atu kontrola públikasaun media sira iha Timor Leste, liliu The Oe-Kusi Post (TOP).
“Ita akompaña katak, media sira ne’ebé halo insulta ba instabilidade nasionál. Ha’u hanoin señor Ministru iha autoridade ka la’e, media sosial hirak ne’e, tanba ohin dader ha’u kuandu le’e iha media ida, iha RAEOA hakerek katak, deskonfia Arsenio Paixão Bano orienta señor Marcos Seo hodi asaltu Xanana,”deputadu Marito Mota levanta iha sesaun plenaria Parlamentu Nasional, Dili, Tersa, 21 Setembru 2021.
“Asaltu ne’e, ha’u hanoin kedas iha Balibar ne’ebá tanba linguajen ida asaltu ne’e, maibé ha’u le’e iha laran afinal ekipa saúde sira atu ba foti Agustinho Caet ne’e, atu ba kuarentena tanba nia foin vasina dala ida. Maibé ho aproveita prezensa maun Xanana nian, media tau fali iha ne’e, asaltu maun Xanana ne’e ha’u fó atensaun ba señor Ministru presiza haree ba ida ne’e,” deputadu Mota afirma.
Iha fatin hanesan Deputadu FRETILIN Antoninho Bianco hateten, nia akompaña intervensaun sira ne’e balun ho karakter destroisaun ba unidade Estadu nian.
“Media sira agora ne’e, MAPKOMS kuidadu keta jogu livre ne’e, jogu nasaun seluk nian karik, ne’e kontra konstituisaun artigu 6. Imi bele kontra estadu apalagi agora aprveita tempu agora besik ona eleisaun, ha’u hanoin ba partidu FRETILIN ne’e, partidu ida ne’ebé maka laiha inimigu hatudu ona iha inisiu to’o agora,” nia hateten.
Nia dehan, Timor-Leste sempre ba oin, sé maka atu monu, mai hamutuk Estadu tenke ba oin ne’ebé atu halo partidu buka amigo, la’os inimigu ida ne’e maka FRETILIN hato’o unidade asaun no progressu.
Hatan ba asuntu ne’e, Ministru Asuntus Parlamentares no Komunikasaun Sosiál (MAPKomS), Francisco Martins da Costa Pereira Jerónimo katak, relasaun ba media, governu nia papel kria kondisaun halo lei, maibé lei komunikasaun sosial tuir konstituisaun ne’e kompetensia iha Parlamentu Nasionál no Parlamentu Nasionál halo tiha lei ne’e ona, oras ne’e ezekuta tuir padraun ne’ebe maka iha.
“Governu labele mai halo intervensaun ba iha serbisu media nian no media sosial sira hotu anaunser só iha lei, agora lei la hatete katak, kompetensia sira ne’e ba iha governu lei iha ne’eba mós fó dalan ba konsellu Imprensa maka sai regulador kontrolador ba media hotu iha Timor Leste,” governante ne’e esplika.
Nia hatutan, ne’e papel konsellu imprensa eleitu hosi Parlamentu Nasional, hetan tomada de pose hosi Parlamentu Nasional Conselho de Imprensa (CI) sira iha obrigasaun ba ida ne’e hodi kontrola ba media sira ne’e. Bainhira media sira ne’e hato’o informasaun balun laloos, Conselho Imprensa maka iha kna’ar ida ne’e atu halo.
Nia dehan, hanesan governu halo preparasoens de’it maibé la halo intervensaun hotu ba iha parte sira ne’e hotu, loos duni halo oinsa maka media sosial sira ne’e lao tuir dalan nia hanoin iha tempu liubá prokurador do estadu lori ona projetu ida mai aprezenta iha parlamentu nasional.
“Kona-ba krime sibernetika, ida ne’e mak fó dalan ba governu oinsa maka hodi kriminaliza ba media sira liu-liu ameasa ou halo terror ho buat ruma ne’ebé maka ita identifika katak tama iha kriminal entaun ita bele prosesa”.
“Agora ami intrega ba ita boot iha meza parlamentu nasional atu bele diskute hodi bele ami implementa lei tuir ita nia hakarak”.
