Governu hakotu serka sanitária, PNTL mantein postu vizilansia

DILI (TOP) – Governu desidi hakotu ona serka sanitária iha munisipiu Dili no seluk tan, maibé Polisia Nasionál Timor-Leste (PNTL) kontinua mantein postu vizilansia sira ne’ebé durante ne’e destaka iha pontu entrada ka fronteira entre Dili ho munisipiu seluk hodi nune'e nafatin asegura sirkulasaun transporte públiku no privadu tantu roda ha’at no rua ne'ebe hala'o viazen ba mai.

"Nafatin mantein postu iha pontu entrada ka fronteira sira, ita (polisia) nia prezensa nafatin mantein so que ninia serbisu la halo ona passa revista ba kartaun vasina no husu swab test la iha ona," Komandante Polisia Munisipiu Dili, Superintendente Xefe Polisia Henrique da Costa hateten via kontaktu telemovel ba The Oe-Kusi Post (TOP) Kinta 30 Setembru 2021.

Nia hatutan, polisia kontinua mantein iha pontu entrada tanba orientasaun husi komandu klaru ona para bele fó seguransa ba sirkulasaun transporte no ema sira hodi antisipa hahalok krime seluk ne'ebé maka bele akontese.

Entretantu, iha loron Kuarta 29 Setembru 2021, governu liu husi reuniaun Konsellu Ministru sira deside hodi hapara ona serka sanitária iha munisipiul Dili, nune'e populasaun sira bele halo movimentu livre, maibé nafatin kumpri protokolu saúde.

Governu deside hasai desizaun refere hafoin analiza kle'an ba aprezentasaun kona-ba pontu situasaun epidemiolójika país nian, ne’ebé maka aprezenta husi Sala Situasaun Sentru Integradu Jestaun (SIJK).

"Konsellu ministru deside la estende serka sanitaria iha Dili, nune'e serka sanitaria la iha ona bainhira vijente ne'e hotu iha," MPKM Fidelis ba jornalista sira iha pallasu governu, Kuarta 29 Setembru 2021.

 

 

 

 

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE

Online Counter