DILI (TOP) – Eis Komandante em Xefe das FALINTIL, Kay Rala Xanana Gusmão hamutuk ho Padre Pároku Bekora, Domingos Maubere inagura ona Monumentu Au-Hun.
The Oe-Kusi Post (TOP) observa, prosesu inagurasaun ne’e mós partisipa husi familia martires, no mate-restu sira. Monumentu ne'e konstroi husi Kay Rala Xanana Gusmão hodi fó honra ba martires nain 9, hamutuk ho heroi sira hotu ne'ebé mate iha Timor laran tomak iha loron 4 Setembru 1999, hodi defende ukun rasik a'an.
Komunidade sira agradese ba laran luak Kay Rala Xanana Gusmão ne'ebé la sente kolen serbisu ba povu no nasaun.
Xefe Aldeia Au-Hun, Joaninha de Andrade lori komunidade Aldeia Au-Hun tomak hato’o agradese barak ba Kay Rala Xanana Gusmão ne’ebé ajuda halo ona monumentu ne’e.
“Ha’u konsiente no tenke honestu katak, Xanana maka matadalan, sai inisiador ba monumentu ne’e. Sem Xanana buat hotu la akontese,” katak xefe aldeia Au-Hun iha seremonia inagurasaun monumentu Au-Hun iha aldeia Au-Hun, suku Bekora, Postu Administrativu Cristo Rei, munisipiu Dili, Sábadu 9 Outubru 2021.
Padre Domingos Maubere ho eis Komandante em Xefe das FALINTIL, Kay Rala Xanana Gusmão iha seremónia inagurasaun monumentu Au-Hun, Bekora, Dili Sabadu 9 Outubru 2021.
Nia hatutan, iha fulan ida liuba, povu Au-Hun selebra loron FALINTIL ba dala 46 hamutuk ho Xanana iha fatin ne’e.
“Ho nia prezensa, ami povu Au-Hun ne’ebé antes ne’e iha nakukun laran, ohin loron mosu ona naroman ne’ebé mai dadauk,” nia esplika.
Nia dehan, monumentu ne’e sei la’os partense de’it ba povu sira iha Au-Hun, maibé parte ba nasaun tomak.
Xefe Aldeia ne’e dehan, maske Au-Hun ne’e iha hela kapital Dili nia fuan, maibé durante ne’e ‘nunka’ hetan vizita husi governu hodi hare besik liutan povu sira nia susar no terus iha aldeia ne’e.
Ho situasaun ne’e, nia lori povu aldeia Au-Hun tomak hato’o tan proposta ida ba eis Primeiru-Ministru ne’e hodi hadia povu nia moris, hadia Estadu Timor-Leste ne’ebé oras ne’e la’o kleuk tun-sa’e ona, no hamoos netik juventude nia mata-ben, tanba lakon serbisu.
“Ami nia proposta ba Maun-Boot maka tenke hadia Estadu ne’e, tanba la’o la tuir dalan loos ona. Hamutuk ho Maun-Boot ita sei hadia buat barak,” nia husu.
Nia hatutan, Monumentu ne’e mós sei sai nu’udar sentru desportivu ida ba joven sira iha Au-Hun no mós planeia atu sai nu’udar futuru Kapela São Rafael Arcanjo iha monetu Au-Hun ne’e.
Author:Raimundos OkiWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
