EZERSÍSIU di’ak ida atu ita halo durante Semana Santa ne’e mak: avalía ita ida-idak nia aan, hodi leno no sukat ita nia aan ba protagonista sira iha paixaun Kristu nian. Relato evanjelhu nian aprezenta mai ita protagonista barak loos iha semana ida ne’e nia laran. Iha Maria, Pilatus, Herodes, Apóstolu sira, Simão Cireneu, jovem be halai molik, centurião, feto be litik Pedro, no seluk tan barak loos. Ita bele identifika ita nia aan, ita nia kualidade nu’udar dixípulu Jesus nian hodi tetu elementu sira nebe kada protagonista ida aprezenta mai ita. Ita bele dehan katak iha ita ida-idak nia aan, ita bele rekonhese protagonista sira ne’e nia aan iha dimensaun ruma ita nia moris fiar nian. Di’ak no aat oituan-oituan ita hetan hela iha ita nia aan rasik. Iha Evanjelhu ohin, ita hasoru sira na’in tolu: Judas, Simão Pedro, no João.
Jesus nia terus kompletu. Hanesan persegisaun nebe ema Judeu sira halo hasoru Nia seidauk to’o, sei aumenta tan nia dixípulu sira rasi-rasik halo traisaun no negasaun ba Nia. Apóstolu na’in rua mak halo ida ne’e, Judas no Simão Pedro. Traisaun so mai husi belun sira. Iha Jesus nia tempu, fo paun rohan uluk ba ema ida ne’e espresaun domin ida. Judas hetan Mestre di’ak liu hotu, Belun boot ida be hadomi tebes nia, maibe ida ne’e la sufisiente atu transforma nia. Evanjelhu dehan nakukun tama okupa tiha nia. Pedro moos tebe rai defende Jesus, maibe ikus mai monu wainhria Kruz halo ‘controlo de qualidade’ ba nia. Iha Kruz, iha esperiensia terus mak ita bele sukat se mak belun lolós, se mak falsu ka aproveitante de’it.
Trai no nega Jesus ne’e ita moos halo hela. Dimensaun apostolu rua nian ne’e ita hetan hela iha ita nia aan. Barak ka oituan, boot ka ki’ik. Buat nebe importante mak hatene rekonhese, hatene husu perdaun, hatene hamriik fali no la’o ba oin. Salmista ‘De Profundis’ hananu: ‘Na’i, se Itaboot fihir ba ami nia salan karik, ema se mak bele hetan salvasaun?’ Buat nebe importante moos mak dimensaun João nian iha ita nia moris: orgulhozamente rekonhese aan nu’udar ‘dixípulu nebe Jesus hadomi’. Mais do que hatene no haka’as aan atu ‘hadomi Maromak’, uluk na’ain buat nebe importante liu antes mak konxiente katak ha’u ne’e ‘dixípulu amado’. Na’i Maromak hadomi ha’u, hadomi ita. Misteriu sira tomak iha Semana Santa nia laran ne’e mak sásin katak ha’u ne’e ema ida nebe “Jesus hadomi”. Pedro moos hatene dididi’ak ida ne’e, liu tiha nega Jesus dala tolu, nia deklara nia domin dala tolu iha tasi ibun liu tiha Jesus moris hi’as. Esperiensia ne’e belit metin iha nia fuan, to’o nia hakerek iha nia Surat Dahuluk: “domin taka tiha salan wa’in tebes” (1Pd 4,8). Ida ne’e mak ita harohan, atu esperiensia Semana Santa ne’e, halo ita rekonhese duni ita nia aan nu’udar sala na’in, maibe liu-liu rekonhese roman boot ida nebe dada ha’u, falun tomak tiha ha’u ho Nia domin sasukat la’ek. Leitura I: Isaias 49,1-6, Salmu 70 (71) no Evanjelhu: Jo 13,21-33.36-38.
