DILI (TOP) – Governu liu husi reuniaun Konsellu Ministru sira aprova ona projetu rezolusaun governu rua kona-ba nomeasaun sekretáriu rejionál na'in 7 no Sekretáriu rejionál adjuntu na'in 2 hodi kompleta estrutura Rejiaun Administrativa Espesiál Oe-Kusi Ambeno no Zona Espesiál Ekonomia Sosiál ba Merkadu (RAEOA-ZEESM).
Komunikadu ba imprensa ne’ebé The Oe-Kusi Post (TOP) asesu, projetu rezolusaun governu ne'e, aprezenta husi Primeiru-Ministru (PM), Taur Matan Ruak iha reuniaun konsellu ministru extra-ordináriu Kuarta 15 Jullu 2020.
Ministru Prezidénsia Konsellu Ministru (MPKM), Fidelis Leite Magalhães informa, projetu nomeasaun ba sekretáriu rejionál no adjuntu sekretáriu rejionál sira ne'e atu kompleta estrutura autoridade RAEOA-ZEESM nian. Enkuantu sekretáriu rejionál adjuntu ne'e sei apoiu servisu prezidente autoridade RAEOA-ZEESM nian.
Fidelis hatutan, sekretáriu rejionál na'in 7 ne'e sei asume responsabilidade iha área hanesan, administrasaun públika rejionál, edukasaun, solidariedade no seluk tan.
"Ne'ebé sekretáriu rejionál ba autoridade REAOA ne'e, sei asume responsabilidade iha área administrasaun rejionál, edukasaun, Solidariedade Sosiál, Finansas, tarras propriedade, administrasaun, saúde, komérsiu no industria," nia hatutan.
Nia dehan, Prezidente Autoridade RAEOA-ZEESM, Arsénio Bano sei tau matan ba iha área planeamentu infrastruturas, ordenamentu territóriu no kadástru, dezenvolvimentu rurál no turízmu komunitáriu.
Enkuantu Sekretáriu rejionál adjuntu ba prezidente autoridade RAEOA-ZEESM asume titulár ba kargu ezekusaun administrativa ho kompeténsia ba administrasaun liu-liu iha área atividade ne'ebé mak determinadu hodi responde diretamente ba prezidente autoridade.
