AMBENO (TOP) – Funsionáriu kazuál hamutuk ema na’in-47, ne’ebé antes ne’e serbisu iha Diresaun Rejionál Juventude no Desportu Rejiaun Administrativa Espesiál Oekusi Ambenu(RAEOA) desde fulan Janeiru to’o Marsu 2026, seidauk simu sira-nia saláriu, maibé Prezidente Autoridade ba Rejian Administrativu Espesiál Oe-Kusi Ambeno, Régio Servantes Romêia da Cruz Salu promete ona sei rezolve iha tempu badak.
Martinho do Carmo Neno nu’udar funsionáriu kazuál na’in-47 ne’e katak, durante fulan tolu ona sira seidauk simu sira nia saláriu.
Nia hatutan, situasaun ne’e akontese bainhira mosu mudansa estrutura RAEOA nian iha tempu hirak liuba. Funsionáriu hirak ne’e ho saláriu diferenti balu fulan-fulan simu $272 no balun $204. Durante ne’e, sira la ativa ona, tanba Governu halakon tiha ona Diresaun Rejionál Juventude no Desportu iha Ambeno.
“Ami la ativa ona, maibé ami-nia saláriu fulan tolu seidauk simu, husi Janeiru mai to’o Marsu, maske ita iha kontratu, asina direita husi Prezidente Autoridade RAEOA, saláriu sira-ne’e mós la hanesan balu $272.00 no balu $204.00, ne’e tuir ona tabela funsaun públiku nian,” hateten Martinho do Carmo Neno ba jornalista sira iha Ambeno, Tersa, 19 Maiu 2026.
Nia esplika, sira hato’o tiha ona preokupasaun ne’e direta ba iha Prezidente Autoridade RAEOA, atu konsidera tanba, presta ona serbisu ba Estadu.
“Iha semana kotuk, ami hala’o ona audénsia ho Prezidente Autoridade, nia garante ona mai ami katak, sei rezolve, maibé presiza fó tempu itoan, atu buka meiu oinsa, nune’e bele rezolve. Tanba nomeasaun estrutura foun ne’e, ami-nia Diresaun Juventude no Desportu lakon ona, maibé ami husu de’it ami-nia direitu fulan tolu ne’e nian,” nia ezije.
Hatan ba preokupasaun ne’e, Prezidente Autoridade RAEOA, Régio Servantes Romêia da Cruz Salu, promete sei rezolve iha tempu badak, no konsidera assuntu ne’e, nu’udar divídas ba Autoridade RAEOA.
“Ne’e divídas ba ita, antes ne’e delegasaun ida mai hateten, ha’u hatuun ona despaisu ida iha loron 08 Maiu ba Sekretária Rejionál Rekursu Umanu no Administrasaun Finansa atu haree no fó paresér mai ha’u. Ha’u fiar semana oin ha’u sei hetan karta paresér ne’e atu haree nia solusaun ne’e oinsa, maibé Governu deklara ona, divídas sira-ne’e iha prova legálmente tenki fó solusaun legál,” Régio Salu esplika.
