AMBENO (TOP) – Tribunál Judisiál Primeira Instansia Oe-Kusi Ambeno foti ona desijaun ba sidadaun estranjeiru sira hamutuk nain-6, mane nain-5, no feto ida husi Indonézia tama prijaun preventiva iha Bekora, Dili hodi hein prosesu julgamentu tuir mai kona-ba kazu jogu online ilegál rua, esplorasaun jogu ilisita kriminoza jogu online, no mós burla informatika, redi scam call center transnasionál, ne’ebé instala husi empreza internasionál Seagull Resort husi Malazia iha hotel Oe-Upu iha Oe-Kusi Ambeno.
Sidadaun mane estranjeiru nain-5 ne’e, nain-3 husi Xina, ida husi Nepal no ida husi Indonézia.
Juiz Singulár, Evangelino Belo, hasai despaixu hodi aplika medida koasaun prizaun preventive ba arguidu na’in-neen, tanba komete jogu online ilegál rua, ba esplorasaun jogu ilisita kriminoza jogu online, no mós burla informatika, redi scam call center transnasionál, ne’ebé instala husi empreza internasionál Seagull Resort husi nasaun Malasia iha otél Oé-Upun Rejiaun Administrativa Espesiál Oé-kusi Ambeno (RAEOA).
Notisia Relevante: SNI no PSIK konsege desmantela ona rede bosok online deskonfia iha hote Oe-Upu
Arguidu na’in-neen ne’e ho inisiál A.S ho R.N husi nasaun Indonézia, L.Q ho A.W.X no Y.L.X.X husi nasaun Xina, N.M husi nasaun Nepál.
Prosesu Primeiru Interrogatóriu, Ministériu Públiku, reprezenta husi Prokuradór Mateus Nessi, promove arguidu sira ho krime explorasaun jogu online ilisitu burla informatika no burla agravadu, ne’ebé previstu iha artigu 322, 268 no 269 husi Kódigu Penál Timor-Leste.
Nune’e, tribunál konsidera iha indisu forte, enkuantu defeza ba arguidu sira, Octavio Cardoso, husu atu tetu medida koasaun ne’ebé Ministériu Públiku solisita ba Tribunál.
Hafoin rona tiha parte rua, juiz singulár, Evangelino Belo, tetu no deside aplika medida koasaun no prizaun preventiva, bainhira parte rua la konkorda desizaun ne’e, tuir prazu loron-30 bele halo rekursu.
“Promosaun ba iha prosesu primeiru interrogatóriu durante loron rua, to’o ohin loron hetan rezultadu liuhusi despaixu tribunál nian, ho faktu oi-oin ne’ebé mak tribunál konsidera, ho ida-ne’e hanesan mandatáriu ba iha prosesu ida-ne’e, aplika medida koasaun prizaun preventiva ba arguidu sira, ne’ebé ha’u mós iha devér no obrigasaun atu hatama rekursu iha loron lima nia laran,” advogadu privadu, Octavio Cardoso hateten ba jornalista sira iha edifisiu Tribunál Oe-Kusi Ambeno iha loron Sesta, 29 Agostu 2025.
Audénsia julgamentu ne’e, preside husi husi Juiz Singulár Judisiál Primeira Instansia Oe-Kusi Ambeno, Evangelino Belo, Ministériu Públiku reprezenta husi Prokuradór Mateus Nessi no Prokuradór José Elo.
Arguidu na’in-neen hetan asisténsia legál husi Advogadu Privadu, Advogadu João Ndun no Advogadu Octavio Cardoso, inklui Defensór Públiku Estaqui Guterres.
Notisia Relevante: PSIK no SNI prende desktop 86 no telemovél 194 iha Scam Call Center hotel Oe-Upu
Arguidu sira sai tiha ona husi Oe-Kusi Ambeno ba tama prijaun preventiva iha Bekora, Dili iha loron Sábadu, 30 Agostu 2025.
Kazu ne’e akontese iha loron Segunda kalan, 25 Agostu 2025, tanba buska no apreensaun husi ekipa konjuntu Polísia Siéntifika Investigasaun Kriminál (PSIK) no Serbisu Nasionál Intelejénsia (SNI) iha hotel Oe-Upu iha Oe-Kusi Ambeno.
