AMBENO (TOP) - Polísia Siéntifika Investigasaun Kriminál (PSIK), hamutuk ho Serbisu Nasionál Intelejénsia (SNI) ne’ebé hala’o atuasaun hodi desmantela rede scam call (habosok ema liu husi kontaktu telemovél) konsege prende evidensia sira hanesan desktop hamutuk unidade 87, telemovél 194, flash disck 3, access point ka WiFi ida, star link router 2 inklui sim card TELKOMCEL hamutuk 135.
Ekipa konjuntu, SNI no PSIK halo asaun desmantelasaun ba Hotel Oe-Upu ne’ebé deskonfia nakfilak ba Scam Call Center (habosok ema liu husi kontaktu telemovél) ne’e iha Segunda, 25 Agostu 2025 mais-menus iha oras tuku 21:00 kalan konsege hetan evidensia balun ne’ebé hatudu indikasaun forte ba jogu online ilegál rua hanesan esplorasaun jogu ilisitu kriminoza jogu online, no mós burla informatika, redi scam call centre transnasionál, ne’ebé instala husi empreza internasionál Seagull Resort husi nasaun Malasia iha hotél Oe-Upu iha Rejiaun Administrativa Espesiál Oé-kusi Ambeno (RAEOA).
“Atividade esplorasaun jogu ilisita no kriminoza, ne’ebé apreensaun ne’e, ita idnetifika katak, iha atividade kriminál rua, ida mak esplorasaun ba jogu ilisitu ida seluk mak atividade burla informatika, ne’ebé ligasaun ho redi scam call sentre transnasionál, ne’ebé durante ne’e, hala’o ona oprasaun iha Zona Aziátiku nian,” Investigadór PSIK, Dedi Álvaro da Silva esplika ba jornalista sira iha Hotel Oe-Upu, Tersa kalan, 26 Agostu 2025.
Investigador PSIK ne’e hatutan, atividade esplorasaun jogu ilisitu no kriminoza ne’e, ekipa PSIK no SNI konsege halo apreensaun ba objetu ka evidénsia sira hanesan, destop unidade 87, laptop 13, telemovél iha 194, flas-diks 3, aces point ka wifi 1, starlink router 2 no mós simcard Telkomsel Indonézia nian 135. No, objetu ba atividade burla informatika halo apreensaun ba desktop 58, laptop 4, mákina impresora 1, mákina sura osan 1, acces point 2 no mós telemovél 44.
Kona-ba dokumentu ne’ebé traballadór sira uza hodi hala’o serbisu, ekipa konjunta sei kontinua iha faze identifikasaun, tanba prosesu kontinuasaun ba kazu ne’e sei ba iha interrogatóriu judisiál hafoin kompleta horas 72 nia laran.
“Normálmente, kazu ne’e Flagrante delito, sei ba iha prosesu interrogatóriu judisiál, ne’ebé atividade ne’ebé hala’o ona iha Hotél Oé-Upu, ita desmantela tiha redi krimonu transnasionál ida, ne’ebé koñesidu iha zona iha Asian nian, tanba antes ne’e akontese mós iha nasaun Myanmar, Kambodia ikus iha Filipina, entaun hafoin ami identifika sentru ne’e mós instala iha Timor-Leste, iha Hotel Oe-Upu ne’e,” esplika investigador PSIK ne’e.
Flagrante delito katak, ema ida hetan kaer bainhira nia komete hela ofensa ida ho ativu.
Kaptura mós traballador internasional sira feto-mane lubuk ida ne’ebé maioria uja de’it vistu turista, la’os vistu serbisu nian.
The Oe-Kusi Post (TOP) esforsu halo konfirmasaun ba jestor kompañia Seagull Resort, maibé oras ne’e laiha fatin. Rona informasaun katak, jestor ba kompañia ne’e ses aan tiha ona ba Dili molok ekipa konjuntu tun ba halo asaun desmantela rede kriminozu transnasional ne’ebé deskonfia hala’o iha Hotel Oe-Upu nia laran durante fulan balun ona.
Kuarta ohin, ekipa konjuntu SNI no SPIK sei akompaña no aprezenta kazu ne’e ba iha primeira interogatoriu.
