AMBENO (TOP) - Prezidente Autoridade ba Rejiaun Administrativu Espesiál Oe-Kusi Ambeno (RAEOA) exonerado, Rogério Tiago de Fátima Lobato desidi hodi suspende tiha ona projetu emerjensia sira hanesan projetu CAFI IV no V iha Ambeno.
Karta Suspensaun ba projetu emerjensia sira ne’ebé The Oe-Kusi Post (TOP) asesu ho númeru referensia 454/PA/RAEOA-TL/VIII/2025 dirije ba emprezariu lokál no nasionál sira ho assuntu suspensaun ba projetu emerjensia CAFI IV no V ne’e asina husi PA RAEOA exonerado, Rogério Tiago de Fátima Lobato iha loron 25 Agostu 2025.
Notisia Relevante: Prezidente Autoridade RAEOA em-exercicío fahe projetu emerjensia hanesan fahe modo kangkung iha Ambeno
Konteudu husi katak ne’e, sita despaixu Primeiru-Ministru ho Nú. 014/PM/VII/2025 determina limite ba atuasaun Administrativa RAEOA, hodi limite prosedimentu Aprovizionamentu ba Bens servisu no Obras Publikas no Jestaun korentes iha Regiaun Administrativa Espesial Oe-Kusi - Ambeno eseptu hetan Autorizasaun husi Primeiru-Ministru.
Notisia Relevante: PM Xanana "disolve" ona PA-RAEOA ho nia membru sira nia poder no mandato iha Ambeno
Liu husi biban ida ne'e Autoridade husu ba empreza ne'ebé mobiliza ona ekipamentus no material tenki pouza hodi hein desizaun no autorizasaun husiPrimeiru-Ministru mai Presidente Autoridade RAEOA.
Total projetu emerjensia CAFI IV no V hamutuk 154 ne’ebé hetan de’it Orde de Serbisu, la’os kontratu serbisu husi PA-RAEOA exonerado, Rogério Tiago de Fátima Lobato iha loron 10 Jullu 2025.
