AMBENO (TOP) - Serbisu Nasionál Intelejénsia (SNI) hamutuk ho Polísia Siéntifika Investigasaun Kriminál (PSIK) iha Segunda, 25 Agostu 2025, mais-menus oras tuku 21:00 kalan, hala’o vizita supreza ida, hodi buska no halo apreensaun ba atividade ilegál hanesan Bosok Online (Online Scamming), jogu online, ne’ebé deskonfia autoriza husi Prezidente Autoridade Rejiaun Administrativa Espesiál Oé-kusi Ambeno (RAEOA), Rogério Tiago de Fátima Lobato.
The Oe-Kusi Post (TOP) oberva iha terrenu, ekipa SNI ho PSIK, ne’e tama derrpenti de’it, no konsege sita telefoni tantu jestór no traballadór sira, inklui sita mós mós sistema aplikativu Online Scamming nian. No, ekipa konjunta kontinua identifika tan pesoál ka traballadór sira tantu timoroan no estranjeiru iha kuartu idak-idak, maibé faktu hatudu maioria nakonu ho feto mai husi Indonésia, Xina, Malasia no Singapura.
“Imi mai iha ne’e ho objetivu la klaru, mai atu estraga de’it rai Santo Lifau,” membru ekipa konjuntu ida hateten ba feto ilegal sira ne’ebé durante fulan barak ona sulan metin iha hotel Oe-Upu nia laran.
Mosu reasaun sabotazen
Bainhira ekipa konjuntu ne’e halo hela esforsu atu tau hamutuk feto estranjeiru ilegal hirak ne’e iha fatin ida, derrepenti de’it ahi elétrisidade mate, ne’ebé deskonfia, traballador sira iha laran mak orienta empreza ne’e atu halo barulla iha momentu ne’e.
Nune’e, ekipa PSIK kontinua rekolla informasaun kada traballadór sira husi estranjeiru, no konsege identifika autór prinsipál ne’ebé taka ahi derrepenti ne’e, ekipa PSIK investiga nia, no hatudu jestór nia númeru telefoni. Nune’e, ekipa PSIK telefone direita ba jestór empreza ne’e, nia sei iha Dili hela, hodi responde katak, nia mós hetan ema boot balun mak orienta hodi taka tiha ahi ne’e.
Ekipa konjuntu ne’e taka tiha telefoni, hodi telefoni fali ba ekipa EDTL Oe-Kusi Ambeno, liu tiha minutu balun ekipa EDTL Oe-Kusi Ambeno to’o kedas fatin, no hamoris fila-fali ahi elétrisidade ne’e iha tuku 01:30 kalan boot. Hafoin ahi lakan, ekipa SNI ho PSIK kontinua asegura traballadór sira tantu timoroan no estranjeiru iha sala serbisu to’o meiu ne’e, hodi hein prosesu kontinuasaun ba iha Ministériu Públiku.
Reasaun povo Ambeno
Durante ne’e mosu reasaun kontra oioin husi povo Ambeno iha plata forma media sosial (Facebook) katak, hotél Bintang Lima Oe-Upu Ambeno ne'ebé antes ne'e sai fatin ba autoridade sira hodi halo serimonia ofisial sira estadu, Governu nian hanesan formasaun, treinamentu, no sosializasaun, inklui aktividade seluk husi Governu, no seluk tan. Oras ne'e hotel Bintang Lima deskonfia nakfilak ba fatin operasaun aktividade Jogu Online.
Atoni-Oan bele ki'ak no ki'ik maibé la'os lahatene
Oras serbisu, tama 09 dader-sai tuku 09 kalan, Tama tuku 11 dader sai tuku 11 kalan. Ida ne’e hatudu, kompañia internasional ne'e livre hodi hala'o nia aktividade tuir nia hakarak, hakat-liu oras serbisu ne'ebé regula husi Governu Timor-Leste.
Nune'e mós nia regra oin-seluk, tama labele lori telefone, labele foti foto no halo video. PA-RAEOA, señor Rogerio Tiago Lobato iha ninia statementu politika sira dehan sei loke kampu de traballu ba Atoni-oan irhun ba rihun durante ne'e ninia rezultadu maka ne'e. Lolo'os Governu Sentral presija halo investigasaun ba kompaña internasional "seagull resort" ne'ebé daudaun ne'e deskonfia utiliza hotél Oe-Upu ne’e.
Prezidente Autoridade RAEOA, Rogério Tiago Lobato iha loron 12 Dezembru 2024 ne’ebé asina akordu ida ho Core Management Corporation (CMC) hodi harii Sentru Dizital Oe-Cusse (Oe-Cusse Digital Center).
Iha tempu ne’eba, entre Autoridade RAEOA no CMC konsidera loron 12 Dezembru 2024 nu’udar movimentu istóriku ida hodi hametin inovasaun, komérsiu, no investimentu internasionál, Rogério Tiago De Fátima Lobato, Prezidente Rejiaun Administrativa Espesiál (SAR) Oe-Cusse Ambeno nian, no Korporasaun Jestaun Sentrál (CMC) ne'ebé reprezenta hosi Prezidente Ezekutivu Ken, Diretór Ezekutivu Vincent Yeoh, asina ona formalmente akordu ida atu avansa paizajen ekonómiku rejiaun nian.
Akordu ne'ebé asina iha loron 12 fulan-Dezembru tinan 2024, marka dezignasaun ofisiál hosi Sentru Dijitál Oe-Cusse Ambeno (ODC) hanesan Zona Komérsiu Livre (ZZ). Estatutu ida-ne'e hakarak atu koloka ODC hanesan sentru prinsipál ba inovasaun, komérsiu, no servisu dijitál sira. Estatutu FTZ sei kria ambiente ida ne'ebé atrativu ba negósiu globál sira, oferese insentivu oioin no haburas ekosistema ida ne'ebé buras ba avansu teknolójiku, empreendedorizmu dijitál, no komérsiu.
Iha konjunsaun ho dezenvolvimentu ne’e, Rejistu Empreza Internasionál Oe-Cusse Ambeno (OICR) ofisialmente estabelese ona. Nu'udar rejistu dedikadu ba empreza tasi-ibun nian, OICR sei fornese solusaun komersiál no bankáriu sira ne'ebé komprensivu ba investidór internasionál sira. OICR oferese plataforma estratéjiku ida ba negósiu sira atu jere no habelar sira nia operasaun globál, aproveita Oecusse nia enkuadramentu regulatóriu vantajozu no lokalizasaun estratéjiku. Inisiativa ida ne’e aliña ho governu nia vizaun atu transforma Oecusse ba sentru negósiu jerasaun tuir mai iha Ázia.
Adisionalmente, ODZT – Oecusse Digital Zone Token, token utilidade dahuluk ne'ebé hetan endosu hosi governu, sei fó sai ba liquidasaun no sirkulasaun iha ODC nia laran. OICR sei sai ajénsia primária dahuluk ne'ebé sei utiliza token ba akordu pagamentu sira, hodi promove efisiénsia no transparénsia ba investidór internasionál sira.
Nu’udar apoiu liután ba modernizasaun Oe-Cusse Ambeno nian, Zchwantech Titan Lda, ne’ebé reprezenta husi Steven no Khoo, fó sai asinatura Nota Entendimentu (MoU) ida ho Autoridade RAEOA hodi estabelese Projetu ID Dijitál Nasionál no Viajen. Projetu inovador ida-ne'e sei introdús sistema ida ne'ebé avansadu liu ba pasajen imigrasaun nian ne'ebé la uza surat-tahan, hodi hasa'e efisiénsia no efikásia ho signifikativu. Ho inisiativa ida ne’e, Oe-Cusse Ambeno sei sai nu’udar nasaun daruak iha Ázia, hafoin Singapura, atu implementa planu dijitalizasaun avansadu hanesan ne’e.
Projetu tomak sei hetan finansiamentu tomak hosi Zchwantech Titan hanesan jestu apoiu nian ba dezenvolvimentu infraestrutura nasionál. Projetu transformativu ida-ne’e aliña ho governu nia vizaun ba modernizasaun no sei koloka Oecusse nu’udar líder ida iha governasaun dijitál no solusaun viajen ne’ebé laiha problema.
Prezidente Rogério Tiago De Fátima Lobato subliña potensiál transformativu hosi inisiativa sira-ne’e: “Fó estatutu Zona Komérsiu Livre ba Sentru Dijitál Oe-Cusse Ambeno no lansamentu Rejistu Empreza Internasionál Oe-Cusse Ambeno nian reflete ami-nia kompromisu atu haburas inovasaun, atrai investimentu, no kria oportunidade ba kresimentu ekonómiku sustentável Dalan ida ne’ebé pazivu liu sei sai hanesan milaun sira. Oe-Cusse Ambeno atu sai atór xave iha ekosistema dijitál no finanseiru globál.”
Prezidente Ezekutivu Core Management Corporation (CMC), Ken Lim hatutan: "Parseria ida-ne'e reprezenta pasu signifikativu ida ba hasa'e kompetitividade globál Oecusse nian. OICR no estatutu FTZ ba ODC sei fornese ba negósiu internasionál sira ho plataforma ida ne'ebé metin atu buras. Ami sente onradu atu hala'o papél ida iha viajen vizaun ida-ne'e."
Diretór Ezekutivu CMC, Vincent Yeoh nota liután: “Ami nia foku nafatin atu fornese solusaun sira ne'ebé seguru, efisiente, no kumpri ba komérsiu internasionál.
Estabelesimentu OICR nian maka testamentu ida ba ami nia kompromisu atu fasilita operasaun negósiu sira ne'ebé la'o ho di'ak ba investidór globál sira.”
Zona Komérsiu Livre no OICR hein katak sei atrai interese internasionál ne'ebé signifikativu, hodi koloka Oecusse nu'udar sentru ba inovasaun, komérsiu, no investimentu iha rejiaun.
Kona-ba Sentru Dijitál Oe-Cusse Ambeno (ODC)
ODC dezeña atu sai hanesan ekosistema ida ne'ebé kompletamente uza blockchain, oferese fasilidade sira hanesan rejistu empreza internasionál, sentru dijitál no inovasaun, sentru apoiu eGaming, no mós fasilidade divertimentu no kompras.
Kona-ba Core Management Corporation (CMC)
CMC espesializa iha solusaun prosesamentu pagamentu seguru no governasaun ba indústria jogu online. Komprometidu ba exelénsia no kumprimentu, CMC apoia negósiu sira ho servisu sira ne'ebé seguru, efisiente no inovadora.
Ses husi ne’e, maske seidauk hetan lisensa husi parte governu sentrál liu-liu husi Inspetoria dos Jogos e Lotaria, maibé Hotel Oe-Upu durante ne’e deskonfia hala’o hela bosok online (Online Scamming) no sai nu’udar armazen di’ak ida hodi hatama ka importante traballador feto-mane husi rai-liur hodi hala’o serbisu bosok-ten nian.
Ekipa konjuntu sei aprezenta kazu ne’e ba primeira interogatoriu hafoin kompleta horas 72 nia laran.
