MAHATA (TOP) - Prezidente Repúblika, José Ramos-Horta hanesan líder no aman ida ne’ebé sempre konsidera difikuldade labarik sira nian no la haluha labarik sira iha orfonatu Topu-Honis Mahata iha Oe-Kusi Ambeno.
Foin lalais ekipa Gabinete prezidénsia Repúblika liu husi Unidade Serbisu Sosiál (SSAS) ho ekipa hala’o vizita mos ba Orfanatu Tophonis iha Oe-Cusse. Tuir tradisaun vizita prezidensia nian, Prezidente Ramos-Horta fó prioridade ba hanoin sosiál, liu-liu ba labarik ne’ebé lakon apoiu familiar.
Durante vizita, ekipa prezidensia lori sasan hanesan fos, mina, manu-tolun, sepatu, roupa no mos sasan nesesidade labarik feto sira nian, apoiu hirak ne’e balun mai husi Prezidente Ramos-Horta nia Amigu di’ak sira atu responde ba nesesidade urgente, liu-liu ba alin feto sira.
Apoiu ne’e konsidera importante tanba labarik sira mak fonte ba dezenvolvimentu moris no presija hetan esperansa foun liu husi solidariedade.
Justino Coa, responsável finansas iha Orfanatu Tophonis, dehan fundasaun ne’e la hanesan fundasaun seluk, tanba sira trata orfanatu hanesan uma mahon ida.
“Hotu-hotu ne’ebé iha ne’e mai ho situasaun familia kbiit laek. Sira mai atu kontenti, la’os atu hetan susar. Agora ita registu ona iha notariadu no fundasaun ne’e legal ona, agora buat hotu lao ho diak,” hateten Justino ba jornalista sira iha uma-mahon Topu-Honis, Sesta, 29 Agostu 2025.
Orfanatu Topu-Honis agora akomoda labarik orfonatu hamutu nain-28 ne’ebé kompostu husi mane nain-16, no feto nain-12.
Ekipa prezidensia mós katak, kada fulan sira sempre fó apoiu sosial no sei kontinua nafatin, hanesan mós prezidensia halo ba orfanatu sira seluk iha Dili, Aileu no Klibur Domin iha Tibar, Likisa.
Vizita ekipa Prezidénsia Repúblika nian iha Oe-Kusi Ambeno hatudu, Prezidente Ramos-Horta nia kompromisu atu kontinua halo solidariedade sosiál iha munisipiu hotu.
