AMBENO (TOP) – Ro Berlin Ramelau ne’ebé governu liu husi Ministériu Transporte no Komunikasaun desidi ba tripulante Timoroan sira mak lori la kleur tan sei mout iha tasi-klaran, tanba desde tinan 2021 to’o ohin loron ro ne’e kontinua soke hela de’it bainhira atu sai husi portu atraka nian iha Oe-Kusi Ambeno.
Akontesimentu soke primeiru iha loron 23 Dezembru 2021 iha portu Iwao Kitahara Mahata, Oe-Kusi Ambeno hafoin hand over (entrega) iha loron 20 Dezembru 2021.
Hafoin akontesementu ne’e, Diretór Cabotage Nasionál, Feliciano da Costa Correia mós rekoñese katak, iha loron 23 Dezembru 2021, bainhira ro Berlin Ramelau hala’o operasaun ba Oe-Kusi Ambeno konsege kose duni iha ninia jeti, maibé la’ós soke ahu-ruin. No konsidera kose jeti ne’e normal hela, baibain hela, maibé oras ne’e kontinua kose ro ne’e nia isin-loron to’o nakles ne’e la’os baibain ona, ne’e sinal la di’ak ba seguransa pasajeiru no ro ne’e rasik.
Tuir informasaun ne’ebé The Oe-Kusi Post (TOP) asesu, iha loron Domingu lorokraik, 17 Abril 2022 ro Berlin Ramelau atu fila mai Dili ona, maibé lakonsege, no desidi tenke deskansa kalan ida iha portu Iwao Kitahara Mahata, Oe-Kusi Ambeno, tanba ro kontinua soke tan portu ne’e to’o ro nia isin-lolon parte ikun nakles no kuak tiha.
Ohin loron Segunda 18 Abril 2022 iha oras tuku 10 dadersan mós ro Berlin Ramelu seidauk sai husi portu Mahata, tanba tuir informasaun ne’ebé TOP asesu sei hein hela ekipa investigasaun husi nasionál hodi halo prosesu investigasaun ba akontesimentu ne’e mak foin desidi atu viajen ba Dili.
Deputada CNRT Lucia Taeki hateten, tanba ho akontesimentu horseik ne’e mak provoka pasajeiru barak desidi lakohi sa’e ro ne’e ba Dili.
“Maibé balun ba duni, no barak mak desidi lakohi ba Dili ona tanba sente tauk no trauma ho akontesimentu horseik,” katak Deputada Lucia ba The Oe-Kusi Post.
Nia hatutan, oras ne’e dadauk ro Berlin Ramelau foin mak sai husi portu Mahata ba Dili.
