DILI (TOP) — Eis komandante em-Xefe das FALINTIL, Kay Rala Xanana Gusmão kontente tebes selebra loron moris FALINTIL nian ba dala 46 hamutuk ho komunidade sira iha aldeia Au-Hun, suku Bekora, Postu Administrativu Kristo Rei, Munisipiu Dili.
“Ho onra boot kontente teb-tebes bele mai iha loron boot nasaun Timor-Leste nian mai hamutuk ho apa sira, ama sira, tiu no tia sira, alin sira, oan sira, no bei-oan sira hotu. Ha’u kontente no fó onra boot ida tanba bele mai to’o iha aldeia Au-Hun ne’e,” Xanana hato’o nia diskursu iha selebrasaun loron FALINTIL ba dala 46, iha Au-Hun, Bekora, Dili, Sesta 20 Agustu 2021.
Lider karismátiku ne’e hatutan, bai-bain halo selebrasaun ne’e, iha Munisipiu más atu mai iha aldeia ida maka foin nia bele mosu to’o iha aldeia ne’e hodi selebra loron boot FALINTIL nasaun Timor-Leste nian.
Xanana rekoñese, loos duni, loron boot ba FALINTIL nian ba populasaun sira ne’ebé maka sei joven, sira ne’ebé maka barak sei moris liu tiha tinan 1999.
“Kuandu ita iha aldeia ida ferik katuas sira, ita selebra loron boot hamutuk ho ita nia oan sira balun boot itoan ona balun foin maka moris depois de 1999 ka iha sira foin moris tinan 4, 7 no 8 sira ladun sente husi tinan ba tinan ita halo funu ne’ebé hodi povu tomak terus ne’e, ita fó valor ba martir sira loos, fó valor ba eroi sira tomak loos iha ne’e mos ohin xefe aldeia temi tiha ona,” nia dehan.
Xanana Gusmão dehan, maibé bainhira temi erois ita temi martires kuaze sempre haree maka gerilleiru sira ladun presta atensaun ba povu ne’ebé maka terus liu.
“Ha’u rona iha aldeia ne’e eroi nain 9 maka monu iha ne’e, atu partisipa mós iha ita nia vitoria ukun aan ida ne’e maka ha’u mai ho laran ksolok ho laran triste tanba hodi rona mos xefe aldeia ohin dehan iha faluk barak, iha difisiente sira, iha difikuldade iha uma oi-oin barak ladun duni hetan atensaun”.
Xanana agradese, ba joven sira ne’ebé maka halibur malu hodi bele hadia ka aranja fatin ne’ebé maka atu hasosru ne’e. Joven sira difikuldade ne’ebé maka joven sira maibé husu joven Au-Hun, unidade, harmonia, labele fahe malu labele estraga malu.
“Imi hamutuk malu ba, ko’alia ba malu ba, hakuak malu ba, maske husi fatin ketak-ketak maibé, hakuak malu ba mai iha ne’e. Fatin ne’e uma ida Au-Hun labele sokar malu tun-sa’e ,labele estraga malu, imi nia hahalok ne’ebé imi nia bei-ala sira fó korajen ba ami atu funu hasoru nasaun boot ida,” nia informa.
Durante tinan 24, Rezisténsia funu ba liberdade ne’ebé difísil tebes. Nu’udar forsa kiikoan ida laiha ekipamentu di’ak no laiha apoiu militár hosi rai-li’ur, ne’ebé luta hasoru inimigu boot no nia aliadu sira. Ho aten-barani no hasoru provasaun hotu, soldadu sira FALINTIL nian nafatin hal’o gerrilla to’o povu Timor-Leste bele vota ba independénsia, iha referendu tinan 1999.
Reflete kona-ba asaun istóriku FALINTIL nian, antigu komandante Kay Rala Xanana Gusmão hatete, iha tinan liubá, katak “loron-matan mosu loroloron iha Timor-Leste ida ne’ebé livre tanba sakrifísiu hosi funu na’in sira libertasaun nasionál nian no asuwa’in sira ne’ebé mate hodi realiza ami nia mehi ukun-rasik-an nian. Ita labele haluha ne’e hanesan parte hosi ita-nia istória no ita tenke kontinua fó ónra ba sakrfifísiu sira ne’e no buat hirak ne’ebé maka sira husik hela mai ita”.
