DILI (TOP) – Prezidente partidu FRETILIN atual Prezidente Repúblika Francisco Guterres Lú Olo foti ona desijaun hodi nomeia militante FRETILIN nain-rua sai nu’udar membru ba Konsellu Superior Majistratura Judisial (KSMJ).
Camarada Lú Olo foti desijaun ne’e liu husi dekretu prezidensial ho númeru 22/2022 iha loron 12 Abril 2022 katak, desijaun ne’e bazeia ba konstituisaun RDTL artigu 86, 128 no mós artigu 165 husi estatutu majistradu judisial.
Militante FRETILIN nain-rua ne’ebé hetan nomeasaun ne’e mak Sekretariu Jeral partidu FRETILIN Mari Bin Amude Alkatiri nia oan mane Loukeno Hamud Ribeiro Alkatiri, no Paulo Adriano da Cruz Araújo.
Alkatiri nia oan mane Lukeno durante ne’e nu’udar mós advogadu ida ba iha JLA, Advogados e Consultores, no Paulo Adriano da Cruz Araújo antes ne’e hetan nomeasaun husi Parlamentu Nasionál sai nu’udar komisariu iha Konsellu Imprensa Timor-Leste ba área juridiku.
