DILI (TOP) — Deputada husi Bankada Congresso Nasionál Reconstrução Timorense (CNRT) Lúcia Taeki ejize ba Polisia Nasionál Invetigasaun Kriminál (PNSIK) atu investiga kazu Rosalina Nessi Sila nia mate ho loloos, no seriu, tanba faktu balun hatudu nia la’os tara aan, maibé deskonfia ema ruma maka tara mate nia.
“Ha’u husu ba Polisia Nasionál Sientifilku investigasaun Kriminál favor atende kazu ne’e ho seriu, tanba iha oknum ida maka hakotu alin Rosalina Nesi Sila nia vida,” kestiona deputadu Lúcia Taeki iha sesaun plenaria Parlamentu Nasionál, Dili, Tersa 11 Janeiru 2022.
Nia hatutan, husi parte familia matebian sente la satisfas no duvida ba rezultadu autopsia husi médiku sira iha HNGV katak Rosalina Nessi Sila maka tara nia aan rasik maske evidensia iha terenu hatudu oin seluk fali.
Nia konta, iha kalan 31 Dezembru 2021, Matebian Rosalina Nessi Sila ho nia la’en mesak iha sira nia rezidensia hodi hein hela tinan foun 2022 derepente nia la’en la’o sai hemu-tua no fila iha tuku 4 dadersan. No iha tuku 5 dadersan rona fali Rosalina hakotu nia iis ona.
Ema hotu iha área Tasi-Tolu, lagoa I iha Sesta kalan, 31 Dezembru 2021 sente preparadu ho laran ksolok tebes atu simu tinan foun 2022, maibé familia ki’ik ida ne’ebé sira nia uma helik aan iha foho lolon área Tasi-Tolu ne’e hasoru situasaun oin seluk fali.
Rosalina Nesi Sila (33) husi aldeia Oel-Fab, suku Lela-Ufe, Sub-rejiaun Nitibe, Rejiaun Administrativa Espesiál Oe-Kusi Ambeno (RAEOA) mate derepente de’it ho kondisaun tali kesi metin hela iha nia kakorok. Rosalina nia la’en husi munisipiu Vikeke, postu Ossu ho naran Francisco da Cruz mós sente hakfodak tebes ho situasaun moruk ne’e. Sira nain-rua forma uma kain kuaje tinan 8 ona, maibé oras ne’e sira nain-rua tenke fahe malu ho dalan ne’ebé laloos, tanba Rosalina ninia mate ne’e mós sei kontinua sai mistériu. Nia maka desidi tara aan duni ka ema seluk maka tara nia. Parte polisia oras ne’e sei kontinua hala’o prosesu investigasaun hodi bele ke’e sai hun-abut husi kazu mate ne’e.
Hafoin kazu ne’e akontese, Polisia Nasionál Timor-Leste (PNTL) liu-husi Polisia Nasionál Serbisu Investigasaun Kriminál (PNSIK) no FORENSIK to’o kedas fatin akontesimentu iha Lagoa I, Tasi-Tolu, aldeia 12 de Outubru, suku Komoro, Postu Administrativu Dom-Aleixu, Munisipiu Dili.
Notisia relevante: Rosalina mate iha uma-laran, polisia ka’er kedas la’en
Parte familia matebian hato’o ona keixa ba iha Ministériu Públiku hodi buka lia-loos kona-ba kazu ne’e.
