DILI (TOP) – Politika nain sira inklui governante sira iha governasaun atual foin lalais sente kontente tebes ho indise liberdade imprensa globál ne’ebé publika husi Reportagen sem Fronteira ka Reporters Without Borders (RSF), Timor-Leste aumentu duplu, ka sa’e makás husi 71 iha tinan 2021, ba 17 iha tinan 2022, maibé Ministru Asuntu Parlamentar no Komunikasaun Sosiál Francisco Martins da Costa Pereira Jerónimo keixa ona Xefe Redasaun Media Online www.hatutan.com Francisco Belo Simões da Costa hafoin públika notisia sira kona-ba deskonfia mosu prosesu naksalak ba iha projetu Set Top Box (STB).
Tuir informasaun balun ne’ebé The Oe-Kusi Post (TOP) asesu, projetu instalasaun Set-top Box/dexodificador RTTL,E.P ne’e ho nia kustu $900,000.00, deskonfia Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, nudár mós Prezidente Federasaun Futeból Timor Leste (FFTL) estabelese kontratu ho empreza DILI ETERNAL INNOVATION INFORMATION, Lda nudár sósiu husi Melánia da Silva Fernandes Capela nudár Sekretaria iha Gabinete Prezidente FFTL, maibé tuir direitu resposta husi MAPKOMS ba redasaun Hatutan.com katak, notisia hatutan nian kona-ba assuntu ne’e la loos.
Ho nune’e, ikus mai MAPKOMS desidi hodi hato’o keixa kontra xefe redasaun Hatutan.com atual membru Konselleiru Imprensa Francisco Belo Simões da Costa.
“Ha’u ohin ba presta tiha ona deklarasaun iha Ministériu Públiku kona-ba keixa ida husi MAPKOMS. Kazu ne’e kona-ba denunsia kalunioza husi Kódigu Prosesu Penál (2009) iha artigu 285,” hateten Xefe Redasaun Hatutan.com Francisco Belo Simões da Costa via kontaktu telemovél ba The Oe-Kusi Post (TOP) Segunda 23 Maiu 2022.
Xefe Redasaun Media Online www.hatutan.com Francisco Belo Simões da Costa. Credit Hatutan.com
Entretantu, tuir notisia husi media online Hatutan.com katak, sira nia Xefe-Redasaun ba presta ona deklarasaun iha Prokuradoria Distrital Dili iha Matadoru loron Segunda 23 Maiu 2022 oras tuku 9 to’o 9:30 dadersan kona-ba keixa ne’ebé hatama husi Ministru Francisco Martins da Costa Pereira Jerónimo.
Jornalista Francisco Belo Simões da Costa, simu notifikasaun husi MP iha loron 18 fulan-Maiu 2022, bá prosesu NUC 0078/22/PCCIC, hanesan suspeitu ho notifikasaun kona-bá Dilijénsia.
Media online hatutan deskreve, Ministru Francisco Martins da Costa Pereira Jerónimo, hatama keixa kontra Francisco Belo Simões da Costa nu’udár jornalista no Xefe Redasaun Hatutan.com relasiona ho notísia sira kona-bá projetu instalasaun Set-top Box/dexodificador Rádiu Televizaun Timor Leste, Empreza Públika (RTTL,E.P).
Keixa hosi Ministru MAPKOMS, Francisco Martins da Costa Pereira Jerónimo ne’e ho baze Artigu 285 Hatada Haneur (difamatória) ka ho portugés dehan “Denúncia caluniosa”.
Artigu 285 Hatada Haneur (difamatória)
1 – Sé mak husi kualkér meiu iha autoridade ka públiku nia oin ho konxiénsia hadu’u falsu, denunsia ka soe kona-ba ema ruma no suspeita halo krime ida, ho intensaun katak hasoru nia sei loke lala’ok kriminál, sei tama kalabosu to’o tinan 3 ka kastigu selu osan.
2 – Enkuantu hadu’u falsu reflete kona-ba infrasaun ka dixiplinár, pena bele hakmaan hanesan baibain.
3 – Enkuantu faktu sira ne’ebé hakerek tiha iha artigu sira anteriór promove tiha ho neon-aat husi funsionáriu makaer ruma atu loke lala’ok ne’e maka aplikasaun pena sira sei hatodan husi katoluk ida iha nia limite sira mínimu no másimu.
Versaun Portugés (Artigo 285º Denúncia caluniosa)
Quem, por qualquer meio, perante autoridade ou publicamente, com a consciência da falsidade da imputação, denunciar ou lançar sobre determinada pessoa a suspeita da prática de um crime, com a intenção de que contra ela se instaure procedimento criminal, é punido com pena de prisão até 3 anos ou multa.
Se a falsa imputação se referir a ilícito contraordenacional ou disciplinar, a pena será extraordinariamente atenuada.
Se os factos descritos nos números anteriores forem dolosamente promovidos por algum funcionário encarregado de instaurar o respectivo procedimento as penas aplicáveis são agravadas de um terço nos seus limites mínimo e máximo.
Kazu hanesan ne’e mós uluk kona jornalista Timor Post atual Xefe Redasaun The Oe-Kusi Post (TOP)https://www.oekusipost.comRaimundos Oki hasoru keixa husi Primeiru-Ministru Rui Maria de Araújo iha tinan 2015 nia rohan to’o tinan Juñu 2017 mak foin hetan desijaun final. Desijaun Tribunal Distrital Dili kona-ba kazu defamasaun hasoru PM Rui ne’e absolve total.
Author:Raimundos OkiWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
