DILI (TOP) – Joven besik nain 10 husi suku Lalisuk, Oe-Kusi Ambeno konsege lansa asalta hasoru ema ida de’it husi suku Bobometo iha tempu kalan.
Vitima Agustinho Ulan nia esplikasaun ba Komandate eskuadra polisia Dom Aleixo, Asistente Inspetor Amerio Fátima da Costa katak, iha Domingu 28 Novembru 2021 kalan bainhira nia fila husi Tasi-Tolu, nia rona informasaun husi nia maluk balun katak, ohin kalan labele toba iha fatin ne’e, tanba iha grupu organizadu ida iha intensaun a’at atu mai asalta ita boot. Rona tiha informasaun ne’e, Ulan ho nia ferik-oan mós hamamuk kedas fatin ne’e hodi ba toba fali iha nia maluk balun iha Ai-Tarak Laran. No iha Segunda 29 Novembru 2021 oras tuku 11:30 kalan, mosu ema ida maka ba uluk Ulan nia uma iha Bebonuk. Kalan ne’e Ulan ho nia kaben desidi ba toba fali ona iha Bebonuk. Ema ne’ebé mosu dahuluk iha nia uma maka ema ida naran Asatu.
“Asatu maka tama ba husu uluk, depois ami sei dadalia halimar hakfodak mai ema barak maka tama tan ba hodi la husu buat ida, direitamente tebe-tuku ha’u. Asatu mós direitamente hamrik hakuak metin ha’u maka nia maluk sira seluk tuku-tebe ha’u,” Vitima Agustinho Ulan haktuir kronolojia akontesementu ne’e iha Polisia eskuadra Dom Aleixo (Aimutin), Dili foin lalais.
Nia dehan, akontesementu kalan ne’e, nia la halo kontra atake, tanba autor sira barak loos.
Komandante Eskuadra Polisia Dom Aleixo, Asistente Inspetor Amerio Fátima da Costa esforsu hela atu solusiona kazu krime ne’e, maibé parte vitima lakohi hodi lori kazu ne’e ba Ministériu Públiku.
“Sira barak loos hobur ema ida de’it hanesan ha’u ne’e, tanba ne’e maka ha’u hakarak lori kazu ne’e ba Ministériu Públiku,” responde Ulan hodi rejeita hadame malu de’it iha polisia nia oin, tanba nia katak, kazu ne’e kazu krime no la simu autor sira ne’ebé iha intensaun a’at hodi ba asalta nia iha nia uma iha tempu kalan boot.
Ulan esplika, kazu asaltu ne’e iha ligasaun ho atividade despotiva ida ho naran METO Cup ne’ebé organiza husi estudante Oe-Kusi Ambeno sira iha Dili ho naran Movimentu Estudante Tane Oe-Kusi Oan (METO). Atividade METO Cup la’o durante fulan tolu nia laran, ninia abertura hahu iha fulan Setembru liuba no foin remata iha loron 28 Novembru 2021.
Iha enseramentu ne’e, iha klubu rua de’it maka joga iha kampu futebol iha Kampung Baru, iha igreja Komoro nia kotuk kedas. Klubu FC Lalisuk kontra klufu FC Bobometo hodi hadau primeiru lugar. Jogu iha primeira sesaun liu minutu balun de’it, FC Lalisuk konsege hatama ona golu rua ba FC Bobometo. Atividade jogu ne’e kontinua la’o iha ambiente trankuilidade nia laran, maibé hafoin liu minutu balun tan jogador sira husi FC rua ne’e monu iha kampu laran tanba hadau malu bola. Nune’e, mosu adeptu ida halai sai husi klubu FC Lalisuk halai tama ba kampu laran hodi tenta atu halo agresaun fizika hasoru kapten FC Bobometo. Ho situasaun ne’e maka konsege provoka adeptu sira husi FC Bobometo mós halai tama ba kampu laran hodi konsege halo agresaun fizika hasoru jogador sira husi FC Lalisuk.
Autor sira ne’ebé ba asalta Ulan ne’e konfesa katak, iha momentu ne’e, sira hare Ulan mós konsege baku sira nia jogador ida iha kampu laran. Tuir loloos saida maka akontese iha kampu laran ne’e presija rezolve de’it ona iha kampu laran, maibé adeptu sira husi FC Lalisuk ne’e kontinua rai sira nia odiu vingansa hodi bolu malu halo grupu boot ida maka ba asalta fali Ulan iha nia uma iha Segunda kalan boot.
Komandante Eskuadra Polisia Dom Aleixo, Asistente Inspetor Amerio Fátima da Costa konsege gasta tempu minutu balun hodi hadame parte rua ne’e, maibé parte vitima lakohi hodi avansa kazu krime ne’e ba dalan justisa.
“Tanba ami ka’er liman no hakuak malu iha ne’e de’it, orsida sira hanoin katak buat baku ema ne’e lei laiha, ita bele baku ema se de’it, orsida to’o polisia paling ka’er liman no hakuak malu de’it hanesan ne’e hotu ona sa, tanba ne’e maka ha’u hakarak tenke prosesa kazu ne’e ba oin,” esplika Ulan.
Vitima Agustinho Ulan rejista ona kazu krime ne’e ba iha Ministériu Públiku.
