DILI (TOP) – Ohin dader sosiedade aktivista sira iha Timor-Leste no iha rai-liur sente hakfodak tebes ho Diretor Asosiasaun HAK, Sisto dos Santos ne’ebé iis kotu ona iha Hospital Nasionál Guido Valadares (HNGV).
Tuir informasaun oioin ne’ebé The Oe-Kusi Post (TOP) asesu iha plataforma media sosial katak, Sisto ne’ebé koñesidu nu’udar ativista ida iha rai-laran iis kotu iha HNGV iha loron Sesta, 17 Marsu 2023 oras madrugada.
Ho situasaun ne’e mosu espresaun sentidu kondolensia mai husi Diretor Centro Nacionál CHEGA!, Hugo Fernandes no emprezariu Rui Castro ne’ebé hamutuk ho matebian partisipa iha Talk Show ida iha TVE iha loron hirak liuba mós sente hakfodak tebes ho lia-moruk ne’e.
“Bro ita rua hasoru malu ikus iha TVE sai panel ba debate Partido politiku “FRETILIN, KHUNTO ho CNRT” hare bro di’ak hela, tanba sa dader ne’e rona notisia la di’ak ne’e bro,” espresa Rui Castro iha nia konta media sosial Facebook, Sesta, 17 Marsu 2023.
Valor moris
Ema barak nia moris-naruk no barak mak mate ho otas-nurak. Moris naruk mak di’ak liu kompara ho moris badak? Ida ne’ebé determina valor moris la’os moris naruk, maibé nia kualidade.
Bainhira ema oho Jesus Cristo iha foho Calvario nia tutun, Nia foin mak halo tinan 30 resin. Santa Therecia Lisieux mate ho tinan 20.
Anne Frank mate ho otas nurak. Maibé, sira nia moris badak ne’e kontinua rezulta fuan (valor) to’o ohin loron hanesan Sisto Dos Santos ne’ebé durante ne’e dedika aan tomak hodi defende povu kbi’it la’ek sira nia direitu iha área oioin.
Fizikamente, Sisto ohin ba oin la eziste ona, la moris ona iha planeta mundu ne’e, maibé ninia kontribuisaun, nia advokasia iha era independensia sei moris nafatin ba jerasaun ativista foun sira iha rai-laran.
Moris naruk nu’udar grasa ida, se hanoin didiak moris ne’e, no formula ema sai sabedoria, santu, no nakonu ho agradesementu.
Mai ita esforsu atu hatudu ba ita nia maluk sira katak, maske sira nia moris badak, moris ne’e nafatin iha valor ne’ebé rohan la’ek.
Mate nu’udar partida ida
Mate nu’udar partida (keberangkatan) ka nu’udar tranzisaun ida ba moris foun. Ita rona di’ak tebes, maibé ita lakohi tranzisaun ne’e.
Dalaruma ita sei hetan tulun bainhira ita konsiente katak hakat ikus nian hakat uluk ona husi hakat tranzisaun antes sira.
Bainhira ita moris, ita muda husi moris útero ba moris familia nian. Bainhira ita tama eskola, ita muda husi moris familia ba moris komunidade ne’ebe boot. Bainhira ita kaben, ita muda husi moris ne’ebé iha opsaun barak ba moris ne’ebé kesi metin ba privadu ida.
Bainhira ita reformadu ona, ita muda husi moris ne’ebé ho serbisu klaru ba moris fali iha moris ne’ebé ezije kreatividade no sabedoria (bijaksana).
Kada hakat tranzisaun ne’e nu’udar mate ne’ebé lori ita ba tama iha moris foun. Se ita hanoin ho didiak, ita preparadu atu foti ain hodi hakat ba hakat tranzisaun ikus nian.
Sisto Dos Santos ho lais tebes hakat to’o ona hakat tranzisaun ikus nian.
Sentidu kondolensia ba familia tomak, no hakmatek iha reinu Lalehan.
Redasaun.
