RAÇA (TOP) – Kompañia York Transport hasai inisiativa rasik hodi anima komunidade sira liu husi eventu desportivu iha suku laran.
Inisiativa ne’e hanaran York Transport Cup nu’udar desportu amizade ba joven sira hotu atu espresa sira nia talentu ida-idak liu husi futebol. York Transport nu’udar kompañia ida ne’ebé iha inisiativa rasik hodi anima komunidade sira iha suku Raça liu husi jogu futsal ba loron Dies Natalis no tinan foun 2023.
York Transport Cup ne’e ho objetivu atu kria paz, hametin unidade entre juventude sira tantu iha suku Raça rasik no suku viziñu sira. Eventu ne’e hetan suporta mazimu husi kompañia York Transport, konsellu suku Raça, no komunidade suku Raça tomak.
Orsamentu ne’ebé kompañia York Transporta aloka bai ha eventu desportivu ne’e hamutuk $3000. Osan sira ne’e komisaun organizadora utiliza ba fó premiu ba manan nain sira, lojistika no seluk tan.
Ekipa ne’ebé rejistadu iha York Transport Cup ne’e mak kompostu husi ekipa mane senior hamutuk 14, mane junior iha ekipa 6, ekipa feto senior hamutuk 5, no feto junior hamutuk 3.
Xefe Suku Raça, Armindo Benezato hateten, loron 07 Dezembru nu’udar loron ida importante tebes ba istoria luta libertasaun nasionál Timor-Leste, tanba iha loron ne’e mak rezulta ema barak mate hodi liberta Timor-Leste husi okupasaun illegal militar Indonézia nian.
Nia hatutan, durante nia mandatu nu’udar xefe suku desde tinan 2016 to’o ohin loron, sempre halo atividade ki’ik ida iha fulan Dezembru nia laran hodi anima komunidade sira iha suku laran.
“Momentu ne’eba se ha’u la sala, York Transport mós hateten ita sei halo eventu ida iha Dezembru ne’e nia laran, maibé tinan ida ne’e ha’u agradese ba York Transport ne’ebé mak suporta maka’as ita nia alin sira atu hala’o eventu ne’e iha suku laran,” hateten xefe suku Armindo.
Nia hatutan, nain ba York Transport sai duni husi suku Raça, nia moris fatin mak suku Raça, sai husi ne’e ba buka moris, ohin loron nia hetan ona bukae itoan mak ohin loron nia fila mai anima nia maun-alin sira, nia juventude sira, nia inan-aman sira iha suku ida ne’e.
“Ida ne’e sai ezemplar ida ba ita hotu, ezemplar boot ida ba imi joven sira aban bainrua sei sai boot, sai ba fatin ruma mak hetan buat ruma husi imi nia serbisu keta haluhan hanoin hikas mós imi nia fatin moris, hanoin hikas imi nia inan-aman sira husi suku ne’ebé imi moris ba,” nia sujere.
Nia hatutan, eventu desportiva ne’e atu komemora loron moris Na’i Jesus Cristo nian, no komemora loron invazaun militar Indonézia mai Timor-Leste, no suku Raça mós partisipa maka’as ba luta libertasaun nasionál ne’ebé koñesidu ho Zona 7 Dezembru.
“Esensia husi jogu futsal ne’e mak atu halo joven sira hadomi malu, kria paz ba malu, no hametin unidade entre sira no ho joven sira husi suku viziñu,” nia hateten.
Iha fatin hanesan, eis Sekretariu Jeral Federasaun Futebol Timor-Leste (FFTL), Nelyo Isac Sarmento hateten, nia prezensa iha suku Raça atu ajuda de’it diretor York Transport, João Fernandes atu oinsa bele realiza eventu futsal ne’e hodi selebra loron boot Santo Natal inklui eventu istoriku 7 Dezembru.
“Primeiru hakarak agradese ba maun João, tanba Lospalos oan sira barak iha fatin barak, maibé pelu-menus ita iha maun João ne’ebé suporta ita. Suporta la’os buat ida ne’ebé boot atu halo ita kontente de’it, maibé pelu-menus inisiativa ida ne’e atu lori ita hare hanesan familia ida,” hateten Nelyo.
Nia hatutan, bainhira atu lori suku no nasaun ne’e bao in, bainhira ema hotu hare malu nu’udar ema ida de’it.
“Tanba ne’e mak atividade desportu ne’ebé ohin ita boot sira halo ne’e ninia filozofia ne’e mai husi filozofia futebol ne’e rasik katak, ne’e ita joga ekipa. Se ita mesak de’it imposivel ita atu hatama golu. Ita mesak de’it imposivel ita atu manan. Maibé, sei ita joga ekipa, ita pasa bola malu hatama golu mak ita sei hetan vitoria,” eis Sekretariu Juventude no Desportu (SEJD) ne’e esplika.
Nia dehan filozofia ne’e hanesan moris iha moris lorloron nian iha aspetu dezenvolvimentu nian katak, ema ida de’it bele halo buat hotu, no hare ema seluk hanesan inimigu mak sei la alkansa objetivu ne’ebé hakarak lori rai no povu ne’e ba moris di’ak.
Diretor kompañia York Transport, João Fernandes hateten, nia hakarak eventu desportivu ne’e bele la’o ho di’ak hodi nune’e bele kontinua ba oin kada tinan.
“Ha’u hakarak ha’u nia alin sira joga ho di’ak de’it, labele hamosu problema ba malu atu nune’e ita nia joga ne’e bele hala’o kada tinan, ha’u rasik mak sei hamrik iha oin hodi apoia,” hateten diretor York Transport, João Fernandes.
