DILI (TOP) – Familia boot liu-rai Qatar (The Qatari Royal Family) hato’o konvite espesial ba Sekretariu Jeral Partidu CNRT, Dato Sri Francisco Kalbuadi Lay hodi ba asiste diretamente jogu semi-final no final kopa mundial nian ka FIFA World Cup iha kapital Doha, Qatar.
Konvite espesial ne’e mai direta husi ulun boot Asosiasaun Futebol Qatar nian, Sheikh Hamad bin Khalifa bin Ahmed Al Thani no Prezidente Comitê Olímpico Qatar, Sheikh Joaan bin Hamad Al-Thani ne’ebé nu’udar mós familia boot liu-rai Qatar nian (the Qatari royal family).
Dato Sri Francisco Kalbuadi Lay hateten, nia mós simu prezente furak ida mak kamizola ekipa nasionál Qatar nian ho “ númeru 22 Lay” husi Prezidente Asosiasaun Futebol Qatar no Prezidente Comitê Olímpico Qatar nu’udar simbolu amizade ida.
Atual sekretariu jeral partidu CNRT ne’e hatutan, durante iha kapital Doha, nia mós hasoru malu ho Prezidente Fédération Internationale de Football Association (FIFA), Giovanni Vincenzo Infantino, Prezidente Asian Football Confederation, Shaikh Salman bin Ebrahim Al Khalifa.
Antes ne’e, iha Setembru 2021, eis Ministru Turizmu Arte no Kultura ne’e hetan fiar nu’udar prezidente ba kompetisaun Asean Football Federation (AFF) to’o tinan 2023.
Dato Sri Francisco Kalbuadi Lay koñesidu tebes iha mundu futebol nian, tanba durante tinan barak assume kargu importane lubuk ida iha estrutura futebol nian tantu iha nivel rejional no mundial nian. La’os de’it okupa kargu importante sira iha mundu futebol iha rejional no iha FIFA, maibé nia mós iha kapasidade halo negosiasaun (loby).
