AILEU (TOP) - Federsaun Futebol Timor-Leste (FFTL) reprezenta husi Diretór Kompetisaun FFTL, João F. Campos akompaña husi Member Assosiations Development (MAD) FFTL, Crisogno da Costa halo abertura ba jogu Sub-17 mane no feto, ne'ebe organiza husi Assosiasaun Futebol Munisipiu Aileu, iha loron 30 Maiu 2025.
Diretór Kompetisaun FFTL, João F. Campos hato'o hela preokupasaun Prezidente FFTL, Nilton T. Gusmão dos Santos nian katak, prezidente labele partisipa iha eventu ne'e tanba okupadu hela ho ekipa selesaun nasionál atu partisipa jogu hasoru Maldivas iha loron 10 Juñu 2025 iha Australia, ne'ebé Timor-Leste mak sai hanesan uma na'in iha Darwin.
Diretór Kompetisaun FFTL mós hato'o agradese wa'in ba Prezidente Assosiasaun Futebol Aileu no komisaun organizadóra sira hotu, ne'ebé ho vontade tomak organiza ona jogu ba Sub-17.
Nune'e, esperansa boot ba Aileu tanba munisipiu ida ne'ebé ohin halo abertura ba jogu Sub-17 dala uluk liu entre munisipiu sira hotu, espera katak tempu tuir mai jogadór balun husi Aileu sei bele reprezenta mós Aileu iha nasionál.
Iha fatin hanesan, Prezidente Assosiasaun Futebol Munisipiu Aileu, Grigorio C. Q. F Martins hateten, abertura jogu ne'e ba Sub-17 mane mak joga uluk, depois kontinua fali Sub-17 ba feto.
Programa FFTL nian ne'e, ho hanoin ida atu kaderniza jogadór sira husi ki'ik to'o boot atu bele garante jogadór sira husi baze mak sa’e ba nasionál.
Kompetisaun ba jogu ne'e, iha klube ba mane hamutuk 9 mak partisipa, ne'ebé iha abertura loke husi ekipa rua ho rezultadu jogu FC UNIVENTO 4-3 UMSAL, iha tempu tuir mai mós sei kontinua fali jogu Sub-17 feto, ne'ebé klube rejistadu ona hamutuk haat mak sei partisipa.
Alende ne'e, Prezidente Komisaun Organizadóra ba eventu, Jeremias M. De Carvalho mós hato'o relatoriu jerál katak, apoiu orsamentu ba eventu ne'e mai husi FFTL, nune'e la haluha hato'o agradese ba FFTL, juventude Aileu, autoridade lokal, seguransa no komunidade sira hotu ne'ebé ho vontade kontribui ona ba joga ne'e.
Jogu abertura ne'e, organizadu tebes tanba kompleta ho Match Commissioner, árbitrazem, médiku no seguransa sira.
Serimónia abertura ne'e, prezensa husi Prezidente Assosiasaun Futebol Munisipiu Aileu, Grigorio C. Q. F Martins ho nia estrutura, Diretór Kompetisaun FFTL, João F. Campos, Member Associations Development (MAD) FFTL, Crisogno da Costa, reprezentante husi Administradór Postu Administrativu Aileu Vila, Domingos Vidigal, no komunidade sira iha Aileu.
