DILI (TOP) - Governu Timor-Leste liuhusi reuniaun Konsellu Ministru, aprova ona proposta Federasaun Futebol Timor-Leste (FFTL) nian, ne'ebé atu halo reabilitasaun ba Estádiu Municipál Dili no halo tán konstrusaun foun ba Estádiu ho kampu futsal indoor padraun internasionál iha Tasi-tolu, Dili.
Proposta ne'e, hetan aprovasaun hafoin Prezidente FFTL, Nilton T. Gusmão dos Santos, Sekretáriu Jerál FFTL, José Adilson Ribeiro ho ekipa aprezenta iha reuniaun Konsellu Ministru, ne'ebe lidera direita husi Primeiru-Ministru, Kay Rala Xanana Gusmão, iha loron Kuarta, 04 Juñu 2025.
Presiza halo reabilitasaun ba Estádiu Municipál Dili, tanba estádiu irónika ne’ebé kleur ona sai sentru ba atividade futeból nasionál, nune'e presiza atualizasaun tuir kritériu sira iha padraun FIFA/AFC nian ba kompetisaun nasionál no internasionál sira.
Alende ne'e, presiza halo mós konstrusaun estádiu foun ida iha Tasi-tolu, ne’ebé dezeña nu’udar instalasaun modernu ho padraun internasionál, hodi apoia kreximentu desportu nian, formasaun, no nu'udar uma-na’in ba torneiu rejionál no internasionál sira iha futuru.
Tuir informasaun ne’ebé The Oekusi Post asesu husi pájina ofisial FFTL katak, Prezidente FFTL, Nilton Gusmão esplika, inisiativa ne'e la’ós de’it fó apoiu ba dezenvolvimentu futeból iha Timor-Leste, maibé parte ida nu'udar orgulho nacional, dezemvolvimentu desportu, turizmu ne'ebé bele kria mós impaktu sosio-ekonómiku, kria empregu, no hametin papél desportu nu’udar instrumentu ida hodi halibur ema-hotu.
Desizaun ne’e marka kompromisu governu nian hodi koloka desportu nu’udar parte integrante ba dezenvolvimentu nasionál, liu-liu hodi prepara jerasaun foun no hasa’e Timor-Leste nia prezensa iha palku futeból internasionál.
Maski hala'o de'it mandatu tinan ida, maibé Prezidente FFTL mós afirma nia kompromisu atu fó impaktu substansiál durante nia lideransa.
"Ha’u bele iha de’it tinan ida atu lidera FFTL, maibé ha’u determinadu atu halo ida-ne’e sai estraórdináriu", nia Afirma.
Konstrusaun ba estádiu rua ne'e, tuir planu sei hahú iha tinan 2025, ho kompletasaun ne'ebé hein iha tinan 2026. Projetu ne'e sei implementa iha ámbitu Parseria Públiku-Privadu (PPP) entre FFTL ho Governu Timor-Leste liuhusi Ministériu Planeamentu Investimentu Estratéjiku (MPIE).
Reabilitasaun ba Estádiu Municipál Dili, ne'ebe atu aumenta tribuna parte leste ho 2.000 bankadas, no konstrusaun ba Estádiu foun ho kapasidade 15.300 lugares.
Rezultadu aprovasaun ba proposta ne'e, Prezidente FFTL, Nilton T. Gusmão dos Santos, lori FFTL nia naran, hakarak hato’o apresiasaun no agradesimentu kle’an ba Primeiru-Ministru, Kay Rala Xanana Gusmão no membrus IX Governu Konstitusionál tomak, tanba aprova ona proposta FFTL nian kona-ba reabilitasaun Estádiu Munisipál Dili no konstrusaun estádiu no futsal indoor foun ida iha Tasi-Tolu.
Tanba, aprovasaun ne’e reflete kompromisu maka’as Governu nian hodi apoia progresu futebol nasionál no dezenvolvimentu infraestrutura desportiva ne’ebé dignu ba povu Timor-Leste tomak. Ida ne’e hanesan pasu istóriku ida ne’ebé sei la hametin de’it fundasaun desportu nian, maibé mós sei lori esperansa no entuziazmu foun ba jerasaun foun no sosiedade hadomi-na'in futeból sira hotu ho HANOIN IDA ATU TRANSFORMA FUTEBÓL SAI ORGULHO NACIONAL.
