LOSPALOS (TOP) – Taça Rotativa Avó Nana ne’ebé hala’o iha inisiu fulan Novembru tinan ida ne’e remata ona ho susesu tebes, tanba maske iha ekipa hamutuk 32 mak partisipa iha eventu desportivu ne’e, maibé laiha problema boot ruma akontese to’o remata.
Prezidente Komisaun Organizadora ba eventu ne’e hateten, desde inisiu Novembru sira konsege rejista ekipa futebol hamutuk 32 mak ba rejistu hodi tuir eventu desportivu ne’e ho intensaun no objetivu atu hametin liu-tan lasu amizade entre juventude sira iha rai Fataluku, munisipiu Lautem.
“Ohin ita akompaña ona katak, FC Tokodede mak sai manan-nain ba Taça Avó Nana, FC Boca Junior mak segundu lugar, terseiru lugar FC Mailuan, no kuatru lugar mak FC Lereloho. Primeiru, hakarak agradese ba klubu hotu ne’ebé mai partisipa iha eventu ne’e, agradese mós ba parte hotu-hotu, no agradese mós ba Sekretariu Jeral Partidu CNRT, Francisco Kalbuadi Lay maske ohin lahamutuk ho ita iha fatin ida ne’e,” hateten Prezidente Komisaun Organizador.
Iha fatin hanesan, Prezidente Autoridade Munisipiu Lautem, Domingos Savio hateten, naran ida Kaka Lafai ne’e mosu iha rai Fataluku, tanba ne’e nia prefere taça ne’e tau fali Kaka Lafai Cup.
Nia hatutan, antes hala’o Taça Rotativa Avó Nana, ekipa komisaun organizadora ba hasoru nia kona-ba oinsa bele realiza eventu desportivu ne’e. Savio fó resposta katak, di’ak bele realiza ba, tanba munisipiu Lautem ne’e ki’ak ho divertimentu.
“Maibé, ha’u husu taça Avó Nana ne’e Timor hotu-hotu nia Avó, bele hala’o laiha problema. Entaun, iha komisaun nia laran labele hare ba kór no grupu, no sira aseita involve joven hotu-hotu iha munisipiu Lautem,” esplika Domingos Savio.
Nia dehan, durante jogu futebol ne’e remata ho di’ak maske mosu problem aida-rua, maibé konsege rezolvidu.
“Ha’u mós louva juventude hotu kuaje klubu 30 resin ne’ebé partisipa iha eventu ne’e halo joven sira komesa iha ona konsiensia hodi hametin unidade ba malu. Governu bele troka malu, maibé tenke dezenvolve desportu,” nia hateten.
Iha fatin hanesan, lider nasionál, Kay Rala Xanana Gusmão hateten, juventude sira iha munisipiu Dili durante ne’e sempre halo problema ba malu hodi estraga sasan, no liu husi atividade desportu ne’e ho objetivu atu hametin liutan relasaun entre joven sira hodi hadomi malu, no respeita malu.
“Tanba ne’e mak ita halo eventu hanesan ne’e, kompetisaun hanesan ne’e para imi joven sira hasoru malu joga manan ka lakon importante mak ita tenke iha unidade ba malu hodi labele estraga malu, tanba nasaun nia future maki ha imi joven sira,” hateten Xanana.
“Joven sira tenke hadomi malu hodi nune’e ita bele fó onra ba ita nia martir sira, ohin dia 7 de Dezembru. Tanba ne’e mak ha’u husu nu’udar mós guerileiru oan ida ne’ebé uluk iha funu laran, ha’u husu ba maluk sira tomak ne’ebé uluk akompaña funu iha kada suku atu hakerek istoria suku nian kona-ba prosesu luta ba libertasaun nasionál”.
Xanana kontinua fó em faze ba assuntu ne’e, atu aproveita ferik-katuas sira ne’ebé uluk involve direita bai ha luta ba libertasaun nasionál tenke konta istoria moruk ne’e ba jerasaun foun sira hodi istoria ne’e bele sai rohan la’ek, labele lakon no mohu iha tempu ruma.
Taça Rotativa Avó Nana ne’e lansa husi Sekretariu Jeral Partidu CNRT, Dato Sri Francisco Kalbuadi Lay iha loron 4 Novembru 2022 no ensera husi Kay Rala Xanana Gusmão iha loron 07 Dezembru 2022 ne’ebé partisipa husi ema rihun ba rihun.
