AMBENO (TOP) – DALAN nu’udar kompañia ne’ebé hetan serbisu dezeñu no planeamentu husi Rejiaun Administrativa Espesiál Oé-Cusse Ambeno (RAEOA), asina kontratu ho montante USD 470.000 iha loron 15 Abríl 2015 ba masterplan kompleksu administrativu no projetu edifísiu administrativu foun, maibé proposta ne’ebé nia aprezenta iha fulan Jullu 2014 ba reabilitasaun edifísiu ne’ebé iha valór USD 230.000 de’it. Kámara Kontas, iha Tribunál Rekursu, husu RAEOA atu justifika diferensa USD 240.000 iha Relatóriu Auditoria N.º 1/2018.
Tuir dokumentu auditoria sira ne’ebé The Oekusi Post (TOP) iha hatudu katak, DALAN mós hetan kontratu USD 250.000 iha 2014, tuir nia proposta Jullu 2014, ba projetu ezekusaun reabilitasaun no ampliasaun kondomíniu habitasionál iha Pante Makassar, ne’ebé selu 70% ona iha tinan hanesan. Servisu konsultoria ba kompleksu rezidensiál no Planu Ordenamentu Ataúro mós adjudika ba Dalan liuhosi ajustu diretu, no tuir Kámara Kontas la iha justifikasaun ba ida ne’e.
Le’e mós: Alkatiri estraga povo nia osan milaun U$11,6harii hotel "fantasma" ida iha Oeupu

Dokumentu sira ne’ebé The Oekusi Post (TOP) konsulta la fó naran kompletu kompañia nian, nasionalidade, na’in ka ligasaun ho ema ruma; relatóriu uza deit naran “DALAN”. Dokumentu sira ne’e mós la hatudu ligasaun entre Dalan no SAMHEE, kompañia konstrusaun husi Korea Sul ne’ebé konstrui edifísiu administrasaun RAEOA.
Ida ne’e parte dezeñu nian de’it. Iha loron 1 Fevereiru 2017, Autoridade RAEOA hahú asina kontratu ida ho kompañia SAMHEE Construction, Co. Ltd husi Korea Sul, ho montante milaun US$10.900.033,37, atu konstrui edifísiu foun Administrasaun RAEOA nian ho durasaun fulan 18. Maibé durante tinan 10 ona, desde 2017 to’o ohin loron, edifísiu ne’e seidauk remata hela de’it.
Maske nune’e, durante Arsenio Paixão Bano nia mandatu nu’udar Prezidente Autoridade RAEOA/ZEESM-TL, tuir dadus husi portal eProcurement hatudu katak RAEOA kontinua adjudika serbisu ba SAMHEE iha periodu 2021–2022: projetu haat ho total USD 376.148,73, tolu “Single Source” (adjudikasaun direta) no ida RFQ.

Responsavel RAEOA sira, liuliu Mari Bim Amude Alkatiri no Arsénio Paixão Bano, rejeita imputasaun ilegalidade ruma. Iha resposta kontraditóriu ne’ebé hato’o iha loron 14 Maiu 2018, sira dehan katak kontratu kondomíniu asina husi Primeiru-Ministru iha tempu ne’ebá, katak diferensa folin mosu tanba proposta foun atu demolisaun edifísiu ne’ebé iha no harii foun, no katak edifísiu ne’ebé iha labele reabilita ho garantia durabilidade.
Kontratu dahuluk: kondomíniu USD 250.000, selu molok kontratu to’o RAEOA
Tuir Relatóriu Auditoria N.º 1/2018 (Vol. I, pontu 2.8.6.1, pájina 135–136), iha 2014, tuir proposta ne’ebé Dalan aprezenta iha Jullu tinan ne’ebá, selebra kontratu atu elabora Projetu Ezekusaun ba reabilitasaun no ampliasaun kompleksu Kondomíniu Habitasionál iha Pante Makassar, ho valór USD 250.000. Husi montante ne’e, 70% selu ona iha tinan hanesan.
Kámara Kontas hakerek katak, maski husu dala barak durante servisu kampu ba servisu Sekretaria Rejionál ba Finansas, dala barak kontratu ne’e haruka mai Kámara Kontas deit iha faze kontraditóriu. Iha tempu ne’ebá Sekretaria Rejionál ba Finansas RAEOA nia xefe mak Leonia Monteiro. Responsavel sira justifika katak, tanba kontratu ne’e selebra husi Primeiru-Ministru iha tempu ne’ebá, “iha tempu Auditoria [iha Juñu 2016], RAEOA la iha kontratu ne’ebé husu, no hetan de’it depois”.

Auditor sira la simu justifikasaun ne’e. Sira hakerek katak sira la bele la hakfodak, tanba maski kontratu la selebra husi Prezidente Autoridade, RAEOA mak selu ida ne’e iha tinan 2014. Tuir komprensaun Kámara Kontas nian, RAEOA halo pagamentu ba projetu konstrusaun edifisiu ne'e sem contrato. Ida ne'e estrañu tebes.
Iha resposta, responsavel sira repete katak kontratu atu elabora projetu ezekusaun ba kompleksu rezidensiál la selebra husi RAEOA, maibé autoriza husi ADN nu’udar entidade outorgante no asina husi Primeiru-Ministru iha tempu ne’ebá (dokumentu n.º 9 ne’ebé sira hatama). Tanba ne’e, sira dehan, iha tempu auditoria RAEOA la iha kontratu ne’ebé husu, no hetan deit depois. Sira sujere mós katak esklaresimentu adisionál tenke husu ba entidade kontratante.

Kontratu daruak: masterplan no edifísiu administrativu USD 470.000
Iha 15 Abríl 2015, RAEOA selebra kontratu ba “Konsepsaun estudu Masterplan Kompleksu Administrativu Rejiaun nian no Projetu Arkitetura no Projetu Espesialidade ba Edifísiu Administrativu Foun”, ho folin USD 470.000. Maibé, Kámara Kontas nota katak proposta ne’ebé kompañia aprezenta iha Jullu 2014 ba projetu ne’e iha valór USD 230.000. Tanba ne’e, auditor sira husu ona RAEOA atu aprezenta justifikasaun ba diferensa USD 240.000, ne’ebé halo kontratu final liu proposta inisiál ho dobru. Kontratu rua ho DALAN (USD 250.000 no USD 470.000) hamutuk valór USD 720.000.
Esplikasaun RAEOA: edifísiu ne’ebé iha “labele” reabilita
Iha kontraditóriu, responsavel sira afirma katak proposta ne’ebé DALAN aprezenta inísiu refere ba reabilitasaun edifísiu ne’ebé existe, no depois deside atu halo demolisaun ba nia no konstrui edifísiu foun, ne’ebé sai objetu proposta foun husi kompañia hanesan. Tanba ne’e, sira konsidera pergunta ne’ebé auditor sira hatu’ur esklarese ona.

Resposta kompletu ne’ebé hato’o iha Vol. II, parágrafu 399 to’o 408 (pájina 47–48 husi resposta), hatán nune’e:
- Parágrafu 399 no 400: kontratu atu elabora projetu ezekusaun kompleksu rezidensiál la selebra husi RAEOA, maibé autoriza husi ADN nu’udar entidade outorgante no asina husi Primeiru-Ministru iha tempu ne’ebá (dokumentu n.º 9). Tanba ne’e, iha tempu auditoria, RAEOA la iha kontratu ne’ebé husu, hetan deit depois.
- Parágrafu 401: situasaun ne’e sujere katak esklaresimentu adisionál ruma tenke husu ba entidade kontratante.
- Parágrafu 402: kona-ba kontratu ba konsepsaun no estudu masterplan kompleksu administrativu, importante atu esklarese katak la iha dezkonformidade ruma.
- Parágrafu 403: proposta ho valór USD 230.000 loloos aprezenta husi DALAN ba ADN, ba projetu reabilitasaun edifísiu ne’ebé existe.
- Parágrafu 404: maski nune’e, komprende katak estrutura ne’ebé existe la bele hetan reabilitasaun ne’ebé garante integridade no durabilidade edifísiu, tanba ne’e vantajoza liu husi ponto de vista ekonómiku atu konstrui edifísiu administrativu foun.
- Parágrafu 405 no 406: ida ne’e bele verifika iha narrasaun proposta DALAN, no hatama ona iha prosesu auditoria, ho objetivu atu hetan edifísiu ne’ebé garante durabilidade no relasaun kustu-benefísiu ne’ebé apropriadu.
- Parágrafu 407: tanba revizaun projetu ne’ebé ambisiozu liu no ho área intervensaun boot liu, DALAN aprezenta proposta foun ba demolisaun edifísiu ne’ebé existe no hamriik edifísiu administrativu foun, ho valór USD 470.000 (dokumentu n.º 25, ne’ebé responsavel sira hatama no konsidera reproduz totalmente).
- Parágrafu 408: tuir proposta ikus ne’e mak selebra kontratu ho DALAN ho valór USD 470.000, ba design projetu ida ba edifísiu administrativu foun, no reabilitasaun edifísiu anterior la akontese.
Iha resposta ne’e, responsavel sira esplika katak aumentu valór mosu tanba mudansa eskopu: husi reabilitasaun ba demolisaun no konstrusaun foun, ho “área intervensaun boot liu”. Responsavel sira la hatudu, iha parte ne’ebé TOP konsulta, estudu téknikú ka relatóriu independente ruma ne’ebé hatudu katak edifísiu ne’ebé iha labele reabilita; sira refere de’it ba narrasaun proposta DALAN nian.
Ajustu diretu: Kámara Kontas dehan norma la basta (la sufisiente) ka la kompletu
Iha Vol. I (pájina 96–98), Kámara Kontas analiza mós estudu masterplan kompleksu administrativu (USD 470.000, n.º orden 6) husi perspetiva prosedimentu aprovizionamentu. Auditor sira hakerek katak, dala ida ne’e, responsavel sira atribui responsabilidade ba ADN, maibé la aprezenta dokumentu ka pareser ruma husi entidade ne’e kona-ba prosesu ne’e. (Nota rodapé 85 iha relatóriu refere ba auditoria seluk, ba Komisaun Nasionál Aprovizionamentu, Relatóriu Auditoria n.º 5/2015, no auditoria Segimentu ba Programa Objetivu Dezenvolvimentu Milénniu Fundu Infrastrutura, Relatóriu Auditoria n.º 1/2017.)

Maski nune’e, responsavel sira aprezenta justifikasaun ba rekursu ba ajustu diretu, hodi afirma katak nia halo tuir alínea a) artigu 94 Rejime Jurídiku Aprovizionamentu (RJA): “Iha nesesidade urjente, la-previzivel no la provoka husi benefisiáriu aprovizionamentu relativu ba obra, sasán ka servisu, nune’e la prátiku atu hahú prosedimentu konkursu ka métodu aprovizionamentu seluk”.
Kámara Kontas la simu argumentu ne’e, ho razaun sira tuir mai:
- Atu fundamenta rekursu ba ajustu diretu la basta (la sufisiente) ka la kompletu, hanesan akontese iha kazu ne’e, halo eskolla depois ba alínea ida husi artigu 92 no 94 RJA. La basta invoka norma, no la enumera faktu sira ne’ebé komprova kumprimentu, iha kazu konkretu, rekizitu sira ne’ebé lei impoin. La basta (la sufisiente) ka la kompletu mós “sublinha” testu.
- Ajustu diretu mak prosedimentu eksesionál. Bainhira posivel, tenke fó preferénsia ba prosedimentu konkursu públiku, ne’ebé rezulta ho forma klaru husi n.º 1 artigu 44 no n.º 3 artigu 47 RJA.
- Lei la define hanesan rekizitu úniku ba ajustu diretu verifikasaun (i) urjénsia, (ii) la-previzibilidade urjénsia nian, no (iii) la provoka husi benefisiáriu prosedimentu. Nia impoin mós verifikasaun imposibilidade prátika atu realiza prosedimentu konkursu ka métodu aprovizionamentu seluk.
- Ezemplu tipiku situasaun ne’ebé bele justifika ajustu diretu tuir artigu 94 mak sira ne’ebé kauza husi fenómenu naturál, hanesan bee-boot ka rai-nakdoko, ne’ebé kauza situasaun emerjénsia la bele antesipa no la kauza husi ema.
- Responsavel sira, karik tanba haluha, la refere n.º 2 artigu 94 RJA, ne’ebé estabelese katak kontrata liuhosi ajustu diretu deit “sasán, obra ka servisu sira ne’ebé estritamente nesesáriu atu remedia situasaun emerjénsia no fó resposta ba karénsia imediata sira”, buat ne’ebé konsistente ho situasaun relasiona ho fenómenu naturál.

Kámara Kontas konklui, ho liafuan klaru: buat ida ne’e la iha relasaun ho konstrusaun edifísiu administrativu. Ba kontráriu, desizaun atu konstrui Edifísiu Administrasaun rezulta husi desizaun Prezidente Autoridade nian, inerente ba jestaun Rejiaun, ne’ebé tenke tuir trámite normál no legál ne’ebé aplika ba aprovizionamentu públiku. Hakarak halo ema fiar katak konstrusaun edifísiu administrativu rezulta husi okorrénsia sirkunstánsia urjente no la-previzivel, tuir auditor sira, la iha adezaun ba realidade faktu sira.
Auditor sira aumenta tan katak servisu konsultoria atu elabora dezeñu edifísiu administrativu, kompleksu rezidensiál no Planu Ordenamentu Ataúro, hotu adjudika liuhosi ajustu diretu ba Dalan, no la aprezenta justifikasaun ruma ba ida ne’e.
Edifísiu ne’ebé hahú, no seidauk hotu: istória SAMHEE
Relatóriu Auditoria N.º 1/2018 iha parte ida deit kona-ba edifísiu ne’e: kontratu elaborasaun projetu no masterplan (USD 470.000). TOP la hetan seksaun ba konstrusaun fíziku iha relatóriu ne’e. Dokumentu sira ne’e mós la hatudu diretamente katak dezeñu DALAN nian mak edifísiu ne’ebé kompañia SAMHEE konstrui. Maibé istória konstrusaun nia rasik, ne’ebé TOP hakerek ona iha 12 Outubru 2022, hatudu saida mak akontese ba edifísiu administrasaun RAEOA nian.

Tuir reportajen TOP nian iha tempu ne’ebá, ekipa konjuntu husi Tribunal Distrital Oe-Cusse Ambeno, PNTL Rejiaun Administrasaun Espesial Oe-Cusse Ambeno, Prokuradoria Distrital no Batallaun Orden Públiku (BOP), lidera husi juiz Yudit Pamukas, tau police line ba armazen (gudang) no eskritóriu kompañia SAMHEE iha área Santa Rosa, suku Costa, Pante Makassar, iha Tersa 11 Outubru 2022, tuku 8:05 dadersan. Sira hetan kareta rua de’it iha fatin: Land Cruiser matrikula 25.921 no Hilux 4x4 matrikula A13.868. Razaun: kompañia abandona ona projetu durante fulan lima.
Detalle kontratu ne’ebé TOP rekoilla:
- Projetu hahú iha 1 Fevereiru 2017, ho valór kontratu inisiál total US$ 10.900.033,37 ba durasaun fulan 18. Tuir kontratu dahuluk, tenke hotu iha Agostu 2018.
- Empreza kontratada mak SAMHEE Construction, Co. Ltd husi Korea Sul.
- Iha 2020, autoridade RAEOA desidi estende kontratu ba fulan tolu tan. Iha 2022, projetu nafatin seidauk hotu no abandonadu tan durante fulan lima.
- Iha Tersa 23 Juñu 2020, bainhira Arsenio Paixão Bano foti kargu Prezidente Autoridade, nia vizita projetu no deskobre progresu físiku to’o 35% de’it. Maske nune’e, nia fó konfiansa nafatin ba kompañia no estende kontratu.
- TOPhatete katak SAMHEE hahú hatudu sintomas atu abandona projetu desde 2020, bainhira TOP publika notisia kona-ba Kuadru avizu administrasaun RAEOA nakles fahe rua iha 3 Abríl 2020. Kuadru avizu ne’e depois monta fali.
Iha 23 Juñu 2020, Bano hato’o ba jornalista sira iha fatin konstrusaun nia pozisaun kona-ba atraza projetu nian. Nia dehan: “Ita labele dehan kompañia viola ona kontratu, tanba bainhira laiha amenda kontratu ne’e oin seluk, maibé ita sempre amenda.” Nia hatutan katak, tuir esplikasaun husi tékniku sira, la bele termina kontratu hanesan ne’e de’it, maibé tenke estuda no fó oportunidade nafatin, no importante tenke fiskaliza.

Iha 2022, TOP la konsege hetan konfirmasaun husi Bano, tanba nia hala’o hela serbisu governu rejionál iha Bali, Indonézia. Diretór Obras Públiku RAEOA, Candido dos Reis Amaral, iha tempu ne’eba la hatudu kooperasaun ba entrevista, no hatete katak nia presiza hetan autorizasaun husi Tribunal molok bele koalia.
TOP mós hatudu iha tempu ne’ebá katak projetu ne’e nia lala’ok kuaze hanesan ho ró Haksolok, ne’ebé selu tomak iha 2017 no to’o 2022 seidauk mai. TOP mós hatete katak durante tempu naruk ema barak fiar katak empreza sira husi Korea Sul sempre halo projetu físiku ho lalais no kumpre durasaun kontratu, maibé persepsaun ne’e la akontese iha RAEOA.
Iha reportajen seluk, ho títulu “Kompañia SAMHEE ne’ebé Bano ‘adora’ abandona tan ona projetu edifisiu administrasaun RAEOA”, TOP hatete katak projetu ne’e “abandonadu” tanba Bano fó konfiansa maka’as ba kompañia iha tinan 2020, maske projetu la tuir kontratu ne’ebé tenke hotu iha Agostu 2018. TOP rekorda kontestu nomeasaun: hafoin FRETILIN susesu sai “ai-tonka” (viabiliza) governu atual, governu sentrál ezonera José Luis Guterres husi kargu Prezidente Autoridade RAEOA no nomeia fali Bano. Bano asume kargu ne’e no vizita projetu iha Tersa 23 Juñu 2020, no deskobre progresu físiku 35% de’it. SAMHEE halo ona violasaun kontratu molok tama 2020, tanba tenke entrega projetu ba RAEOA iha Agostu 2018, maibé Bano deklara katak kompañia la viola kontratu. Besik tinan lima husi 2018 to’o 2022, edifísiu seidauk hotu.

SAMHEE no portal eProcurement: USD 376.148,73 iha 2021–2022
Portal eProcurement Timor-Leste rejistu adjudikasaun haat ba SAMHEE Construction Co., Ltd (Vendor ID VS0531) husi RAEOA iha 2021 no 2022, ho total USD 376.148,73. Tolu husi rejistu ne’e mak “Single Source” (hamutuk USD 346.802,47) no ida mak RFQ ho valór USD 29.346,26. Rejistu boot liu, ho valór USD 322.673,55 ba pagamentu faktura rua, marka “RESTRICTED” iha portal; seluk hotu “PUBLIC”. Iha rejistu haat nia laran, kampu data asina kontratu, data hahú no data remata mamuk. TOP hetan kópia rejistu sira ne’e husi portal iha 19 Novembru 2026.
Tuir tempu publikasaun iha portal, rejistu sira ne’e hanesan:
|
Data publika |
ID portal |
Deskrisaun (resumu) |
Tipu |
Audiénsia |
Instituisaun |
Valór (USD) |
|
21-06-2021 |
909394 |
Kontentor ba Sekretáriu Rejionál Saúde (faktura Marsu 2021) |
Single Source |
Public |
Health Secretariat |
13.424,92 |
|
06-07-2021 |
917435 |
Pagamentu ba SAMHEE (faktura INV.2021-008 no INV 2021-09, 14 Abríl 2021) |
Single Source |
Restricted |
RAEOA and ZEESM Authority Office |
322.673,55 |
|
27-07-2021 |
926388 |
Reparasaun kontentor sira iha ZEESM (faktura Maiu 2021) |
Single Source |
Public |
RAEOA and ZEESM Authority Office |
10.704,00 |
|
26-07-2022 |
1078550 |
Pagamentu rehabilitasaun kontentor ba ekipa saúde COVID-19 iha sentru karantina |
RFQ – Goods and Services (VfM) |
Public |
Health Secretariat |
29.346,26 |
|
|
|
Total |
|
|
|
376.148,73 |
Total ne’e mai husi soma valór rejistu haat; TOP la hetan dokumentu seluk husi portal ka husi RAEOA.
Pagamentu USD 322.673,55: boot liu, no “restritu”
Rejistu ID 917435, ho referénsia 01-UJ/GABPA/RAEOA/VII/2021, deskreve nu’udar “Pagamentu ba Kompanha SAMHEE” ba faktura INV.2021-008 no INV 2021-09 husi 14 Abríl 2021. Nia tipu “Single Source”, instituisaun mak RAEOA and ZEESM Authority Office, no audiénsia “RESTRICTED”, ida ne’ebé la hanesan ho rejistu seluk. Iha portal, rejistu ne’e publika iha 6 Jullu 2021 tuku 16:50. Avaliasaun (“Bid Evaluation”) publika iha loron hanesan tuku 18:42, loron tolu molok prazu simu proposta (9 Jullu 2021). Adjudikasaun publika husi “batch” iha 11 Jullu 2021 tuku 00:35, ho SAMHEE CONSTRUCTION CO., LTD nu’udar vendor ida de’it.

Pagamentu USD 322.673,55: boot liu, no “restritu”
Rejistu rua husi Health Secretariat refere ba kontentor. Dahuluk (ID 909394) deskreve nu’udar “Kontentor ba Secretario Regional Saude” ho faktura SAM ZEESM-001 husi Marsu 2021, ho referénsia “Oe-Cusse, 25/05/2021”. Publika iha 21 Jun 2021, prazu 23 Jun, avaliasaun publika iha 7 Jullu, no adjudikasaun iha 11 Jullu 2021, valór USD 13.424,92.
Daruak (ID 1078550), ho referénsia 23/02/2021, deskreve nu’udar “Pagamentu Rehabilitasaun” ba kontentor lima ba transporte no instalasaun eskritóriu ba ekipa saúde ne’ebé prevene COVID-19 iha sentru karantina 2021. Nia tipu mak RFQ, publika iha 26 Jullu 2022, prazu 28 Jullu, avaliasaun no adjudikasaun publika husi “batch” iha 12 Agostu 2022 (tuku 09:33 no 10:20), valór USD 29.346,26. Ida ne’e mak rejistu ikus iha lista ne’e, iha fulan rua molok police line dada iha 11 Outubru 2022.
Reparasaun kontentor iha ZEESM: USD 10.704,00
Rejistu ID 926388, referénsia 176/RAEOA/GPA/UAFSK/VII/2021, deskreve nu’udar “Reparasaun KOntentor sira iha ZEESM”, ho faktura SAMHEE-ZEESM-May-001 husi Maiu 2021, naran vendor iha deskrisaun “SAMHEE-ZEESM Construction Co Lda”. Publika iha 27 Jullu 2021, prazu 30 Jullu, avaliasaun iha 3 Agostu, adjudikasaun iha 4 Agostu 2021, valór USD 10.704,00. Instituisaun mak RAEOA and ZEESM Authority Office.

Rejistu portal sira ne’e la refere ba kontratu edifísiu administrasaun. Sira hatudu katak, durante tempu hanesan, RAEOA nia entidade sira mós registu pagamentu no adjudikasaun seluk ba SAMHEE ba kontentor no reparasaun.
Padraun hanesan: argumentu “herdansa” iha kazu Hotel Pante Makassar
Argumentu ne’ebé Alkatiri no Bano uza kona-ba edifísiu administrativu, katak kontratu mosu husi Governu Sentrál no RAEOA la responsavel, mosu mós iha resposta ba auditoria kona-ba Hotel iha Pante Makassar (Hotel Ambeno, mós hanaran Hotel Oe-Upo). Iha Vol. II, resposta ne’ebé hato’o iha 14 Maiu 2018 husi Bano (nu’udar substitutu Prezidente Autoridade) no Alkatiri, argumentu prinsipál mak:
- Governu Nasionál, liuhosi Primeiru-Ministru iha tempu ne’ebá, fó orden atu hahú servisu iha 16 Juñu 2014, no empreza adjudikatáriu hahú obra iha Jullu 2014 (parágrafu 300). RAEOA kria formalmente liuhosi Lei iha 18 Juñu 2014, no Alkatiri hetan nomeasaun nu’udar Prezidente Autoridade liuhosi Dekretu Prezidente Repúblika N.º 22/2014 husi 25 Juñu 2014.
- Tanba ne’e, RAEOA dehan, nia la iha suporte dokumentál ba prosesu aprovizionamentu, no dokumentu sira tenke husu ba MTC/ADN (parágrafu 301). Iha parágrafu 306, sira dehan katak kontratasaun Timor Capital Partners Asia, Lda. liuhosi ajuste diretu rezulta husi prosesu ne’ebé Governu Sentrál dirije, no RAEOA la bele justifika prosesu ne’e.
- ADN deteta diverjénsia signifikativu sira iha folin no rekomenda hamenus ba USD 10.008.593,44 (parágrafu 448). RAEOA dehan katak Prezidente Autoridade esije kuidadu no rigór atu ADN verifika folin (parágrafu 447).
- Iha 20 Julhu 2017, Timor Capital Partners husu estensaun kontratu. Serbisu téknika Rejiaun nian fó parese katak la tenke simu estensaun, tanba progresu médiu obra besik 0,5 to’o 1% kada fulan, no empreiteiru la iha kapasidade finanseira. RAEOA hakotu kontratu tuir Klauzula 15.2 husi Kondisaun Jerál no foti pose administrativa ba obra iha 10 Setembru 2017. Sira prevee obra remata iha Julhu 2018 (parágrafu 455–463).
- Servisu adisionál no mobiliáriu: RAEOA dehan empreza nunka submete proposta projetu ka folin ba servisu adisionál ne’ebé husu (parágrafu 474–477). Ba fornesimentu mobiliáriu, adiantamentu USD 594.609,74 selu ba Timor Capital Partners, maibé sasán ne’ebé to’o la korresponde ho valór ne’ebé selu ona, no kontratu rezolve tanba la kumpre (parágrafu 506–514). RAEOA hatete iha prosesu verifikasaun foun no hanoin atu hatama prosesu judisiál (parágrafu 515).
- Supervizaun obra: kontratu USD 535.865. Kámara Kontas hato’o alegasaun pagamentu ilegál, inklui USD 5.694,00 ba local transportation. RAEOA dehan kontratu tipu Lump Sum, katak la presiza komprovativu despeza, no montante USD 5.694,00 devolve ona (parágrafu 485–497).
- Mobiliáriu USD 376.763,82 ne’ebé Timor Capital Partners fornese, ne’ebé Autoridade selu ona, la sai objetu desalfandegamentu nem pagamentu direitu aduaneiru (parágrafu 137). RAEOA nega ilegalidade no argumenta katak folin kontratu la inklui taxa aduaneira. Kámara Kontas imputa mós falta pagamentu direitu aduaneiru ba importasaun sasán at least USD 246.796,00 (parágrafu 126).
- Mobiliáriu ba Hotel Lifau (USD 48.125): kontratu selebra iha 15 Novembru 2015 liuhosi ajuste diretu, ho justifikasaun urjénsia, tanba Hotel Ambeno la prontu ba selebrasaun tinan 500 Mai-Hosi Portugés sira ba Timor-Leste no tinan 40 Proklamasaun Independénsia (parágrafu 185–193).

Iha kazu hotel, RAEOA mós refere ba kondisaun nu’udar “herdansa”: Rejiaun “hetan de’it relasaun kontratuál todan ida” ne’ebé Governu Sentrál halo. Resposta refere nafatin ba tinan 2015 nu’udar tinan ne’ebé servisu sira konsume tomak rekursu umanu RAEOA nian ba organizasaun selebrasaun 500 anos, hodi justifika atraza iha prosesu administrativu (parágrafu 450–452).
Transkrisaun dadus portal (tuir orijinál)
ID 909394
- Reference Number/PO: Oe-Cusse,25/05/2021
- Business Type: Construction
- Description: Kontentor ba Secretario Regional Saude factura hosi Kompnhia SAMHEE Construction Co.Ltd (Factura N.SAM ZEESM001 de Mar 2021
- Procurement Document Type: Single Source · Audience: PUBLIC
- Financing Institution: Autoridade Região Administrativa Especial Oecusse Ambeno - RAEOA
- Institution Department/Agency: Health Secretariat
- Published Date: 21-06-2021 · Proposal Reception Deadline: 23-06-2021
- Status: CLOSED_AWARDED · Award Date: 11-07-2021
- Contract Signing Date, Start Date, End Date: (mamuk)
- Awarded Vendors: VS0531 SAMHEE CONSTRUCTION CO., LTD · $13,424.92 · Total $13,424.92
- Log: (1) Procurement Document Publishing, ARSENIO, 21-06-2021 10:54 · (2) In Evaluation, ARSENIO, 21-06-2021 10:55 · (3) Bid Evaluation, ARSENIO, 07-07-2021 15:21 · (4) Close Awarded, batch, 11-07-2021 00:43
ID 917435
- Reference Number/PO: 01-UJ/GABPA/RAEOA/VII/2021
- Business Type: Construction
- Description: Pagamentu ba Kompanha SAMHEE (factura sira no,INV.2021-008 no No.INV 2021-09 husi 14 ABR 21
- Procurement Document Type: Single Source · Audience: RESTRICTED
- Financing Institution: Autoridade Região Administrativa Especial Oecusse Ambeno - RAEOA
- Institution Department/Agency: RAEOA and ZEESM Authority Office
- Published Date: 06-07-2021 · Proposal Reception Deadline: 09-07-2021
- Status: CLOSED_AWARDED · Award Date: 11-07-2021
- Contract Signing Date, Start Date, End Date: (mamuk)
- Awarded Vendors: VS0531 SAMHEE CONSTRUCTION CO., LTD · $322,673.55 · Total $322,673.55
- Log: (1) Procurement Document Publishing, ARSENIO, 06-07-2021 16:50 · (2) In Evaluation, ARSENIO, 06-07-2021 16:50 · (3) Bid Evaluation, ARSENIO, 06-07-2021 18:42 · (4) Close Awarded, batch, 11-07-2021 00:35
ID 926388
- Reference Number/PO: 176/RAEOA/GPA/UAFSK/VII/2021
- Business Type: Construction
- Description: Reparasaun Kontentor sira iha ZEESM, Fatura husi Kompanha SAMHEE-ZEESM Construction Co Lda (fatura N. SAMHEE-ZEESM-May-001 de Maio 2021
- Procurement Document Type: Single Source · Audience: PUBLIC
- Financing Institution: Autoridade Região Administrativa Especial Oecusse Ambeno - RAEOA
- Institution Department/Agency: RAEOA and ZEESM Authority Office
- Published Date: 27-07-2021 · Proposal Reception Deadline: 30-07-2021
- Status: CLOSED_AWARDED · Award Date: 04-08-2021
- Contract Signing Date, Start Date, End Date: (mamuk)
- Awarded Vendors: VS0531 SAMHEE CONSTRUCTION CO., LTD · $10,704.00 · Total $10,704.00
- Log: (1) Procurement Document Publishing, ARSENIO, 27-07-2021 16:53 · (2) In Evaluation, ARSENIO, 27-07-2021 16:53 · (3) Bid Evaluation, ARSENIO, 03-08-2021 17:20 · (4) Close Awarded, batch, 04-08-2021 02:07
ID 1078550
- Reference Number/PO: 23/02/2021
- Business Type: Construction
- Description: Pagamentu Rehabilitasaun of five % kontentor transport ans instlation for office, used for the health teams of the prevention of the covid 19 located at the quarentines centrs 2021
- Procurement Document Type: RFQ - Goods and Services (VfM) · Audience: PUBLIC
- Financing Institution: Autoridade Região Administrativa Especial Oecusse Ambeno - RAEOA
- Institution Department/Agency: Health Secretariat
- Published Date: 26-07-2022 · Proposal Reception Deadline: 28-07-2022
- Status: CLOSED_AWARDED · Award Date: 12-08-2022
- Contract Signing Date, Start Date, End Date: (mamuk)
- Awarded Vendors: VS0531 SAMHEE CONSTRUCTION CO., LTD · $29,346.26 · Total $29,346.26
- Log: (1) Procurement Document Publishing, ARSENIO, 26-07-2022 14:25 · (2) In Evaluation, ARSENIO, 26-07-2022 14:25 · (3) Bid Evaluation, batch, 12-08-2022 09:33 · (4) Close Awarded, batch, 12-08-2022 10:20
Rezultadu: osan barak, edifísiu abandonadu
Kompañia konsultoria Dalan no kompañia konstrutora SAMHEE durante ne’e hetan osan barak tebes iha RAEOA, maibé rezultadu finál mak edifísiu foun Administrasaun RAEOA nian sai abandonadu tiha durante tinan 10 ona.

