DILI (TOP) – Ministru Defeza Filomeno Paixão konfesa ona ba Prezidente Repúblika Francisco Guterres Lú Olo katak membru FALINTIL-Forsa Defeza Timor-Leste (F-FDTL) sei la hasoru tan problema kona-ba osan, tanba transfere tiha ona.
“Osan ba F-FDTL rezolvidu ona,” Ministru Defeza hateten liu husi Komunikadu ba Imprensa ne’ebé The Oe-Kusi Post asesu iha Pájina Ofisial Presidência da República Democrática de Timor-Leste, Tersa 16 Fevereiru 2021.
Antes ne’e, Xefe Estadu Maior Jenerál Lere Anan Timur, preokupa tebes ba atrazu transferénsia osan ba F-FDTL ne’ebé fó impaktu ba menus apoiu lojístiku ba operasaun Forsas Armadas ninian, liuliu relasiona ho implementasaun Estadu Emerjénsia.
Ministru Paixão argumenta, kestaun transferénsia orsamentu ne’ebé kleur itoan la’ós afeta de’it ba instituisaun F-FDTL maibé afeta mós instituisaun estadu barak.
