DILI (TOP) - Governu Timor-Leste liu husi Vise-Primeiru-Ministru no Ministru Koordenadór ba Assuntu Ekonómiku, Ministru Turizmu no Ambiente, Francisco Kalbuadi Lay atribui ona sertifikadu investimentu ba investor tolu ne’ebé hala’o ona sira nia investimentu iha rai-laran iha área oioin.
“Ohin ha’u hamutuk ho ekipa TradeInvest no mós emprezáriu timoroan sira, emprezáriu nasionál, ha’u sente kontente tebes hato’o parabéns ba sira kompañia tolu ne’e ne’ebé iha ona komitmentu, no sira hahú ona sira-nia negósiu iha tinan barak nia laran,” hateten Vise-Primeiru-Ministru ne’e ba jornalista sira hafoin remata atribui sertifikadu investimentu ba investor sira iha Gabinete Faról-Dili, Kinta, 26 Fevereiru 2026.
Vise-PM konsidera investor ne’ebé durante ne’e investe iha Ataúro halo ona exportasaun Budu Tasi Ataúro nian ba iha rai barak.
“Ne’ebé hanesan Ministru Koordenadór Asuntu Ekonómiku, sente kontente tebes, ida ne’e mak ita presiza hodi dudu nafatin setór privadu sira iha área oioin nune’e sira bele investe no Governu mós bele tau-matan ba sira servisu hamutuk liuliu ita bele kria kampo traballu no mós kria ekonomia ida sustentável ba futuru,” Vise-PM afirma.
Kompañia sira ne’ebé hetan ona Sertifikadu Investimentu mak hanesan; Aowen Caili Unipessoal, Lda, Lijuramosxdaily Unipessoal, Lda, no Galhos International Unipessoal, Lda.
Tuir Artigu 28, 29, 30 no 31 husi Lei Investimentu Privadu nian, ne'ebé aprova hosi Lei número 15/2017 iha loron 23 Agostu, no Artigu 5 hosi Dekretu Governu número 2/2018, deklara ho ida-ne'e katak investidór sira ne'ebé iha leten iha direitu atu hetan benefísiu espesiál ba iha Kapítulu VI Lei Investimentu nian, no mós benefísiu fiskál sira tuir mai ne'ebé fó ba sira:
- Tinan 8 durasaun deklarasaun benefísiu tributáriu no alfándega nian
- 100% husi benefísiu sira ne'ebé fó iha leten.
Deklara liután katak, tuir no ba efeitu sira hosi Artigu 24 no 25 hosi Lei Investimentu Privadu nian, investidór ne'ebé temi ona iha direitu hanesan ba benefísiu sira ne'ebé temi ona ne'ebé fó ba sira iha testu legál.
