DILI (TOP) — Unidade Polisia Fronteira (UPF) ka'er militar Indonézia ka Tentara Nasional Indonesia (TNI) hamutuk nain 13 iha Suku Beneufe, sub-rejiaun Nitibe, Oe-Kusi Ambeno, tanba mout iha tasi Oe-Nopu, aldeia Citrana
Portavoz komandu jeral Polisia Nasionál Timor-Leste, superintendente xefe Arnaldo de Araújo hateten, iha loron 27 Janeiru 2021 oras tuku 13:15, membru UPF sira konsege ka'er TNI hamutuk nain 13 iha Oe-Nopu, aldeia Citrana, suku Beneufe, Nitibe, Oe-Kusi Ambeno.
“TNI sira ne’e hamutuk na’in 13 ne’ebé liu husi fronteira lori sira nia speed boat ida, iha kecamatan Oe-Poli, kabupaten Kupang sira hola hotu sasan atu fila-fali ba Fatu-Sinai laloran boot no tasi boot baku sira lori tama to’o área Citrana maka UPF sira ka’er,” hateten portavoz Arnaldo liu husi konferensia ba imprensa iha kuartel jeral PNTL, Kaikoli, Dili Sesta 29 Janeiru 202.
Eis Komendante PNTL RAEOA ne’e hatutan, TNI ho PNTL iha kooperasaun di’ak tebes liu-liu iha fronteira. No TNI 13 ne’e fila-fali ona ba sira nia fatin ho kondisaun saudavél.
“Ita nia komandu PNTL RAEOA no eskuadra Citrana serbisu hamutuk ho UPF ba foti sira nia identidade depois kontaktu ba iha konsuladu ne’ebé maka destaka iha RAEOA halo koordenasaun di’ak no membru TNI sira ne’e, PNTL fó fila-fali ba Indonénzia ho kondisaun di’ak,” nia informa.
Nia esplika, TNI nain 13 ne’e la’os illegal, maibé situasaun ne’e hanesan insidente ka asidente ida dala barak akontese iha ne’ebé de’it.
"Sira mai la uza farda, la uza buat ida, no sira mós agradese, tanba serbisu iha fronteira ne'e iha koordenasaun buat hotu di'ak," nia dehan.
Nia konta, iha momentu ne’e kedas kolega TNI nain 13 ne’e fila-fali ba sira nia fatin kedas iha fatuk sinai iha oras 17:50.
Nia dehan, distansia entre Fatuk Sinai ho Citrana, Oe-Kusi Ambeno la dook ida, maibé hateke ba malu besik hela, tanba ne'e maka sira mai sosa sasán atu fila maka mosu laloran tasi no anin boot iha tasi laran, hodi baku fila sira mai TL nia área Citrana Timor-Leste.
