DILI (TOP) — Bankada Kmanek Haburas Unidade Nasional Timor Oan (KHUNTO) ezije ba governu tenke hasa’e salariu membru Polisia Nasionál Timor-Leste (PNTL), no FALINTIL-Forsa Defeza Timor-Leste (F-FDTL) atu sira bele serbisu hametin liutan fronteira rai-laran nian.
Deputada partidu KHUNTO Olinda Guterres katak tuir nia rezultadu observasaun ba salariu membru PNTL no F-FDTL sira durante ne’e laiha balansu ho tarefa serbisu ne’ebé sira presta hodi hametin seguransa interna no seguransa frontira sira iha rai-laran.
“Sei bele aumenta tan F-FDTL no PNTL hodi asegura tan ita nia fronteira tanba ita ne’e laos hakat tasi maibé hakat rai maran ita bele sura menutu balun deit ita hakat liu fronterira. Ita atu haruka de’it polisia no F-FDTL atu serbisu de’it hanesan ne’e ho sira nia salariu ne’ebé minimu, tanba sira husik hela sira nia feen,no oan iha fatin ida, sira ba halo seguransa iha fronterira,” hateten Olinda liu husi plenaria Parlamentu Nasionál, Segunda 18 Janeiru 2021.
Nia hatutan, membru PNTL no F-FDTL sira dalaruma haluhan tiha sira nia fen no oan hodi halo patrulla ba povu Timor-Leste nia di’ak.
“Ha’u hakarak husu ba governu aumenta sira-nia salariu per diem ba PNTL no F-FDTL sira, ami deputadu sira iha ne’e atu halo fiskalizasaun ne’e hetan per diem iha tanba saida polisia sira labele hetan per diem,” deputada Olinda husu.
Deputadu Partidu Demokrátiku (PD) Adriano do Nasimentu sujere ba PNTL no F-FDTL atu kontrola di’ak liutan movimentu illegal sira iha área fronteira Timor-Leste nian, tanba tuir deputadu husi munisipiu Kovalima ne’e katak, númeru kazu Covid-19 iha Nusa Tenggara Timur (NTT) oras ne’e sa’e maka’as.
“Ha’u hetan informasaun husi familia balun Covid-19 ne’e iha Betun-Indonézia ninia transmisaun lokal ne’e maka’as tebes, Betun ne’e fronteira ho Suai, nune’e mós ha’u fiar katak iha Atambua no iha Soe katak sai preokupasaun ba NTT,” deputadu Adriano esplika.
Entretantu, parte balun mós sujere ba deputadu sira atu kada tinan labele ezije hasa’e salariu de’it ba membru PNTL no F-FDTL sira, maibé ezije hasa’e mós salariu ba parte sira seluk hanesan mestre sira no seluk tan ne’ebé mós assume serbisu importante ba prosesu dezenvolvimentu nasionál.
