DILI (TOP) — Hafoin mosu dezintedimentu entre Koordenador Gabinete Seguransa iha Parlamentu Nasionál, Inspetor Polisia, Alexandrino da Costa “Alex Samurai” ho deputadu FRETILIN, David Diaz Ximenes iha loron hirak liuba provoka kedas mudansa ba seguransa iha parlamentu ne’e rasik.
Governu daualu konstitusional orjininalmente mai husi partidu politika tolu, CNRT, PLP no KHUNTO hanaran a’an ba Aliansa Mudansa ba Progressu (AMP) ne’ebé hetan konfiansa husi vontade popular liu husi eleisaun antisipada iha fulan Maiu 2018. Iha eleisaun ne’e povu maioria demokrátikamente depozita sira nia konfiansa ba AMP hodi ukun ba tinan lima. La’o to’o dalan klaran, partidu tolu ne’e so’e malu tiha, no partidu FRETILIN ne’ebé lahetan konfiansa popuar iha festa demokrásia iha tinan 2018, ikus mai oras ne’e sai tiha nain ba governu atual.
Desijaun partidu CNRT nian ne’ebé vota abstein ba Orsamentu Jeral Estadu (OJE) tinan 2020 mak loke dalan luan ba partidu FRETILIN hodi sai tiha nain ba governu atual, maibé molok to’o ne’eba, FRETILIN ajuda PLP no KHUNTO “sobu” no “hadau” uluk meja Parlamentu Nasionál iha loron 19 Maiu 2020. Rezultadu husi “hadau” meja ne’e ikus maioria deputadu sira hili deputadu Aniceto Guterres husi FRETILIN lidera meja Parlamentu Nasionál to’o ohin loron.
Deputadu Aniceto Guterres husi FRETILIN, no deputadu David Dias Ximenes mós husi FRETILIN, no durante tinan barak nia iha Komisaun B Parlamentu Nasionál ne’ebé responsavél ka trata kona-bo assuntu seguransa, defeza no negósiu estranjeiru.
Dala ida tan, hafoin mosu dezintedimentu entre Koordenador Gabinete Seguransa iha Parlamentu Nasionál, Inspetor Polisia, Alexandrino da Costa “Alex Samurai” ho deputadu FRETILIN, David Diaz Ximenes iha loron hirak liuba provoka kedas mudansa ba seguransa iha parlamentu ne’e rasik.
Maibé, deputada Lídia Martins husi bankada FRETILIN katak, substituisaun ne’e laiha relasaun ho dezintendimentu entre Alex Samurai ho deputadu David Dias Ximenes “Mandati” nian, maibé mudansa ne’e tanba nesesidade entre Parlamentu Nasionál no komandu Polisia Nasionál Timor-Leste (PNTL).
“Tanba mandatu ne’e tinan tolu ona, maibé molok dezitendimentu ne’e PN halo tiha karta substituisaun,” esplika deputada ne’e ba jornalista sira iha Parlamentu Nasionál, Segunda 23 Novembru 2020.
“Ita hetan kooperasaun ida-ne’ebé di’ak tebes husi PNTL. Hafoin PNTL deside destaka Inspetór Alexandrino da Costa entaun inspetór to’o ohin loron tinan tolu kedas ona, presija mós mudansa. Ohin serimónia entrega ida hosi Inpetór Alexandrino da Costa ba komandante foun asistente superientendente Abrão Filipe das Quintas. Komandante foun mai kontinua de’it serbisu ne’ebé iha hela tuir lei ne’ebé previstu LOFAP,” deputada Lidia afirma.
Nia esplika, lei númeru 12 /2017, 24 maiu kona-ba Lei Organizasaun no Funsionamentu Administrasaun Parlamentár (LOFAP) previstu iha artigu 21 (Gabinete Seguransa), alínea 1 katak, Gabinete Seguransa nu’udar koordenada ofisiál seguransa destakadu husi PNTL, ho postu sub-kategoria Ofisiál Superiór. LOFAP la preve mandatu koordenadór foun seguransa iha PN maibé, troka ne’e hodi iha mobilidade serbisu.
“Dezeja no susesu ba komandante Alex Samurai ne’ebé durante ne’e kontribui ona seguransa ba Parlamentu Nasionál no ami mós agradese ba substituisaun foun hosi PNTL mai iha uma fukun”.
Entretantu, Inspetor Polisia, Alexandrino da Costa “Alex Samurai” hateten, mudansa Gabinete Seguransa la’os iha Parlamentu Nasionál (PN) mesak, maibé akontese mudansa mós iha fatin barak, no konsidera mudansa ne’e normál tranferénsia orden serbisu orientadu husi Komandu Jerál PNTL.
“Mudansa ne’e la’ós akontese iha Parlamentu Nasionál de’it, maibé akontese iha fatin hotu-hotu, nu’udar membru prontu kolabora no mudansa saida de’it,” esplika Inspetor Polisia, Alex Samurai.
Istorikamente, nia asume koordenadór seguransa iha Parlamentu Nasionál dezde tinan 2017 no sei transfere fali ba komandu Unidade Espesiál Polísia (UEP) iha unidade Korpu Seguransa Pesoál.
Tuir Koordenadór Seguransa PN foun, Superientende Asistente Filipe das Quintas katak, sei kontinua serbisu ne’ebé koordenadór sesante rai hela ho baze ba LOFAP no orientasaun komandu nian.
“Ha’u sei asegura gabinete seguransa tanba antigamente Prezidente Parlamentu Nasionál mak husu tau ofisiál superiór, entaun komandu koloka ha’u mai iha fatin ida-ne’e hodi subtitui ami-nia inspetór ne’ebé serbisu iha-ne’e,” nia esplika.
Molok ne’e Superientende Asistente Filipe das Quintas nu’udar Segundu Komandante PNTL iha Munisípiu Manufahi.
