DILI (TOP) – Polisia Nasionál Timor-Leste (PNTL) autoriza ona grupu Rejistensia Nasionál Defende Justisa no Konstituisaun (RNDJK) hodi halo manifestasaun iha loron 4 Setembru to’o loron 18, maibé militar FALINTIL-Forsa Defeza Timor-Leste hamutuk nain 7 ho kilat kompletu hahu serku dadauk ona rezidensia Angela Freitas nian.
Iha loron Segunda, 31 Agustu 2020, parte PNTL autoriza katak pedidu grupu RNDJK ne’e hetan ona autorizasaun hodi halo manifestasaun kontra Prezidente Repúblika, Francisco Guterres Lú Olo liga ba nia desijaun sira durante ne’e, no iha loron ne’e kedas ulun boot instituisaun FALINTIL-Forsa Defeza Timor-Leste (F-FDTL), Maijor Jeneral Lere Anan Timur deklara públikamente, sei futu Angela Freitas nu’udar portavoz ba grupu RNDJK ho António Ai-Tahan Matak.
Kona-ba prezensa membru F-FDTL nain 7 ne’ebé serku rezidensia Angela nian iha loron Tersa 1 Setembru, Angela katak bainhira F-FDTL ameasa ema sivil ruma ne’e kategoria krime ona.
"Statementu ne'ebé mak fó sai iha públiku ha’u haree katak seriedade katak atu halo intimidiasaun, maibé tuir informasaun sira atu halo kapturasaun ba ita haree tok atu halo kapturasaun. Ha’u hanoin katak F-FDTL tuir loloos labele ameasa sidadaun sivil ne'ebé atu espresa ninia hanoin ida ne'e konsagra tiha ona iha konstituisaun, buat ida ameasa sidadaun sivil ida ne'e krime," hateten Angela ba jornalista sira via kontaktu telemovél, Tersa 1 Setembru 2020.
"Ami sempre koopera tanba ami la halo krime, imi hotu akompaña katak durante ne'e hala’o buat sira ne'e, tuir prosesu, ami mós iha koñesementu husu autoridade ba PNTL, ami hetan tiha ona autorizasaun husi PNTL para atu akompaña ami nia demostrasaun pasifika ne'e”.
Membru F-FDTL nain 7 ho kilat boot tun ba serku tiha rezidensia Angela Freitas nian iha suku Gricenfor, postu Cristo Rei, munisipiu Dili, Tersa 01 Setembru 2020. Foto The Oe-Kusi Post/Marcelino Bata.
Liuhusi situasaun ne'e The Oe-Kusi Post observa katak Membru Falintil Forsa Defeza Timor-Leste (F-FDTL) ho kareta isuzu ida, uza uniforme kompleitu mai serku tiha portavoz Rejistensia Nasional Defende Justisa Konstiuisaun RNDJK Angela Freitas nia rezidensia iha Bairu Formoza, suku Grisenfor Postu Administrativu Cristo-Rei, Munisipiu Dili.
Liga ba ameasa Jeneral Lere nian, Prezidente Konsellu Imprensa Timor-Leste, Virgilio “Lamukan” Guterres via nia posting iha media sosial Facebook katak, konstituisaun garante sidadaun ida-idak iha liberdade atu hato'o nia opiniaun liuhosi dalan oin-oin, inklui halo manifestasaun.
Ne’ebé, mana Angela Freitas ho maun Aitahan Matak, nudar sidadaun Timor-Leste, sira iha liberdade atu halo manifestasaun,” esplika Virgilio.
“Importante mak sira nia manifestasaun ne'e mós labele prejudika fali sidadaun sira seluk nia liberdade”. Relasiona ho ida ne'e, media sira fó sai katak mana Angela hasoru no ko'alia tiha ona ho parte seguransa, “ita nia polisia, atu hetan garantia fatin atu halo manifestasaun. Rona katak, fatin mak Tasi-tolu ho Bekora (eis-kompleks militar Indonesia Batalyon 744)”
Nia esplika, iha sosiedade demokrátika, lei bandu atu ema ida labele ameasa fali atu "futu" ka "sama-belar" ema seluk. Sa tan ameasa ne'e sai hosi lider militar nian.
“Hanesan lider ba Forsa Defeza Timor-Leste (lutu nasaun nian), loloos Jeneral tenki preokupa ho seguransa nasaun nian. La'os sibuk fali ho ema ida ka rua nia seguransa ka destinu”.
Nia hatutan, asuntu manifestasaun ne'e, asuntu PNTL nian. Militar ne'e haree ba seguransa nasaun nian.
“La'os sibuk fali ho mana Angela ho maun Antonio Aitahan Matan. Sira na'in 2 ne'e LA LEVEL atu sai preokupasaun Xefe Estado Maior (kargu Estado nian). Husik ba polisia sira mak urus”.
Author:Raimundos OkiWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
