Oekusipost.com Dili – Konflitu partidu politiku sira iha rai-laran oras ne’e manas tebes maske periodu Estadu emejénsia ne’e seidauk remata.
Konflitu politika ne’e la seluk, la leet mak atu buka poder hodi ukun rai ne’e hodi fahe previlejiu ba malu, no itoan de’it mak fó povu ne’ebé nu’udar nain ba ukun, tanba kada tinan lima (5) povu mak fó poder ba partidu politika sira hodi ukun rai-ne’e. Prosesu fó poder ne’e liu husi eleisaun jeral ne’ebé hala’o kada tinan lima.
Antes ne’e, Prezidente partidu CNRT, Kay Rala Xanana Gusmão katak, nia lakohi ona atu asume pasta importante sira iha governu laran liliu ba pasta primeiru-ministru.
“Ha’u la’ós buka kargu primeiru-ministru. Iha tinan 2015 ha’u entrega ona kargu ne’e, tanba atu halo serbisu ba fronteira tasi Timor ne’ebé boot primeiru-ministru nia serbisu. Foin lalais mós ha’u la ba. Ita tenke defende Konstituisaun agora atu labele hamosu problema iha jerasaun futuru,” hateten Kay Rala Xanana Gusmão liu husi konferénsia ba imprensa iha sede partidu CNRT iha bario Grillos, Kinta 30 Abril 2020.
Iha parte seluk, Vise Xefe Bankada CNRT, deputadu Patrocino dos Reis Fernandes konsidera movimentu politika partidu FRETILIN oras ne’e ba “buka hela” Aliansa Mudansa ba Progressu nia etu sin iha fatin tein (dapur) hodi tama iha estrutura governu atual.
"Fretilin hakarak atu ba ukun, di'ak liu ba halo koligasaun foun para depois forma foun, agora ne'e FRETILIN laiha dalan hodi tama iha governu AMP nian," hateten deputadu Patrocino ba jornalista sira iha Parlamentu Nasionál, Dili Sesta 8 Maiu 2020.
“Ne’e hanesan ema haksoit husi lutu kotuk ba tama ema nia dapur laran atu buka ema nia etu sin ne’e. Laiha dalan,” deputadu Patrocino afirma.
Faktu politika hatudu, tantu husi Prezidente Repúblika, Francisco Guterres Lú Olo ho Sekretariu Jeral partidu FRETILIN, Mari Bin Amude Alkatiri hato’o pozisaun hanesan de’it katak kontinua suporta Primeiru-Ministru Taur Matan Ruak hodi lidera governu atual. Nune’e, hafoin Orsamentu Jeral Estadu la liu iha Parlamentu Nasionál iha loron 17 Janeiru 2020, tuir mai Primeiru-Ministru mós hato’o kedas nia pedidu demisaun, no liu tiha loron 60 mós laiha desijaun ruma husi Prezidente Repúblika, no ikus mai Primeiru-Ministru rasik mak dada hikas nia pedidu demisaun ne’e.
Sekuensia seluk mak iha loron Sábadu 21 Marsu 2020 iha oras tuku 3 lorokraik, Partidu Libertasaun Popular (PLP) asina plata forma intendimentu ida ho partidu FRETILIN hodi prontu ukun hamutuk, no faktu hatudu oras ne'e partidu rua ne'e hamutuk ona.
Notisia relevante: Koaligasaun Minoria Prontu Forma Governu Foun
No realidade hatudu, lista membru governu foun ne’ebé aprezenta on aba Prezidente Repúblika kompostu husi ema FRETILIN nain 5, no ida seluk husi Partidu Demokrátiku. Membru governu nain 7 husi partidu CNRT ne’ebé seidauk simu posse desde Juñu 2018 to’o oras ne’e nafatin lahetan oportunidade hodi tama ba estrutura governu atual.
Notisia relevante: PR Sei Posse Membru Governu Nain 6
Lista membru governu foun ne’ebé haruka husi governu mak hanesan na'in ida husi PD, restu mai husi partidu FRETILIN mak hanesan, Ministru ba Antigu Kombatente sira, Meta Malik, Ministra Saúde (MS) Odete Maria Freitas, Vise-Ministra Turizmu Komersiu Industria (VMTKI) Inácia Texeira, Ministru Administrasaun Estatál (MAE) Faustino Cardoso, Ministru Turizmu Komersiu Industria (MTKI) Manuel Vong, no Ministru Finansas (MF) mak Fernando Hanjam.
