Oekusipost.com Dili – Intendimentu ka koaligasaun entre partidu FRETILIN ho Partidu Libertasaun Popular (PLP) maske hetan de’it kadeira 31, maibé prontu ona hodi forma governu foun bainhira desijaun Prezidente Repúblika afavór ba sira.
Prezidente Partidu Libertasaun Popular (PLP), Taur Matan Ruak hatete, nia partidu PLP prontu hamutuk ho partidu FRETILIN hodi hamutuk iha governasaun foun tuir mai.
Ataul Primeiru-Ministru governasaun daualu ne’e hatete, iha eleisaun antisipada iha fulan Maiu 2018, povu fó konfiansa ba partidu Aliansa Mudansa ba Progressu (AMP). Infelizmente iha Janeiru 2020, Orsamentu Jeral Estadu ba tinan 2020 xumba (la passa) iha Parlamentu Nasionál, tanba maioria partidu CNRT hili vota tuir sira nia konsiensia hodi vota abstensaun.
“Ne’e hatudu katak CNRT retira nia konfiasan ba governu ne’ebé ha’u lidera. Situasuan ida ne’e mós loke desijaun, dalan foun ba alternativa foun. Prosesu atu harii fundasaun foun, hetan aliansa atu lidera formasaun ne’ebé mai, depende ba desijaun Prezidente Repúblika,” hatete prezidente PLP ne’e ba Jornalista sira iha Hotel-Timor, Dili Sábadu 21 Marsu 2020.
Ho situasaun atual ne’ebé oras ne’e akontese iha rai laran, Matan Ruak katak; “ita nia nasaun labele hein. Ita mós labele hein, tanba ita nia tempu itoan de’it,” nia hatete.
Nia hatutan, PLP prontu serbisu hamutuk ho FRETILIN hodi loke dalan foun atu solusiona impase politika ne’ebé durante ne’e akontese iha rai-laran no mós atu tau forsa hamutuk hodi luta hasoru corova virus ne’ebé oras ne’e detekta ona ema estranjeiru ida positivu kona ona.
“PLP prontu serbisu hamutuk ho FRETILIN hodi loke dalan”.
Rezultadu eleisaun antisipada iha Maiu tinan 2018, PLP hetan kadeira 8 no partidu FRETILIN hetan kadeira 23, nune’e tau hamutuk partidu rua ne’e hetan de’it kadeira 31 iha Parlamentu Nasionál kompara ho partidu koaligasaun seluk ne’ebé lidera husi Prezidente partidu CNRT, Kay Rala Xanana Gusmão hetan kadeira 34.
Hare fali ba situasaun real iha tinan 2017 katak, iha tempu ne’eba Prezidente Repúblika, Francisco Guterres Lu Olo fó posse ba governu minoria ne’ebé lidera husi Primeiru-Ministru atual Sekretariu Jeral partidu FRETILIN, Mari Alkatiri, maibé ikus mai tenke monu, tanba partidu maioria parlamentar blokeia tiha nia programa governu iha tempu ne’eba.
Liga ba kestaun ne’e, Sekretariu Jeral partidu FRETILIN, Mari Alkatiri fó garantia ba públiku katak maske intendimentu foun ne’e entre FRETILIN ho PLP ne’e hetan de’it kadeira 31, maibé nia fiar katak programa governu no Orsamentu Jeral Estadu sei liu iha Parlamentu Nasionál, tanba partidu sira iha Parlamentu mós kolen hotu ona.
“Ha’u fiar katak programa sei liu, OJE mós sei liu, tanba partidu politika sira iha Parlamentu Nasionál mós kolen ona,” promete Alkatiri.
Maske seidauk iha desijaun final husi Prezidente Repúblika (PR) kona-bá impasse politika iha rai-laran, maibé Alkatiri ho politikamente deklara uluk ona katak sei laiha eleisaun antisipada, no konsidera intendimentu entru partidu rua ne’e la kontra natura.
“Ami hasai deklarasaun ida atu define plataforma ida hodi halibuar ema hotu iha rai ida ne’e. No mós atu solusiona impase politika ida ne’e,” hatete Alkatiri.
