Oekusipost.com Dili – Rezultadu reuniaun Konsellu Ministru (KM) sira ne’ebé hala’o iha loron Segunda, 23 Marsu 2020 dekreta ona pedidu husi Komisaun Funsaun Públiku (KFP) nian ba Funsionáriu Públiku (FP) kontratadu sira, la presija halo serbisu iha serbisu fatin sira, maibé bele hala’o serbisu iha uma de’it durante loron 30 nia laran.
Karta pedidu KFP ba Gabinete Primeiru-Ministru ho data 20 Marsu 2020, númeru ofísiu 187/2020 katak, tuir Lei númeru 7/2009, 15 Jullu, kompete ba KFP hodi fó konsellu ba governu relasiona ho setor públiku.
Konteudu husi pedidu ne’e katak, KFP konsidera katak izolamentu ka separasaun sosial nu’udar medida ida efikaz tebes, tanba ne’e KFP rekomenda ba Primeiru-Ministru atu determina kada instituisaun Estadu hahu hamenus prezensa FP sira iha sira nia serbisu fatin, maibé mantein kontaktu nafatin kontaktu hodi hala’o serbisu nesesariu balun bainhira presija.
“Funsionáriu sir a ho tinan 50 ba leten ho sira ne’ebé sofre moras respiratóriu krónika tenke hala’o serbisu iha uma de’it,” esplika karta KFP ne’ebé Oe-Kusi Post asesu.
Pedidu ne’e refere de’it ba funsionáriu públiku kontratadu sira mak livre hodi hala’o serbisu iha uma de’it. Kondisaun serbisu ne’ebé atu halo sei determina husi diretór sira no sei koordena no avalia husi diretór jeral sira.
KFP propoin atu asaun redusaun pessoal funsionáriu sira presija implementa imediatamente iha instituisaun Estadu hotu ba periodu inisial loron 30, no sei halo reavaliasaun ikus.
Ministru Reforma Lejislativa no Assuntu Parlamentar (MRLAP), Fidelis Manuel Leite Magalhães hatete, KM deside ona pedidu husi KFP.
“Maibé sira presija mantein kontaktu atu banhira presija karik bele hala’o serbisu. Ida ne’e la’ós deskansa iha uma, maibé hala’o serbisu iha uma de’it,” hatete Ministru Fidelis liu husi konferensia ba imprensa iha Sentru Konvensaun Dili (SKD,) Kaikoli-Dili, Segunda 23 Marsu 2020.
“Hala’o serbisu iha uma mós la’ós atu la’o tun-sa’e, maibé iha uma de’it hodi koidadu ba familia atu labele kona virus corona,” esplika governante ne’e.
