Oekusipost.com Dili – Prezidente Repúblika (PR), Francisco Guterres Lu Olo desidi ona hodi halo diskusaun ba Estadu emerjénsia iha loron Tersa, 24 Marsu 2020.
Komunikadu ne'ebé fó sai husi Palásiu Prezidénsia iha loron Segunda, 23 Marsu 2020 lorokraik katak PR sei prezide reuniaun Konsellu Superior Defeza no Seguransa hahú tuku 9 dadersan no Konsellu Estadu, sei hahú tuku 11.
Reuniaun atu diskute Estadu emerjénsia ne'e tanba, haree ba moras foun husi virus corona ne’ebé da’et lalais husi ema ba ema iha mundu tomak no halo ema barak moras no mate ona no, tanba simu ohin pedidu husi Governu atu deklara Estadu emerjénsia, PR konvoka, ho karáter urjénsia, membru sira hotu ne’ebé halo parte Konsellu Superior Defeza no Seguransa no Konsellu Estadu.
“Estadu emerjénsia signifika, sei iha medidas ne’ebé sei limita ka supende direitu balun liberdade balun no garantia sira balun ne’ebé Konstituisaun fó ba sidadaun sira. Governu hanoin katak ho medida sira ne’e mak ita bele kombate no hamenus moras ne’e daet husi ema ba ema, iha Timor-Leste,” PR hatete liu husi nia komunikadu ne’ebé Oe-Kusi Post asesu, Segunda 23 Marsu 2020.
Nia hatutan, molok foti desijaun sei rona opiniaun husi membrus Konsellu Superior Defeza no Seguransa no Konsellu Estadu no haree katak presiza halo duni deklarasaun Estadu emejénsia, PR sei husu autorizasaun husi Parlamentu Nasionál, liuhusi Mensájen ida. Karik Parlamentu Nasional aprova, PR sei deklara Estadu emerjénsia liuhusi dekretu Prezidensial.
Entretantu, reuniaun Konsellu Ministru extraordinariu ne’ebé hala’o iha loron Segunda, 23 Marsu 2020, Primeiru-Ministru, Taur Matan Ruak hamutuk ho nia membru governu sira diskuti mós kona-bá pedidu ida atu husu ba PR hodi desidi Estadu emerjénsa. Liu tiha ida ne’e, direitamente hato’o ba Palásiu Prezidensial, no PR simu ona pedidu ne’e molok tuku ida.
PR, iha ninia mensajen ba povu tomak, iha loron 20 Marsu 2020, tuku tolu lokraik, husu ba instituisaun Estadu hotu no sosiedade tomak atu fó liman ba malu atu prevene no kontrola moras husi koronavirus.
Timor-Leste, liuhusi Ministra Saúde, deklara ona katak iha ema na’in-ida ne’ebé hetan ona moras husi koronavírus.
Membru Konsellu Estadu ne’ebé sei partisipa iha reuniaun ne’e mak Prezidente Repúblika Francisco Guterres Lú Olo, Primeiru Ministru Taur Matan Ruak, Eis Prezidente Repúblika sira, Prezidente Parlamentu Nasionál Arão Noe, no membru ne’ebé nomea husi Prezidente Repúblika: Oscar Lima, Alcino de Araújo Barris, Maria Dadi Soares Magno, Laura Soares Abrantes, Faustino da Costa no nomea husi Parlamentu Nasionál: Eduardo de Deus Dusae, Aurora Ximenes, José Cornelio Guterres, Árcangelo de Jesus Gouveia Leite, José dos Santos no ‘Naimori Bucar.
