Oekusipost.com – Deputadu sira iha Parlamentu Nasionál (PN) sente hakfodak tebes bainhira ahí eletrisidade mate de repente iha sesaun debate ida kona-bá orsamentu duodesimu hodi bele sustenta mákina Estadu tomak iha rai-laran.
Ho akontesimentu ne’e, hapara kedas debate PN, tanba iha PN laiha jerador hodi rezerva bainhira ahí eletrisidade mate.
Prezidente Parlamentu Nasionál (PPN), Arão Noe de Jesus rekoñese akontesimentu ne’e, maibe ida ne’e serbisu tékniku Eletridade Timor-Leste (EDTL) nian.
“Ahi derepente mate tiha, depois sira sei konfirma fallansu ne’e iha ne’ebé, tanba ne’e ami hadi’a ba aban dader nune’e ahi moris para ita konta kontajen ne’e,” hatete PPN Arão ba jornalista sira iha PN, Dili, Segunda 23 Marsu 2020.
Politika nain husi partidu CNRT ne’e katak, debate ba orsamentu duodesimu ne’e sei adia fali iha loron Tersa, 24 Marsu 2020 dadersan hodi konta didi’ak ba orsamentu ne’e rasik nune’e labele hamosu komplikasaun.
Manufahi oan ne’e hatutan, PN iha jerador ida, maibé avaria tiha ona no kleur ona la halo manutensaun, tanba ahi eletrisidade normal tiha ona ne’e mak la hadia jerador ne’e.
